bibliotheca Augustana

<<< Übersicht <<< vorige Seite nächste Seite >>>

BIBLIOTHECA AUGUSTANA

Konrad der Pfaffe

um 1170

	Das Rolandslied Verse 1000 - 1999
______________________________________________________________________________

1000	uestent uweren glouben, dinet uwerem schephere. lat iu wesen ummere die gebe Marssilien: eruulte er dizze gebirge
1005	uon rotem golde, ich ne weiz waz iz mir solde uuore den ewigin lib. nu bedenchet uch in cît, des uirlihe der ware gotes sun,
1010	qui regnat in eternum.» Naimes uon Beieren der was der ratgeben eine, der aller hersten in deme houe, ein tugentlich herzoge.
1015	des leben was so lobesam so er dem keiser wole gezam zu allen sinen eren. der sprach zu deme herren: «du ich mich uon Beieren hup,
1020	du uuorte ich manigen helt guot. du irwelte ich uir tusent helde miner manne; die ne sint noch erslagen noch geuangen. si sint guote knechte; ze der marter uindet man si gerechte.
1025	uerhenget is uns min trechtin, so schult ir uile gewis sin daz wir û niemer geswichin, noch ze nicheiner noete entwichen. ich en ruoche umbe ir rede.
1030	waz maere ist mir Marssilien gebe? wir schoulen in daz ire lant, wir geuruomen blutigen rant, wir schuolen uol herten. mit den unseren guoten swerten.
1035	ich wirde gerne ellende an des meres ende. wir schuolen Machmeten uirtribin unde alle die mit ime blibin, Appollen sinin gesellen.
1040	die sich ze gote gehaben wellen, die entphahen wir mit grozen eren, geuallez minem herren. in sinem gnaden stat beidu wistum un[de] rat
1045	ze libe unde ze sele. sin gebot eruuolle ich iemir gerne.» Der kaiser geswigete uile stille. er marchte ir iegelihes willen. getruobet was sin gemuote,
1050	iedoch uertrugenz sine michile guote, daz er sich is nicht irzeigete. daz houbit er nidir neigete, daz sin niman innen wart. einer stille er dou bat,
1055	der biscoph s[an]c[t]e Iohannes. ze deme kaisere gerte er des uorlobes un[de] zu allen den herren die in deme houe waren. er sprach: «were iz in mines herren willen –
1060	uf sine gnade wil ich dingen –, so wolt ich uober Ualchart zuoe Almarie in de stat, chuonden daz gotes wort. ich ne uuorchte ne heinin ir tot:
1065	wolde got unde were ich is wert daz mich uûr oder swert geluoterete an deme libe, so were ich an zwiuil daz min got ruochte.»
1070	sine uenige er suochte zuo des keiseris uuozen. «ich wil gerne», sprach er, «buozen swaz ich wieder got han getan. ich hup mich uz in gotes namen;
1075	ich ne wil die uurech nicht chrump machen. maechte ich gotes dienestes icht geschaphen, den tuvel geschenden, ir muole un[de] ir olbenden en ruoche ich nicht mere
1080	wider der armen sele. die heiden bietent gwisse, zu sancte Michelis misse wellen si sich toufen; daz en schol in nieman glouben.
1085	diu toufe ist daz aller herist, daz solte sin daz aller erist, daz solte min herre an sehen un[de] solde ordinen ir leben: so wuochse die gotes lere.»
1090	du sprachen di zwelf herren, were iz in des kaiseres hulden, des rates wolten si gerne uolgen. Genelun uf spranc, er sprach: «die fuorsten haben alle undanc
1095	daz si edele unde uuíse sint. wie man die tumbistin uirnimt! die sint nu ze houe ratgeben. die wisen let man alle under wegen. die in wole tochten
1100	ze rate un[de] ze uechten, die sint nu gare uerchoren. war ist nu chomen die manechualtiu wisheit? dinen fuorsten ist iz allen leit
1105	daz du in dinen grozen wizzen uns alle lest sizzin. iz get uns an die ere. nu ne zimt nicht, lieber herre: din neue Roulant
1110	ouber ruofet uns alle samt. Naimes uone Beieren der chan in wole ze wege zeigen: du wir zu deme buorgetor drungen, du heten si die buorch gwunnen.
1115	daz zurnete Roulant daz er die Beier uor ime uant: helede uz erkorne, man sach si ie da uorne, swaz uns her noch geschach.
1120	da man sluc uoder stach, da waren ie die rechen mit ir scharphen ekken, so iz guoten knechten wole gezam. dar umbe wolter si erslan,
1125	were iz nicht under uaren. die getorsten ime wole gestaten: die Beire waren sine gate[n]. nu strebeter uober den Ualchart. mennisken bluotes en wart er nie sat
