Buch der Natur

IV. VON DEN PAUMEN.

A. VON DEN PAUMEN

IN AINER GEMAIN.

___________________________________________________

50.

Von dem thimpaum.

Thimus haizt ain thim. daz ist gar ain edel paum und wechset gegen der sunnen aufganch. von derlai holz macht Salomôn die peistal der tür an dem tempel (als diu geschrift sagt in dem dritten puoch der künig und anderswâ; die peistal haizt diu geschrift fulchra) und macht auch an dem künkleichen sal tür dâ mit und macht dar auz harpfen und leiren den sangmaistern in dem tempel. daz holz fault niht, sam die lêrær sprechent, und ist voller dorn geleich aim weizen dorn, und die paum sint sinbel sam die viechten; aber daz holz ist weiz und gar vast scheinend, reht sam daz helfenpain.