Buch der Natur

IV. VON DEN PAUMEN.

A. VON DEN PAUMEN

IN AINER GEMAIN.

___________________________________________________

49.

Von dem sperhagen.

Speragus ist ain paum und mag ain sperhagen haizen. der ist an kraft warm und trucken in dem dritten grâd. des früht sint sam diu körnl oder sam die probs, die an der paum reisern her für schiezent. wenn die paum des êrsten probsent, ê si läuber gewinnent, diu fruht diu ist den dunkeln augen guot und zepricht den stain in der plâtern. wer ainem hund daz wazzer gibt, dâ der paum oder diu fruht inn gesoten wirt, der muoz sterben. wer aber si seudet und izzet, daz waicht den leip.