Tristan

XXVIII. Entdeckung und Versöhnung (17275 - 17658)

__________________________________________________________________________________

17275

Under diu dô diz geschach,

sô haete ie michel ungemach

der trûrige Marke.

er trûrete starke

umbe sîn êre und umb sîn wîp.

17280

im begunde muot unde lîp

von tage ze tage swaeren,

êre unde guot unmaeren.

sus gereit er in den selben tagen

in disen selben walt jagen

17285

und mê durch sîne triure

dan durch kein âventiure.

nu sî zem walde kâmen,

die jegere ir hunde nâmen

und vunden eine trünne stân.

17290

dâ begunden s'in ze ruore lân.

und an der selben stunde

so geschieden die hunde

einen vremeden hirz hin dane,

der was reht alse ein ors gemane,

17295

starc unde michel unde blanc,

daz gehürne cleine unde unlanc,

vil kûme wider entworfen,

als er ez hin geworfen

haet in unlanger zîte.

17300

den jageten si ze strîte

und mit gewalte under in

unz vaste vür den âbent hin.

dô verstiezen s'an der vart,

alsô daz in der hirz entwart

17305

und sîne vluht hin wider genam,

von dannen er ouch dar kam,

hin dâ diu fossiure was.

al dar gevlôh er unde genas.

nu muote Marken sêre,

17310

die jegere michel mêre,

daz in zem hirze alsô geschach,

dô man in alse vremeden sach

beide an der varwe und an der mane.

si haeten alle unmuot davane.

17315

hie mite lâsen s'ir hunde wider

und liezen sich die naht dâ nider,

wan in was allen ruowe nôt.

nu haete ouch Tristan unde Îsôt

den tac allen wol vernomen

17320

den schal, der in den walt was komen

von gehürne und ouch von hunden

und dâhten an den stunden,

daz ez niuwan Marke waere.

des wart ir herze swaere.

17325

ir beider angest was iesâ,

si waeren ime vermaeret dâ.

Des anderen tages vruo

nu vuor der jegermeister zuo,

ê danne er kür daz morgenrôt.

17330

sînen undertânen er gebôt,

daz si dâ wol betageten

und danne nâch im jageten.

an ein leitseil er nam

einen bracken, der im rehte kam,

17335

und brâhte den reht ûf die vart.

der leite in allez hinewart

über manic ungeverte,

über velse und über herte,

über dürre und über gras,

17340

dâ ime der hirz des nahtes was

gestrichen unde gevlohen vor.

dem volgete er reht ûf dem spor,

biz daz diu enge ein ende nam

und diu sunne wol ûf kam.

17345

dô was er zer fontaine

ûf Tristandes plaine.

Des selben morgens was Tristan

und sîn gespil geslichen dan

bihanden gevangen

17350

und kâmen hin gegangen

vil vruo und in dem touwe

ûf die gebluoten ouwe

und ûf daz wunneclîche tal.

galander unde nahtegal

17355

die begunden organieren,

ir gesinde salûieren.

si gruozten ie genôte

Tristanden unde Îsôte.

diu wilden waltvogelîn

17360

hiezen si willekomen sîn

vil suoze in ir latîne.

mangem süezem vogelîne

dem wâren sî dâ willekomen.

si haeten sich alle an genomen

17365

eine wunneclîche unmuoze

den gelieben zwein ze gruoze:

si sungen von dem rîse

ir wunne bernde wîse

in maneger anderunge.

17370

dâ was manc süeziu zunge,

diu dâ schantoit und discantoit

ir schanzûne und ir refloit

den gelieben z'einer wunne.

si enpfie der küele brunne,

17375

der gegen ir ougen schône enspranc

und schôner in ir ôren clanc

und rûnende allez gegen in gie

und si mit sîner rûne enpfie.

er rûnete suoze

17380

den gelieben ze gruoze.

si gruozten ouch die linden

mit ir vil süezen winden.

die vröuten s'ûze und innen

an ôren unde an sinnen.

17385

der boume flôrîe,

diu liehte prâerîe,

die bluomen, daz ingrüene gras

und allez daz dâ blüende was,

daz lachete allez gegen in.

17390

ouch gruozte sî her unde hin

der tou mit sîner süeze,

der küelete in ir vüeze

und was ir herzen gemach.

und alse des genuoc geschach,

17395

si slîchen wider in ir stein

und wurden under in in ein,

wie sî der zît getaeten.

wan sî des angest haeten

und vorhten, alse ez ouch ergie,

17400

daz eteswer und eteswie

dar von den hunden kaeme,

ir tougen dâ vernaeme.

hier über vant Tristan einen sin.

dar an gevielen s'under in.

