L'Avision de Christine

La tierce partie

__________________________________________________

XXVI

Conclusion des choses sus

dites et ancore de ce

Navons nous assez prove quen richeces et honneurs mondains nest pas felicite/ doncques nous convient tendre a la trouver mais comme en ce monde ne peut estre trouvee/ encore trayant a notre propos dire nous en convient/ si appert assez estre vray ce que dit bouece/ les choses nont pas honneurs selon elles mais selon lextimacion et opinion des gens et qui le doivent et restent comme il leur plaist/ Et doncques puis que iniustement se pevent tieulx honneurs donner Je conclus que elles sont viles. O doncques vaine gloire ce dist il respandne en multitude de gens tu nes autre chose fors enfleure doreilles. Car on voit souvent louer par fausse opinion de pueple ceulz qui nont mie en eulx le bien que on y dit/ Et ce ne puet estre sanz leur grant honte quant ilz sentent que ce leur fault dont ilz sont louez/ Et sil est ainsi que preudome doie estre louez pour sa vertu qui lui chault quant il ne quiert pas la faveur du peuple/ mais la bonte de sa conscience/ Et se on tient belle chose avoir renommee/ Aussi doit on tenir a laide qui ne la

Que diray ie dist il/ des delices du corps/ quant on les quiert ilz donnent grant travail/ quant on les a tournent a anui quant on les a eues ilz engendrent enfermetez/ Et telle est la paie de ceulz qui leur fin y mettent

Or est doncques ainsi ce dist il/ que richeces honneurs reaumes seigneuries forces beautez et poissances ne donnent pas felicite car riens digne nest destre appelle felix comme dit est devant sil nest perpetuel/ et comme telles choses ne soient nest pas cellui felix qui les a. Mais voy ci quil dist apres veulx tu savoir dist il la vray felicite qui repaist lame et donne souffisance or tourne ta face dautre part si verras celle qui donne poissance gloire renommee et delitt tout ensemble/ ce est dieu autre chose ne lest sicomme ou dit livre de bouece je prouvay par sa bouche/ et les fleurs dycellui je ay cueillies et appliquees yci a ton propos pour faire dune sorte un gracieux chapel avec les ditz des sains docteurs pour ton livre a la fin comme victorieux couronner/ Or viengnent les choses de la saintte escripture avec noz violetes/ Et frapons encore contre les arogans du monde/ Tu sces dit saint augustin qui tant aimes le monde pour quel loyer guerriez vous/ nest ce pas vostre plus grant esperance que vous puissiez estre amis du monde/ helas et quel bien est cestui auquel ne puet venir fors par grans inconveniens/ homme homme laisses perir toutes ces vanitez/ et te convertis a la seule inquisicion qui a gloire et na fin/ Et qui est ce/ ce est seul dieu

helas ce dist il encore en une epistre/ ce monde plus est perilleux quant il se monstre souef/ que quant il se monstre moleste et plus a eschiver quant plus attrait a soy amer

De ce meismes encore dit sur lepistre saint jehan le monde dist il est plein de tribulacions. Et voy cy comment chascun laime que seroit ce sil estoit paisible/ Sil estoit bel comment ty appuyeroies tu quant si lait/ et tant conturbeis si fort lembraces/ et quant des espines ne pues retraire ta main. bien cueilliroies des flours se elles y estoient.

Ad ce propos dit saint gregoire en une omelie/ voy ci le monde dist il qui est en soy tout sec/ et toute voies florist il en noz cuers par tout mort/ par tout plein de plour/ et par tout en desolacion/ nous sommes de tous costez ferus, nous sommes de tous les remplis damertume/ et toute voyes de nostre aveugle pensee charnele et concupiscence nous aimons ces amertumes nous les suivons fuiant/ nous nous appuions a lui trebuschant/ Et pourtant que il trebuche nous ne nous povons tenir avec lui sanz trebuchier

Mais dit sans bernart en un sermon a qui Jhesucrist prent a sembler doulz cest neccessite que lui semble le monde amer Encontre/ dist il sur cantiques/ ce monde est tout plein despines Ilz sont en terre riz sont en ta char/ et converser entre ces espines et ny estre point blecie/ cest la vertu divine/ et non pas de nostre fragilite. Mais de ce dist saint gregoire es morales ou .xxiiie. a ses esleves qui vont a lui nostre seigneur a fait le chemin aspre a celle fin que tant ne leur plaise le repos de ceste vie en forme de la doulceur du chemin que ilz ne se delictent plus a cheminer longuement que a tost venir au terme de leur repos/ Et que tant ne leur plaise la voie que ilz en oublient leur propre pais. cest le ciel

Mais voy ci quil dit apres/ les cuers dist il des esleus qui attendent les ioyes de paradis. prenent cuer et force es adversitez. Car de tant que croist plus la bataille de tant attendent ilz plus glorieuse victoire/ les desirs des esleus si proffitent tant que ilz sont ainsi affermez es tribulacions comme le feu ardent que le vent rabat la flamme et toutevoye le fait plus croistre/ Et combien quil semble que estaindre le doye il lenforcist.