Buch der Natur

IV. VON DEN PAUMEN.

A. VON DEN PAUMEN

IN AINER GEMAIN.

___________________________________________________

25.

Von dem malgranpaum.

Malus punica oder malogranata haizt ain malgranatpaum und haizt malus punica dar umb, daz malus ze latein ain apfelpaum haizt, sô ist Punica ain küngreich, dâ der paum vil und schœn inne wachsent, und dar umb hât der paum den namen, sam Isidorus spricht. er haizt auch malogranata dar umb, daz sein früht körnlot sint inwendig, und haizent die öpfel malogranata; aber neur ain apfel haizt malogranatum, wan granum ze latein haizt ain korn, dar umb haizent si die laien malgranöpfel. die süezen malgran sint mæzicleichen warm an der kraft und fäuht, alsô daz si den menschen werment und fäuhtent. aber die sauren sint kalt an der kraft und trucken, dar umb sint si den siechen guot, die von hitziger materi siech sint und von der colera, die hitzig läut habent, hirnwüetig, wenn man ins in ezzen gibt. wer der öpfel saf mit zucker mischet und daz izt, daz machet, daz der mag daz ezzen gar wol kocht.