1130	un[de] ander sine gesellen. war ane uirsuochent si ir elle[n]? si heuen sich an die heiden: die ne wil ich niemmer geleidigen, wande si an got gehent
1135	unde der touphe ulizicliche gerent unde der cristinheite gehorsam sint: ze gisel bietent si ir kint. Roulant zestoret dir alle din ere, die zwelue ratent dir uil uobele, herre.»
1140	Vf spranc der helt Roulant, er sprach: «Marssilie het ouch ee here gesant uunfzehen grauen, die der touphe alle iahen. si swuren manigerslachte gebe,
1145	die noch hiute sint underwegen. dare widere sante min herre siner manne zwene: Marssilie hiez in die houbet abe slahe[n]. swer nu golt welle haben,
1150	der entphahe iz dar uobre. der rat geuellet mir uoble: man nimt iz ane gotes ere unde geruwet uns hernach uile sere.» Der keiser zurnte harte:
1155	mit gestreichtem barte, mit uf gewnden granen hiez er die phacht uure tragen. «ir stet mit unzuochten; daz wil ich», sprach er, «richten,
1160	wirdet is iuweht mere. tuot iz durch gotes ere un[de] gesamnet iuch einer rede, die uns der heilige ‹geist› gebe, daz wir des besten ramen.»
1165	si sprachen alle amen. Die Franchen gesament sich drate: mite gemeinem rate giengen si uf einen buohel gruone. der sunne schein wole schone.
1170	si riêten al umbe, ir iegelich besunder; da riet mannegelich mit grozen sorgen uuore sich daz in duchte daz beste.
1175	si besanden die geste: zu deme rate dvo chom uone Beieren der herzoge, Oigir uone Tenemarche, Dierrich der starche,
1180	Wido uone Wasconie Iuo uone Albonie, Gotefrit uone Aiuone, Ritschart uon Tortuone, Diebalt uon Remis,
1185	Heinrich uon Garmes, Turpin uon Raines, Milun uon Aschalbaíes, Oliuir unde Roulant un[de] Walthere der wigant,
1190	Gergirs un[de] Gergis un[de] der maere Anseis; Ansgir was da, Reimunt uone Brittannia. Genelun gestunt in almittin,
1195	die fuorsten begonde er bitten: «wole ir edele herren, ir tuot iz gote zeren; uobet uwer wisheit; gedenchet an die langen arbeit.
1200	ratet alle da zuo, daz min herre einweder tuo: neme dere heiden gedinge, uruome die boten hinnen, so iz der cristenheit gezeme,
1205	uersmahe nicht ir gebe, neme die gisel ze hant unde besezze daz lant, behuote sine buorge, habe ne heine sorge
1210	daz er si gewerliche uinde: Nables unde Morinde, Ualterne un[de] Pine, da beiten die sine. laze uns ze disen ziten
1215	zuo unseren kinden riten. uersume sich Marssilie, so heuen wir uns here widere, zestoeren al ire krapht; so ne muot uns die heidenscapht
1220	hinnen uuore nicht mere. daz rate ich minem herren.» Dou sprach der biscoph Turpin: «die rede uirbiete selbe min trechtin: so uuoren wir ane ende.
1225	min herre sol dare sende, waz die heiden wellen tuon, un[de] ratet alle da zu: irchieset û einen wisin man, der uns widere chuonne gesagen
1230	Marssilien gemuote: ich engetruwe ime neheiner guote. wil er werden cristin, daz uersuoche wir mit listin: wir muzzen in so uersazen,
1235	eê wir in urí lazzen, daz wir nine zwiuilin mere. daz rate ich minem herren.» alle di die rede uernamen, herzogen unde grauen,
1240	si sprachen, iz were daz aller beste. du kerten die not uesten widir zu des keiseres gesidele. si geleiten nidere den rat Genelunes:
1245	dannen bechorten si sit alle des todes. Die fuorsten baten alle den biscoph sante Iohannen daz er ze houe were ir uor redenaere.
1250	wole wessen si daz daz er deme kaiser lip was. er linte uober sine kruchen mit sinen grawen locken, er sprach: «grunt ueste der cristinheit,
1255	houbet unser arbeit, bluoet des heiligin glouben, nu scolt du mir irlouben in diner michilen suoze, daz ich reden muoze
1260	daz mir dine fuorsten geboten hant, also si hie uor dir stant.» Der kaiser in sinen wizzen die fuorsten hiez er sizzen. den biscof er ane sach,
1265	daz wort er smilende sprach: «si maechten einen stercheren man, dar zuo wole erwelt han. ir habet luoccele gerastet mit uenie ioch mit uaste,
1270	mit anderen guoten werchen. da muoze uch got ane gesterchen. ir schuolt habe ruowe, get zuo uwerme stuole. alse ir gesizzit danne,
1275	so redet al daz û geualle.» Do redete der biscof, daz horte aller der hof; er sprach: «chuninge un[de] herzogin sint mit rate zesamne chomen,
