Heliand

Fitte LXIII

______________________________________________________________________________

5245

Sô uurôgdun ina mid uuordun| uuerod Iudeono

thurh hôtean hugi.| Thô the heritogo,

slî{d}môdig man| seggian gihôrde,

fan huilicumu kunnie [uuas]| Krist afôdid,

manno the bezto:| he uuas fan theru mârean thiadu,

5250

the [gôdo] fan [Galilealande;]| thar uuas gumscepi

e{d}iliero manno;| Erodes biheld [thar]

craftagne kuningdôm,| sô ina imu the kêsur [fargaf],

the rîkeo fan Rûmu,| that he thar rehto gehuilic

gefrumidi undar themu folke| endi fri{d}u lêsti,

5255

dômos adêldi.| He uuas ôk an themu dage sel{b}o

an Hierusalem| mid is gumscepi,

mid is uuerode [at] themu uuîhe:| sô uuas iro uuîse than,

that sie thar [thia hêlagun tîd| haldan] scoldun,

pascha Iudeono.| Pilatus gibôd thô,

5260

that thena hafton man| heli{d}os nâmin

sô gibundanan,| that barn godes,

[hêt] that sie ina Erodese,| erlos brâhtin

haften te handun,| huand he fan is heriscepi uuas,

fan is uuerodes geuuald.| Uuîgand frumidun

5265

iro hêrron uuord:| hêlagne Krist

fôrdun an fiteriun| for thena folctogun,

allaro barno bezt,| thero the io giboren uur{d}i

an liudio lioht;| an li{d}ubendiun geng,

antat sie ina brâhtun,| thar he an is benkia sat,

5270

cuning Erodes:| umbihuarf ina craft uuero,

[uulanke uuîgandos]:| uuas im uuilleo mikil,

that [sie] thar [sel{b}on] Crist| gisehan môstin:

uuândun that he im sum têkan thar| tôgean scoldi,

mâri endi mahtig,| sô he managun dede

5275

thurh is godcundi| Iudeo liudeon.

Frâgoda ina thuo thie folccuning| firiuuitlîco

managon uuordon,| uuolda is muodse{b}on

for{d} undarfindan,| huat hie te frumu mohti

mannon gimarcon.| Than stuod mahtig Crist,

5280

thagoda endi tholoda:| ne uuolda them thiedcuninge,

Erodese ne is erlon| antsuôr ge{b}an

uuordo nigênon.| Than stuod thiu uurê{d}a thiod,

Iudeo liudi| endi thena godes suno

uuurrun endi uuruogdun,| anthat im uuar{d} thie uueroldcuning

5285

an is huge huoti| endi all is heriscipi,

farmuonstun ina an iro muode:| ne antkendun maht godes,

himiliscan hêrron,| ac uuas im iro hugi thiustri,

baluuues giblandan.| Barn drohtines

iro [uurê{d}un] uuerc,| uuord endi dâdi

5290

thuru ômuodi| all githoloda,

sô huat sô sia im tionono [thuo]| tuogian uuoldun.

Sia hietun im thuo te hoske| huît giuuâdi

umbi is li{d}i leggian,| thiu mêr hie uur{d}i them liudion thar,

[iungron] te gamne.| Iudeon faganodun,

5295

thuo sia ina te hosce| hebbian gisâhun,

erlos o{b}armuoda.| Thuo senda ina eft thanan

Erodes se cuning| an that ô{d}er folc;

[alêdian] hiet ina lungra mann,| endi lastar sprâcun,

[felgidun] im firinuuord,| thar hie an feteron geng

5300

bihlagan mid hoscu:| ni uuas im hugi tuîfli,

ne{b}a hie it thuru ôdmuodi| all githoloda;

ne uuelda iro u{b}ilun uuord| [iduglônon],

hosc endi harmquidi.| Thuo brâhtun sia ina eft an that hûs innan,

an thia palencea uppan,| thar Pilatus uuas

5305

an thero thingstedi.| Thegnos agâ{b}un

barno that besta| [banon] te handon

sundilôsian,| sô hie sel{b}o gicôs:

uuelda manno barn| [mor{d}es] atuomian,

nerian af nôdi.| Stuodun nî{d}huata,

5310

Iudeon far them gastselie:| habdun sia [gramono] barn,

thia scola farscundid,| that sia ne bescri{b}un iouuiht

grimmera dâdio.| Thuo giuuêt im gangan tharod

thegan kêsures| uui{d} thia thiod sprecan,

hard heritogo:| «huat, gi mi thesan haftan mann», quathie,

5315

«an thesan seli sendun| endi sel{b}on anbudun,

that hie iuuues uuerodes sô filo| auuerdit habdi,

farlêdid mid is lêron.| Nu ik mid theson liudon ni mag,

findan mid thius folku,| that hie is ferahes sî

furi thesaro scolu sculdig.| Scîn uuas that hiudu:

5320

Erodes mohta,| thie iuuuan êo bican,

iuuuaro liudo landreht,| hie ni mahta is lî{b}es gifrêson,

that hie hier thuru êniga sundia te dage| sueltan scoldi,

lîf farlâtan.| Nu uuilliu ik ina for theson liudion hier

githrôon mid thingon,| thrîstion uuordun,

5325

buotian im is briosthugi,| lâtan ina brûcan for{d}

ferahes [mid] firion.»| Folc Iudeono

hreopun thuo alla samad| hlûdero stemnu,

hietun flîtlîco| ferahes âhtian

Crist mid qualmu| endi an crûci slahan,

5330

uuêgian te uuundron:| «hie mid is uuordon ha{b}it

dô{d}es gisculdid:| sagit that hie drohtin sî,

gegnungo godes suno.| That hie ageldan scal,

inuuidsprâca,| sô is an ûson êuue giscri{b}an,

that man sulica firinquidi| ferahu côpo.»