17405

si giengen an ir bette wider

und leiten sich dâ wider nider

von ein ander wol hin dan

reht alse man unde man,

niht alse man unde wîp.

17410

dâ lac lîp unde lîp

in vremeder gelegenheit.

ouch haete Tristan geleit

sîn swert bar enzwischen sî.

hin dan lac er, her dan lac sî.

17415

si lâgen sunder, ein und ein.

alsus entsliefen s'under in zwein.

Der jeger, von dem ich nu las,

der zuo dem brunnen komen was,

der spurte in dem touwe,

17420

dâ Tristan und sîn vrouwe

vor ime geslichen wâren hin.

hie mite sô kam er an den sin,

ez waere niwan des hirzes trat.

er erbeizete und trat ûf den pfat

17425

und volgete dem selben spor,

daz s'ime haeten getreten vor

biz hin an der fossiuren tür.

dâ giengen zwêne rigele vür.

ern mohte dâ niht vürbaz komen.

17430

nu ime der wec dâ was benomen,

er versuohte ez an die crumbe

und gienc alumbe und umbe

und vant von âventiure

obene an der fossiure

17435

ein tougenlîchez vensterlîn.

dâ luogete er mit vorhten în

und gesach zehant dar inne

daz gesinde der minne:

niwan ein wîp und einen man.

17440

die sach er ouch ze wunder an.

wan in dûhte an dem wîbe,

daz nie von wîbes lîbe

kein crêatiure als ûz erkorn

ze dirre werlde würde geborn.

17445

iedoch sach er unlange dar.

wan iesâ dô er wart gewar,

daz daz swert sô bar dâ lac,

er tete sich dannen unde erschrac.

ez dûhte in angestbaere.

17450

er dâhte, daz ez waere

etswaz von wilden dingen.

diz begunde im vorhte bringen.

er kêrte den vels wider nider

und reit hin gegen den hunden wider.

17455

Nu haete sich ouch Marke

vor den jegeren starke

ûf sîner verte vür genomen

und was îlende ûf in komen.

«seht» sprach der wildenaere

17460

«künec hêrre, ich sage iu maere:

ich hân an disen stunden

schoene âventiure vunden.»

«sag an, waz âventiure?»

«eine minnen fossiure.»

17465

«wâ vünde dû die oder wie?»

«hêrre, in dirre wilde alhie.»

«in dirre wüesten wilde?» «jâ.»

«ist aber ieman lebender dâ?»

«jâ hêrre, dâ ist inne

17470

ein man und ein gotinne.

diu ligent an einem bette

und slâfent alse inwette.

der man ist alse ein ander man.

mîn zwîvel ist aber dar an,

17475

sîn geslâfe dâ bî

daz der ein mensche sî.

der ist schoener danne ein feine.

von vleische noch von beine

enkunde niht gewerden

17480

sô schoenes ûf der erden.

und ine weiz durch welhen sin,

ein swert daz lît dâ zwischen in

schoene unde lûter unde bar.»

der künic sprach: «wîse mich dar!»

17485

Der jegermeister vuorte in dan

die wilde wider ûf sîne ban

biz hin dâ er erbeizet was.

der künec erbeizete ûf daz gras

und streich ûf an sînen pfat.

17490

der jeger der habete an der stat.

nu Marke der kam hin zer tür.

er lie si stân und kêrte vür

und ûzen an dem steine

und an des steines cleine

17495

dâ nam er manege kêre

nâch des jegeres lêre

und vant ouch er ein vensterlîn.

er lie sîn ouge dar în

nâch liebe und nâch leide.

17500

diu sach er ouch dâ beide

in der cristallen ligen enbor

und sliefen dannoch als dâ vor.

er vant si, alse ouch jener vant,

wol von ein ander gewant,

17505

daz eine her, daz ander hin,

daz bare swert enzwischen in.

er erkante neven unde wîp.

sîn herze in ime und al sîn lîp

erkaltete vor leide

17510

und ouch vor liebe beide.

diu verre gelegenheit

diu was im liep unde leit.

liep meine ich von dem wâne,

si waeren valsches âne.

17515

leit meine ich, daz er sichs versach.

in sînem herzen er sprach:

«genaedeclîcher trehtîn,

waz mag an disen dingen sîn?

ist iht des under disen geschehen,

17520

des ich mich lange hân versehen,

wie ligent s'alsus danne?

wîp sol doch liebem manne

under armen z'allen zîten

cleben an der sîten.

17525

wie ligent dise gelieben sô?»

wider sich sô sprach er aber dô:

«ist noch an disen dingen iht?

weder ist hie schulde oder niht?»

hie mite was aber der zwîvel dâ.

17530

«schulde?» sprach er «triuwen jâ.»