1280	biscoue unde grauen die in deme rate waren, du urumst die boten hinnen, un[de] ‹wil› Marssilie dingen, so sende dinen boten dare,
1285	der uns rechte eruare waz die heiden wellen tuon. selbe sich ouch du dar zuo: wele dir uz in allen der dir beste geualle,
1290	der durch sine guote daz riche behuote. er bedarf grozzer wisheit. min rede ne scol niemanne wesen leit. swen min herre sendet,
1295	ist daz er iz wole uerendet, so lonet ime min herre unde dinent iz die fuorsten alle gerne.» Vf spranc Roulant, uaste er dare uuore dranc;
1300	er sprach: «nu sende mich dare. min ouge ist also gewarre, sine muogen mich nit betriegen. wellent si uns ligen, si ne hilfit nehein ir list,
1305	ich en sage dir al daz dar ane ist.» der keiser wincte mit der hant: «swich du neue Roulant, des ‹ne habe› ne heinen gedanc: ich ne gesende dich dar iarlanc.»
1310	Uf spranc Oliuir, er sprach: «herre, nu erloube duz mir. ich wirue dine boteschaph so ich allerbeste mac durch des richis ere.
1315	ee ich widere chere, wil du mir sin getruwen, swie inner si runen, alles ir willen wirde ich schiere innen.»
1320	der kaiser sprach: «Oliuir, uile wole getruwe ich dir. nu habe michelen danc, siz widere an dinen banc. du bist mir ze allen eren uile lib;
1325	ze boten wil ich din nicht: du bist ze gaehe mit der rede, unde Ruolant min neue, mit zornlichen worten. daz ist mir ze uorchten:
1330	si stoerent groze ere. gewaehne dere rede nicht mere.» Vf stunt Turpin, er sprach: «herre nu la mich den boten sin. mit des heiligen geistes gebe
1335	wie ob ich etwaz da gerede? ich sage in die propheten, daz si uns uone gote lerten. ich chuonde in den heiligen Crist, – wie ob iz nuzze ist? –
1340	daz heilige ewangeliu[m]: wie macht du iemmir baz getun? ist ieman der si lerte, waz ob si sich bekerten? so chan ich dir daz ende iedoch wole gesagen,
1345	wie du dich, herre, scolt bewaren. die Franchen habent michel arbeite irliden, mit den heiden gestriten; si sint lange muode: la si mit ruowe.
1350	gebiutest duz herre, so uare ich uile gerne unde uersuoche iz mit deme ulizze, daz mirz nieman mach uerwizze.» Der Kaiser antwerte ime mit minnen:
1355	«wenne lest du die Kaerlinge handelin ir sache, unde lebe du mit gemache. waz hast du da mit cetuone? ganc zu dinem stuole,
1360	hoere iz also ein ander man, ich ne heize dich an den rat gan. gewaene is nicht mere Turpin, also liep dir mine hulde sin.» Uf spranc der helt Roulant,
1365	er sprach: «geuellet iz den fuorsten allen samt unde wil is min herre gestaten, so ist Genelun min stiefuater der aller turisten boten einer den ich in deme riche chan gezeigen.
1370	er ist wise unde chuone, redehaft genuoge; er ist ein helt lussam. wa uvnde me nu deheinin man der deme riche baz gezeme?
1375	er ist ein fuorste also maere, man en scol ins nicht erlazen.» die fuorsten, also si sazzen, uestenden alle under in, iz ne maechte nieman so wole sin,
1380	er gezeme wole deme romischeme uogete, sware er in sende wolde. Genelun erbleichte harte, hinze Roulante er warte; er sprach: «nu hat mich der herre Roulant
1385	uz disme riche uersant, daz ich unter den heiden irsterbe un[de] ime daz erbe werde. ach unde we geschehe dir! waz wizzest du mir?
1390	mit boesen geisten bist du gemuot. nu ist iz aller erist her uz erbluot daz du mir ie rite an den lib. din muoter ist min wib; min sun Baldewin
1395	scholde din bruoder sin. uergezzen hast du der truwen: iz scol dich uil sere geruwen, scol ich minen lib han, des du nu zu mir hast getan,
1400	iz wirt dir uile swere. du gehoerest nuwe maere. des gat mich ane michil not: in deme ellende lige ich ungerne tot.» Karl der riche
1405	der manete in gezogenliche: «Genelun, geswige min, la dise unrede sin. du bist ein wise herre: nune zurne nicht so sere.
1410	genc here naher mine botscaph zenphahen. uare urolichen hinnen, handele iz mit sinnen. erwiruest du deme riche dehein ere,
1415	al din chunne urouwit sichs iemmir mere.» Genelun werte sich gnuch. der kaiser bot ime ie den hantscuch. er tete die wuoluine blicke, er rief uile dicke:
1420	«ditze hast du Roulant getan: uoble muoz iz ime ergan un[de]de sinen zwelf gesellen: nu habent si allen ir willen.» Der kaiser ime aue zu sprach:
