Buch der Natur

IV. VON DEN PAUMEN.

A. VON DEN PAUMEN

IN AINER GEMAIN.

___________________________________________________

31.

Von dem nuzpaum.

Nux haizt ain nuzpaum und kümt von dem wort noceo, daz haizt schaden, sam Isidorus spricht, wan der paum und seiner pleter kraft schadet dem næhsten paum gar sêr. den paum haizt diu lateinisch sprâch vigilantem oder vigulum. diu nuz haizt ze däutsch ain wälhisch nuz diu auf dem paum wechset, dar umb, daz man ir ain underschaid hab von den haselnuzzen und von ander lai nuzzen, und die nuz sint guot für die vergift, die man an kräutern izt oder an swämmen, ez sein pfifferling oder ander swämme, wan die vergift vertreibent die nuz, aber si sint der prust schad und pringent wüllen und machent den menschen haiser. iedoch sint si guot mit veigen ze ezzen. si sint auch guot nâch vischen, sam etleich sprechent.