«vschulde?» sprach er «triuwen nein.»

Diz treib er an mit disen zwein,

biz aber der wegelôse man

Marke zwîvelen began

17535

umbe ir zweier minne.

Minne diu süenaerinne

diu kam dâ zuo geslichen,

gestreichet unde gestrichen

ze wunderlîchem vlîze.

17540

si truoc ûf daz wîze

geverwet under ougen

daz guldîne lougen,

ir allerbeste varwe: nein.

daz wort daz lûhte unde schein

17545

dem künege in sîn herze.

der ander sîn smerze,

daz wort, daz ungenaeme jâ

dazn sach Marke niender dâ.

daz was mitalle hin getân,

17550

dane was zwîvel noch wân.

der minnen übergulde,

diu guldîne unschulde,

diu zôch im ougen unde sin

mit ir gespenstikeite hin,

17555

hin dâ der ôsterlîche tac

aller sîner vröude lac.

er schouwete ie genôte

sînes herzen wunne Îsôte,

diun gedûhtin ouch dâ vor und ê

17560

nie sô rehte schoene mê.

ine weiz von welher arbeit

diz maere spellet unde seit,

von der si erhitzet solte sîn,

und lûhte ir varwe unde ir schin

17565

als suoze und alse lôse

als ein gemischet rôse

hin ûf allez wider den man.

ir munt der viurete unde bran

rehte alse ein glüejender kol.

17570

jâ ich erkenne mich nu wol,

waz dirre arbeite was.

Îsôt was, alse ich iezuo las,

des morgens in dem touwe

geslichen zuo der ouwe

17575

und was dâ von enbrunnen.

sô gieng ouch von der sunnen

ein cleinez straemelîn dar în,

daz gleste ir ûf ir hiufelîn,

ûf ir kinne und ûf ir munt.

17580

zwô schoene haeten an der stunt

ein spil gemachet under in zwein.

dâ schein lieht unde lieht in ein.

Diu sunne und diu sunne

die haeten eine wunne

17585

und eine hôhzît dar geleit

Îsôte z'einer saelekeit:

ir kinne, ir munt, ir varwe, ir lîch

daz was sô rehte wunneclîch,

sô lieplîch und sô muotsam,

17590

daz ir Marken gezam.

in gelangete unde geluste,

daz er si gerne kuste.

Minne diu warf ir vlammen an,

Minne envlammete den man

17595

mit der schoene ir lîbes.

diu schoene des wîbes

diu spuon im sîne sinne

z'ir lîbe und z'ir minne.

sîn ouge stuont im allez dar.

17600

er nam vil inneclîche war,

wie schône ir ûz der waete schein

ir kele unde ir brustbein,

ir arme unde ir hende.

si haete âne gebende

17605

ein schapel ûfe von clê:

sine gedûhte ir hêrren nie mê

sô lustic und sô lustsam.

nu er der sunnen war genam,

diu von obene durch den stein

17610

ûf ir antlütze schein,

er vorhte, ez waere ir an ir lîch

schade unde schedelîch.

er nam gras, bluomen unde loup,

daz venster er dermite verschoup

17615

und bôt der schoenen sînen segen.

er bat ir got den guoten pflegen

und schiet er weinende dan.

alse ein trûreger man

kêrte er ze sînen hunden wider.

17620

er leite sîn gejegede nider.

er hiez an den stunden

die jegere mit den hunden

wider ze hûse kêren hin.

daz tete er aber durch den sin,

17625

daz nieman anders kaeme dar,

der ir dâ würde gewar.

Sô schiere was der künec niht dan,

Îsôt erwachete und Tristan.

nu sî begunden umbe sehen

17630

und nâch dem sunnen schîne spehen,

done schein diu sunne niht dar în

niwan durch zwei vensterlîn.

nu nâmen sî des dritten war

und alse in daz niht liehtes bar,

17635

des wunderte si sêre.

nune biten s'ouch nimêre.

si stuonden ûf beide under ein

und giengen ûzen an den stein.

loup unde bluomen unde gras,

17640

daz vor dem vensterlîne was,

daz selbe vunden s'ouch zehant.

ouch spurten sî zwei durch den sant

ûf der fossiure unde dervor

mannes trite und mannes spor

17645

beidiu dar unde dan.

dâ erschrâken si van

und ervorhten ez starke.

si dâhten sâ, daz Marke

eteswie waere komen dar

17650

und waere ir worden gewar.

der wân der was in vür geleit.

dekeine gewisheit

die enhaeten si dar an niht.

doch was ir meistiu zuoversiht,

17655

swer sî dâ haete vunden,

daz er si zuo den stunden

sô von ein ander gewant

und in der wîse ligende vant.