1425	«habe ne hein ungemach. uone grozeme rechte bist du mir liep. durch Roulanden †enuirste du nicht: diu botescapht ist min. nu la din ungebaren sin.»
1430	den hantscuch er ime aue reichte. Genelun erbleichte, er wart uile uoble geuare. die fuorsten warten alle dare. der kaiser beualch ime sinen stap;
1435	also er ime den hantscuch gab, er liezen nidir uallen. daz misseuiel in allen, daz man in dicke muose reichen. si sprachen, iz were ein uobil zeichi[n],
1440	daz ime ze aller eriste missegienge unde des kaiseris boteschapht unwirdecliche enphihe. Genelun uiel deme kaiser ze uuozen: «herre,» sprach er, «maechte ich noch geniezzen: din swester ist min wib,
1445	unde uirluse ich den lib, so nímt Roulant al min erbe zu siner hant; er uirstoezet dinir swester sun: waz maechte ein wib wider ime getuon?
1450	so muoz der luozele Baldewin iemmir mere weise sin. du ne gesehis mich niemmir mere.» den mantel warf er uf die erde. «Pasanzi unde Basilie
1455	dine choment noch nicht widere, den hiez er die houbet abe slahe[n]: ich muoz in den wissen tot uaren.» er begonde heize weinin. «ia muoz ich ouch,» sprach er, «scheidin
1460	uone deme aller schonistin wibe die ie dehein man gwan ze sinem libe. Roulant hat harte misseuaren, er zestoeret alle Yspaniam. iz chuomt noch die stunde,
1465	unde laet mich got gesunden, si geruwet der rat, den si uober mich geuruomt hant.» Roulant sprach do: «ich ne uuorchte nehein dro.
1470	taete míner rede ieman deheine ware, ich uuore ienoch uure iuch dare. mit den wisen sal man raten, mit den tumbin uechten; uwer wistum hat iz getan.
1475	er en durphet nehein angest han: mir ist min bruoder Baldewin so liep: sines erbes engere ich nít. miner muoter lieben scol ich gerne dienen.
1480	ich ne phlege nicht untruwen: so maechte den chaiser ruwen daz er mich gezogen hat un[de] nimt mich dicke an sinen rat: daz ime nicht gezeme,
1485	ob ich ein roubere were.» Karl der riche sprach gezougenliche: «ir irret iz allen disen tac, daz ich uuore unzuochte ne mac
1490	des richis ere ze uruomene: daz zimt fuorsten uoble. ich warne uch da bi: also liep u mine hulde si, so ne sumet uns nicht mere
1495	unde ne irret des richis ere.» er sprach zu Genelune: «bedenke dich helt ture. zorn ist nehein guot. nim widere mannes muot,
1500	habe nehein angest die wile du mich lebende weist. nim dizze insigel – brinch iz Marssilie – mit guldinin buchstaben.
1505	du macht ime zware sagen: wil er got eren, zu der cristinheit cheren, ich lihe ime halbe Yspaniam, wirdet er deme riche undertan,
1510	Roulande daz ander teil; so gebe in got saelde unde heil. also wis min zunge unde min munt unde gestaetige iz andere stunt mit giselen unde mit gebe.
1515	si daz er da widere icht rede, durch des richis ere tuo also ich dich lere: sage Marssilie, ich ne chere niemmir widere,
1520	éé ich Sarraguz zestoere unde in gebundin uuore uf einem esele hin ze Ache. da nim ich die rache: daz houbet heize ich ime abe slahen.
1525	sweder halp er sich welle haben, des macht du schiere innen werden. got lazze dich sine hulde erweruen. in gote du uare; nim uile wole ware,
1530	un[de] behuote dich diu gotes crapht un[de] helfe uns alliu himlischiu herscapht, daz wir got da geren unde die cristinheit gemeren. lieber geswige min,
1535	der heilige engel muoze din geuerte sin unde beleite dich her widere gesunt.» der kaiser chuste in sa zestunt. Dou sich die herren schieden, die traene dicke uielin
1540	uone Genelune, daz wort sprach er chume. da wart michil wouffin, weinin unde ruofin. siben hundert siner manne
1545	die waren gereit alle ze dinen ir herren, ob si bi ime scholden sterben. ia waren die herren alle mit phelle wole behangen
1550	mit golde ioch mit berelen. gestaine die uile edelen luchten sam die sterren wider abent: der iaspis unde der iachant, smaragde die gruonen,
1555	topazien die sconen, onichilus unde sardin: wie maechte iz da wuonnechlicher sin? in luchte dar obne chrisolite unde calcedonie,
1560	berillen die besten unde die guoten ametisten, sardonix unde sardius. die herren redetin alsus, daz die boten gezemen
