L'Avision de Christine

La tierce partie

__________________________________________________

XXV

Ci dit comment selon les dis de sainte escripture

prosperite mondaine ne fait a priser

Et au propos encore que dieux ait en reprobacion les mauvais riches et que les simples ne se dotent esmerveillier se il leur sueffre avoir des biens temporeulx et consent que les bons soient persecutez Retournons aux saintes escriptures. Car de ce dit bede sur lepistre saint Jaques ne soies dist il point indignes se les mauvais florissent en ce monde/ Et vous serfs de dieu avez a souffrir. Car ce nest pas de crestienne religion estre exauciez en ce monde mais estre abaissez/ et deprimez/ les mauvais nont riens ou ciel ne vous riens en ce monde/ Et pour ce en esperance du bien ou vous tendez/ quelquechose que il vous aviengne en la voye de ceste vie vous en devez esiouir/ Et ce tesmoigne saint gregoire en la xle. omelie sur les euvangiles qui dit ainsi, cellui que dieu het il lui seufre avoir prosperite en ce monde. Et aussi retient il cellui que il aime soubz le frain de tribulacion/ Et de ce monstra bien exemple mon seigneur saint ambroise quant une fois aloit par le pais/ Et se volt logier pour la nuit en un hostel/ si appella loste/ Et ainsi comme il avoit de coustume lui demanda de sa fortune/ le quel lui respondi que toute sa vie avoit floury en honneurs/ et habonde en richeces ne oncques nestoit decheu/ ne en adversite maladie ne autre desplaisir mais tousiours lui estoient venus ses choses a souhaid Adonc ces choses ouyes saint ambroise sen parti/ et logier ne si voult/ combien que il fust nuyt/ Et dist que continuee succession de temporelle prosperite nest mie signe de estre ame ne esleu de dieu. Ains est signe de pardurable dampnacion

Viengne avant seneque et die a notre propos son dit voy le cy en la .xx. .iii. .viie. de ses epistres/ se tu veulz avoir dist il la vraye extimacion de lomme et savoir quel ou quant grant il est regardes le tout nu/ ostes son patrimoine oste ses honneurs et les autres menconges de fortune/ et le regardes se tu peus non pas ou corps mais ou courage et la verras tu quel et com grant il est/ la saras tu se il est grant du sien ou de lautruy.