Buch der Natur

IV. VON DEN PAUMEN.

A. VON DEN PAUMEN

IN AINER GEMAIN.

___________________________________________________

30.

Von dem nespelpaum.

Mespilus oder esculus haizt ain nespelpaum. der paum hât nâhent pleter sam ain küttenpaum und hât ain scharpf rinden; aber er ist niht gar hôch, und wenn man den paum pelzet auf ainen fremden stam, ez sei auf ains pirpaums stam oder apfelpaums oder torenpaums oder ains andern, sô wirt diu fruht grôz und hât niht herter kern in ir; aber wenn diu fruht wechset auf irm aigen stam, sô hât si stain in ir, wan ie deu fruht hât vier staindel in ir. die früht haizent mespila ze latein und ze däutsch nespeln und sint an ir kraft warm und trucken in dem êrsten grâd und sterkent den magen. si benement daz wüllen und daz undäwen. von des paums holz macht man gar guot knütel ze kämpfen und ze vehten.