1565	wole Karle deme maeren, deme romischen uogete. sine herschapht si wole lobeten. Der herzoge Genelun legite an sich einin roch harte zirlich
1570	uone guotem cyclade, mit golde uile wahe gesmelzet dar under diu tier al besunder. da woneten lichte uogele
1575	unden unde obne, si schinen sam der lichte tâc. umbe sinen hals lac ein bouch uile waehe; daz werc ‹was› seltsaene
1580	uzzer golde unde uzzer gimme. den sante ime ze minnen der kuonc uon den Britten. ia begurte in inmittin Mulagir daz beste sachs,
1585	so uober al Franchen en was sin turer nehein. uonem houbte do schein ein edel karuunchel: des tages was er tunchel,
1590	er luchte alle die nacht sam der sunne umbe mittin tach. iz enwart nie niehein keiser so here geboren an der erde, er enzeme ime wol cetragene.
1595	lanc ware û ze sagene waz man wunders dar ane uant. Naimes der Beiere wigant uuorte iz uone Beieren. daz urchunde wil ich û zeigen:
1600	der smit hiz Madelger, daz selbe swert worchte êr in der stat zu Regensburch: iz wart maere unde gout. du sin Naimes der herzoge phlach,
1605	waz der heiden da uore erstarph! er gab iz Karle sinem herren; iz rouwin sit sere: Genelun brachte iz inder heiden gwalt, uile manich cristin des sit engalt.
1610	Ist iz so daz buoch zalt, Genelun uuorte einin blialt uz golde gewebin. da machte man wole sehen die turen goltporten
1615	wahe geworchte; zobel was dar under, diu liste nidene umbe durch soten guldin; Genelun schwört Rache (P, fol. 21v) die schellen clungen uon ime
1620	sam daz suzze seit spile. andere wunder uuorte er uile. umbe spin man deme herzogin zwene guldine sporen. der kaiser hiz ime zeliebe
1625	ein march uuore ziehen: ein Romere hiz Mantel, ein helt chuone unde snel, der gab iz deme kaisere ze minnen. under al Karlingen
1630	was ne hein ros so gezale uber berch unde uober tale, swenne er dar uf gesaz, daz er ane angest was. dar uffe lach ein guldin satel.
1635	Karl was aller tuogende uater. Genelun geneich sinem herren; er sprach: «nu lone ime got manigir eren, minem herren lieben wil ich gerne dienen:
1640	er getet mir nie ne hein leit. die zwelue sint nu uile gemeit, die mich hine habent gegebin; unde geuristet mir got daz leben, ich bringe iz uz deme spile.
1645	ich gesezze in ein zile, so mir dirre min bart, si geruwet al dise houeuart.» Do saz der herzoge Genelun uf ein zire march, hiz Taskprun.
1650	uon den herbergen er reit. er was driellen breit eneben siner achsel; lanc was er gewachsen, groz sin gebeine.
1655	du sprachen die heiden, sine sehen in dirre werlte ne heinen so starchen lebenten. sin antlizze was hersam. sin uarwe di bran
1660	sam die lichten uûres flammen. siben hundert manne uolgeten ir herren; si wuoften alle sere. enurteile sazten si den lib,
1665	bediu kint unde wip durch ir truwe. si heten groze ruwe. Genelun neich deme kaisere schone. er kerte an eine wise gruone,
1670	er gedachte mit sinen mannen; diu rede was also lange: «dizze ist», sprach er, «ein herlich scare: ir birt alle zu deme tode wole gare. uwers guoten willen
1675	bin ich dicke wole worden innen, uwer dienest ist schoene. nu muoze û got lone unde ich iemir gerne gesculde: disu truwe ist uber gulde
1680	aller werlte ere, daz ir durch uweren herren birt gerecht unze an den tot. nu habt ir alle groze nôt. nu ist michel bezer, wizze Crist,
1685	nu iz uns dar zu kuomen ist, daz ich eine irsterbe denne ich uch alle laze uirlori[n] werde. nu ritet zu minem herren, da ne mag û nit gewerre.
1690	uirdienet umbe den kaiser daz der min arme weise, swie iz umbe mich irge, in sinem willen beste. min lieber sun Baldewin
1695	der scol iû wole beuolhen sin: ziht in u ze eren; zucht schuolt ir in leren. heizet in herlichen lebe: er mach wole mildeclichen gebe,
1700	habe willich sine man. an uweren gnaden scol iz stan, der sinen not uesten: so mag ime uoble gebresten. buwe denne wole sin lant,
1705	were roub unde brant, habe sin gerichte al nach der phachte, lazze nicht under wegen: got lazze in gesunt leben.
1710	Nu bitte ich ouh uch mere: uol staetiget uwer ere; ob ich da ze den heiden belibe, minem lieben wibe beuelhet mine sele.
