Buch der Natur

III. HIR HEBT AN DAZ DRITT

STÜCK DES PUOCHS

VON DEN TIERN

IN AINER GEMAIN

B. VON DEM GEFÜGEL

IN AINER GEMAIN

___________________________________________________

13.

Von dem calader.

Caladrius, sam Jacobus und Isidorus sprechent, ist ain weizer vogel über al. der hât die art, daz daz inwendig tail seiner hüff benimt den augen ir vinster. er hât auch die art, ist daz man in füert zuo ainem siechen menschen etswie oft, sô bedäutt er, ob der mensch sterben schol oder genesen. wan ist, daz er des menschen antlütz versmæht und kêrt sein augen von im, sô stirbt er; siht aber er den siechen an und kêrt sich niht von im, sô geniset er, wan er bekent sein antlütz und nimt sein siechtum an sich und fleugt in die lüft und verprent und zerstræut si; sô wirt der siech zehant gesunt. die vogel heten die alten küng hie vor beslozzen in irn säln und in irr wonung. die vogel vant Alexander in dem lant Perside. der calader hât ain grôzez pain in seinen pain, des mark macht die vinstern in den augen clâr, der sich dâ mit salbet.