Buch der Natur

IV. VON DEN PAUMEN.

A. VON DEN PAUMEN

IN AINER GEMAIN.

___________________________________________________

24.

Von dem lendpaum.

Lentiscus haizt ain lendpaum. des paums stam ist sänft und waich, sam Isidorus spricht, dar umb hât er den namen ze latein lentiscus, wan wir haizen allez daz lentum ze latein, daz dâ piegleich ist und waich. des paums fruht switzt öl und sein rind gibt harz, der haizt sam der paum, aber unser puoch ze latein spricht, der harz haiz mastix. daz ist niht wâr, wan mastix ist ain besunder paum und hât harz, der auch alsô haizt, als her nâch kunt wirt. Platearius spricht, daz des paums pleter und sein früht guot sein zuo vil erznei, und habent die kraft, daz si der frawen rôt flüzz verstên machent und sint auch guot für ander flüzz an dem leib, die rôt sint, und wider unglust oder wider daz wüllen, daz von krankhait kümt. wem diu zung vol geswer ist oder die lebsen und der munt und wer haizsühtig ist, der schol des paums pleter in ezzeich sieden und schol mit dem in dem hals gorgeln oder hab sich über den dunst, sô wirt im paz.