1715	ratet ir ere. alles guotes wil ich ir wole getruwen. ia lazze ich ire wole erbuowen manige breite hube, scazes gnuoge.
1720	bringet ire ditze uingirlin: ruochte is min trechtin, ich gesehe si uile gerne; unde manet si uile uerre durch ire tugentliche site,
1725	daz si gute luote umbe mich bite nach dirre zwiuellichen wider chere. ia ne gesehe ich si leider nimmir mere.» Duo sich die gelieben uone ein ander geschieden,
1730	der iamer tet in uile we. weder sit noch éé endorfte nie grozzer chlage werden: si uielen zu der erden, daz har brachen si uon der swarte,
1735	si wuoften alle harte; ummaze was ir clage, groz was ir ungehabe. uil dicke si ime nach sahen, si begonde harte iameren.
1740	mit weinen unde mit wuoffen si begonden ime nach ruofen. si sprachen: «der ware got uon hiemele, der sende dich gesunt widere: so ne schach uns nie so libe.»
1745	uon ein ander si schieden: ia cherten sine helede widere an die selede, Genelun zun heiden. si waren unsanphte gescheiden.
1750	Genelun trurlichen reit, daz was den heiden uile leit. si huoben churzwile, si sageten ir fauelie; si sagten ein ander under wegen
1755	manige seltsene rede; si lachten unde waren uro. Genelun erbalte sich do; der alte Blanscandiz wart sin geware, er hub sich neben ime dare,
1760	er sprach: «enwaere iz dir, herre, nicht swaere, ich wolde dich ein luocele urage. ich enzwiuele dar ane nit, du bist deme kaisere uil liep: dir entwichent alle sine ratgeben,
1765	daz han ich selbe wole ersehen. swaz du gebiutest daz ist getan. du hast die herlichen man. nu wundert mich dinr grozin wisheit: war zuo lidest du die ummazen arbeit?
1770	nu habt ir betwungen Krichin unde Ungeren, Ruozzen unde Boelan, die gri[m]min Sachsen alsam, Beieren unde Swaben
1775	unde alle die in dutisker erde waren. Wasconie unde Engela[n]t stet in siner gwalt, Hyspanien unser riche dienet ime uorchtliche.
1780	wenne er sich is welle glouben? nu ist er dicke uerhowen unt ist chomen an sin alter; nu machte er sich noch behalten unde sconte siner wizze
1785	unde lieze uch da heime sizze, ob iz der fuorsten wille were. des wolte ich dich gerne urage.» Der herzoge do sprach: «iz enist mir nicht ungemach:
1790	iz ist ein uroude der heiligen kristinheit un[de] ist ein suozze arbeit, iz ist ein trost der sele: diu ne chumt niemmir mere zu neheinem helle wizze,
1795	swer ime dienet mit flizze. wenest du daz iz der kaiser tu? got uordirt iz ime zu: sinen boten uon himele sendet er zuo deme kuonige;
1800	der gebiutet ime die hereuart. so ne ist des nehein rat, wir enhelfen ime da zuo. ungewizzin ist iz dir nu: der warheit wirdist du wole innen,
1805	wilt du die kristinheit minnen. ich wil dir warlichen sage: deme kaiser ne mach nieman geschaden. Blanscandiz und Genelun (P, fol. 24r) got ist selbe mit ime, er git ime crapht unde sin
1810	unde sterchet in dazuo beidiu spate unde uruo. Karl ist der turiste man dannabe ich ie gehorte sagen: scaz ist ime ummaere,
1815	er uirsmehet lugenaere, er hazzet alle bosheit, er schaphet der sele gewareheit. den lib uuort er ueile uns allen ze heile.
1820	behalten wir die sele, er en gert alles mere.» Blanscandiz der alte uil listechlichen er sich erhalte: «du redest wole», sprach er, «herre.
1825	wir schuolen dir sin danchen uerre daz dir din herre liep ist unde daz du ime getruwe bist. scolde ich die wale han, so ne irchunte ich nie deheinin man
1830	der ich so gerne were. wie gerne ich in noch gesehe! er hat manige tugent guote, er hat herlich gemuote, er hat ein kuoninclich leben,
1835	er hat wise ratgebin: si behertent ime groze ere. nu sage mir ouch mere: waz meinet aue daz? duo unser rede wole uerendet was,
1840	duo chom Roulant, er hete einen aphel in siner hant, mit michiler hochuerte, mit geuaztem swerte. er sprach zuo deme edelen chunige:
1845	`herre laz uns dar uobre hin ze Marssilien: ich gelege in da nidere. alle irdische krone geweltige ich dir ze Rome.
1850	sie muozen dine man werden, oder under diseme guoten swerte ersterben.» wer hilfet ime dar zuo? oder waz mag er getuon? sine krapht wesse ich gerne.
