Heliand

Fitte XX

______________________________________________________________________________

Ne sculun gi ênigumu manne| unrehtes uuiht,

der{b}ies adêlean,| huuand the dôm eft cumid

o{b}ar thana sel{b}on man,| thar [it] im te sorgon scal,

uuer{d}an them te uuîtea,| the hîr mid is uuordun gesprikid

1695

unreht ô{d}rum.| Neo that iuuuar ênig ne dua

gumono an thesom gardon| geldes ettho côpes,

that hi unreht gimet| ô{d}rumu manne

mênful maco,| huuand it simbla môtean scal

erlo gehuuilicomu,| [sulic sô he] it ô{d}rumu gedôd,

1700

sô cumid it [imu] eft tegegnes,| thar he gerno ne uuili

gesehan is sundeon.| Ôc scal ic iu seggean noh,

huuar gi iu uuardon sculun| [uuîteo] mêsta,

mênuuerc manag:| te huuî scalt thu ênigan man besprekan,

brô{d}ar thînan,| that thu undar is brâhon gesehas

1705

halm an is ôgon,| endi gehuggean ni uuili

thana suâran balcon,| the thu an thînoro siuni ha{b}as,

hard [trio] endi he{b}ig.| Lât thi that an thînan hugi fallan,

huuô thu thana êrist alôseas:| than skînid thi lioht beforan,

ôgun uuer{d}ad [thi] geoponot;| than maht thu aftar thiu

1710

suâses mannes gesiun| sî{d}or gebôtean,

gehêlean an is hô{b}de.| Sô mag that [an] is hugi mêra

an thesoro middilgard| manno gehuuilicumu,

uuesan an thesoro uueroldi,| that hi hîr uuammas geduot,

than hi [ahtogea]| ô{d}res mannes

1715

saca endi sundea,| endi ha{b}ad im sel{b}o mêr

firinuuerco gefrumid.| Ef he uuili is fruma lêstean,

than scal hi ina sel{b}on êr| sundeono [atômean],

[lê{d}uuerco] lôson:| sî{d}or mag hi mid is lêrun uuer{d}an

heli{d}un te helpu,| sî{d}or hi ina hluttran uuêt,

1720

sundeono sicoran.| Ne sculun gi suînum teforan

iuuua meregrîton macon| ettho mê{d}mo gestriuni,

hêlag halsmeni,| huuand siu it an horu spurnat,

[suluuiad an] sande:| ne uuitun sû{b}reas geskê{d},

[fagaroro] fratoo.| Sulic sint hîr folc manag,

1725

the iuuua hêlag uuord| hôrean ne uuillead,

fulgangan godes lêrun:| ne uuitun gôdes geskê{d},

ac sind im [lâri] uuord| leo{b}oron mikilu,

umbithar{b}i thing,| thanna theotgodes

uuerc endi [uuilleo].| Ne sind sie uuir{d}ige than,

1730

that sie gehôrean iuuua hêlag uuord,| ef sie is ne uuillead an iro hugi thenkean,

ne lînon ne lêstean.| Them ni seggean gi [iuuuoro] lêron uuiht,

that gi [thea] sprâca godes| endi spel [managu]

ne [farleosan] an them liudiun,| [thea] thar ne [uuillean] gilô{b}ean tô,

uuâroro uuordo.| Ôc sculun gi iu uuardon filu

1735

listiun undar thesun liudiun,| thar gi aftar thesumu lande farad,

that iu thea luggeon ne mugin| [lêron] besuîcan

ni mid uuordun ni mid uuercun.| Sie cumad an sulicom geuuâdeon te iu,

fagoron fratoon:| thoh hebbead sie fêcnan hugi:

thea mugun [gi] sân antkennean,| sô gi sie cuman gesead:

1740

sie sprecad uuîslîc uuord,| thoh iro uuerc ne dugin,

thero thegno gethâhti.| Huuand gi uuitun, that eo an thorniun ne sculun

uuînberi uuesan| eftha uuelon eouuiht,

fagororo fruhteo,| nec ôc fîgun ne lesad

heli{d}os an hiopon.| That mugun gi undarhuggean uuel,

1745

that eo the u{b}ilo bôm,| thar he an er{d}u stâd,

gôden uuastum ne gi{b}id,| nec it [ôc] god ni gescôp,

that the gôdo bôm| gumono barnun

bâri bittres uuiht,| ac cumid fan alloro bâmo gehuilicumu

sulic uuastom te thesero uueroldi,| sô im fan is uurteon gedregid,

1750

ettha berht ettha bittar.| [That] mênid thoh breosthugi,

managoro môdse{b}on| manno cunnies,

huuô alloro erlo gehuilic| ôgit sel{b}o,

meldod mid is mû{d}u,| huilican he môd ha{b}ad,

hugi umbi is herte:| thes ni mag he farhelan eouuiht,

1755

ac [cumit] fan them u{b}ilan man| inuuidrâdos,

[bittara] balusprâca,| sulic sô hi an is breostun ha{b}ad

geheftid umbi is herte:| simbla is hugi cû{d}id,

is uuilleon mid is uuordun,| endi [farad] is uuerc aftar thiu.

Sô [cumit] fan themu gôdan manne| glau anduuordi,

1760

uuîslîc [fan] is geuuittea,| that hi simbla mid is uuordu gesprikid,

man mid is mî{d}u| sulic, sô he an is môde ha{b}ad

hord umbi is herte.| Thanan cumad thea hêlagan lêra,

suuî{d}o uunsam uuord,| endi sculun is uuerc aftar thiu

[theodu] gethîhan,| thegnun managun

1765

uuer{d}an te uuilleon,| al sô it uualdand self

gôdun mannun fargi{b}id,| god alomahtig,

himilisc hêrro,| huand sie âno is helpa ni mugun

ne mid uuordun ne mid uuercun| uuiht athengean

gôdes an thesun gardun.| Bethiu sculun gumono barn

1770

an is ênes craft| alle gilô{b}ean.