1855	nu ne zuorne nicht mere, lieber herre, daz ich dich sin geuraget han. ich bin leider ein alt uirwizzer man.» Genelun duo sprach: «wir haben groz ungemach
1860	uon Roulante unde uon Oliuir. zware sag ich iz dir: si sint des muotes, sine gesatent sich niemmir menneschen bluotes. die zwelue helfent in alle dar zuo,
1865	swaz si zwene wellent tuon, unde alle Kaerlinge habe[n]t zu in minne, alte unde junge. si phlegent grozzer zerunge,
1870	si dront deme kuonige uon Babilonie: so si den erslahent da, so uarent si hinze Persia, dannen ze Luuín:
1875	daz muoz allez unter in sin. si habent iz nu geteilet. wie ob iz got so gescheidet, die sich da zesamme habent gesellet, daz ir hochuart ‹wurde› geuellet,
1880	so uroute sich min sele, unde maechtet ir iemirmere ‹mit uride› Hyspaniam buowen, unde woldit ir ‹mir› dar zu getruwen, ich geriete iu eine list,
1885	daz iz in uil churzer urist naeme boese ende. si muosen in dem ellende uulen unde ersti[n]chen; des en darf mich nieman uerdenchen,
1890	des gat mich ane groz not: mine man ligent hie tot, so muozen da heime die kint lange weinen. uon du sage ich iu, wizze Krist,
1895	daz iz michel bezzer ist daz die zwelue ersterben, denne wir alle uuore werden.» Duo eruruote sich der alte, daz herze in ime spilte.
1900	er iteniute sich ander stunt: daz alt[er] cherte sich in die íugent, er rechuchte sich rechte uzzen unde innen: sin ros liz er springin, er ulouch mit den geberen
1905	sam der guote muozzere. er neich ime unz an den satelbogen, er sprach: «daz ich daz wort uon dir han uernomen, daz diene ich iemir gerne. du unde min herre
1910	werdet gesellen guote, unde ist is dir also zemuote, so scolt du gebieten in lande ioh in dieten uober al mines herren riche,
1915	daz wir dir niemmir ‹geswichen› an deheinen dinen sachen.» der herzoge begonde suzze lachen. Blanscandiz wincte sinen gnozzen: ze samne si gesazzen
1920	under einem oeleboume; si rieten mit Genelune den aller wirsisten rat der under disem himele ie geuruomt wart. Genelun geriet michel not,
1925	den armen Iudas er gebildot: du unser herre zemerde gesaz unde er mit ime tranc unde az, in den truwen er in uerriet widir die meintaetige diet;
1930	er uerchophte in mit gedinge umbe drizzic phenninge: daz ime sit uil uoble irgienc, wander sich selben erhienc. des en was alles nehein rat,
1935	iz was lange uore gewissaget. unde uerchophte Judas in eini[n], Genelun uerchouphte widir die heidin mit ungetruwen listen manigen herlichen kristen.
1940	mit gedinge man wac den schaz den man ime dar umbe gab, des goldes einen uil michelin last. wie starche die untruwe uz prast! In deme rate sazzen
1945	ungetruwe husgnozze; si rieten also lange uone manne ze manne, unze si alle samt swouren daz si Roulanden sluogen,
1950	Oliuiren den snellen unde andere ir gesellen mit Genelunes uol leiste, wande in sineme geiste was ne hein truwe:
1955	uon ime chom michel ruwe. er iruolte daz altsprochene wort; ia ist gescrieben dort: «under sconem schade luzet, iz en ist nicht allez golt daz da glizzit.»
1960	Genelun was michel unde lussam, er muse sine nature began. michels boumes schone machet dicke hoene: er dunchet uzzen gruone,
1965	so ist er innen duorre; so man in nieder meizzet, so ist er wuormbeizech, er ist innen uuol unde uoble getan. daz bezeichenet den man
1970	der uzen wole redet unde ualsches in deme herzen phleget. er dunchet uzen uol, sin muot ist innen hol: den hat der wurm gehechet.
1975	swer der truwin gesmechet, der huotet ir iemmir gerne; die muoze wir uon deme heiligin geiste lerne. Genelun saz mittin under in, der tuvil gab ime den sin:
1980	durch nít unde durch gebe er geuestente sine rede. si wonten da allen einen tach. Genelun sine truwe dare gab: er geuuogte in ze handen
1985	den helt Roulanden unde andere sine genozze, des swur er eide grozze, unde Oliuiren den snellen unde andir ir gesellen:
1990	daz si der neheinen genesin liezen, uil state si ime daz gehiezen. Der rat der was getan, sich urouten Marssilien man. si chomen ze den stunden
1995	da si den chuoninc uundin. du sprach Blanscandiz der alte: «daz dich, herre, gehalte Machmet un[de] Appollo unde gebe dir den uollen

<<< Übersicht <<< vorige Seite nächste Seite >>>

Das Rolandslied

Verse 1000 - 1999

1000

uestent uweren glouben,

dinet uwerem schephere.

lat iu wesen ummere

die gebe Marssilien:

eruulte er dizze gebirge

1005

uon rotem golde,

ich ne weiz waz iz mir solde

uuore den ewigin lib.

nu bedenchet uch in cît,

des uirlihe der ware gotes sun,

1010

qui regnat in eternum.»

Naimes uon Beieren

der was der ratgeben eine,

der aller hersten in deme houe,

ein tugentlich herzoge.

1015

des leben was so lobesam

so er dem keiser wole gezam

zu allen sinen eren.

der sprach zu deme herren:

«du ich mich uon Beieren hup,

1020

du uuorte ich manigen helt guot.

du irwelte ich uir tusent helde miner manne;

die ne sint noch erslagen noch geuangen.

si sint guote knechte;

ze der marter uindet man si gerechte.

1025

uerhenget is uns min trechtin,

so schult ir uile gewis sin

daz wir û niemer geswichin,

noch ze nicheiner noete entwichen.

ich en ruoche umbe ir rede.

1030

waz maere ist mir Marssilien gebe?

wir schoulen in daz ire lant,

wir geuruomen blutigen rant,

wir schuolen uol herten.

mit den unseren guoten swerten.

1035

ich wirde gerne ellende

an des meres ende.

wir schuolen Machmeten uirtribin

unde alle die mit ime blibin,

Appollen sinin gesellen.

1040

die sich ze gote gehaben wellen,

die entphahen wir mit grozen eren,

geuallez minem herren.

in sinem gnaden stat

beidu wistum un[de] rat

1045

ze libe unde ze sele.

sin gebot eruuolle ich iemir gerne.»

Der kaiser geswigete uile stille.

er marchte ir iegelihes willen.

getruobet was sin gemuote,

1050

iedoch uertrugenz sine michile guote,

daz er sich is nicht irzeigete.

daz houbit er nidir neigete,

daz sin niman innen wart.

einer stille er dou bat,

1055

der biscoph s[an]c[t]e Iohannes.

ze deme kaisere gerte er des uorlobes

un[de] zu allen den herren

die in deme houe waren.

er sprach: «were iz in mines herren willen –

1060

uf sine gnade wil ich dingen –,

so wolt ich uober Ualchart

zuoe Almarie in de stat,

chuonden daz gotes wort.

ich ne uuorchte ne heinin ir tot: