L'Avision de Christine

La seconde partie

__________________________________________________

XXI

La fin de loroison

de lombre

Que dis tu souffist il tay-je assez conte du fait de mes poissances desquelles ne pourroies en ta vie comme autre fois tay dit tous les exemples ouir/ tant en ya et si divers sont/ scez tu encore qui je suis/ Et moy a elle dame cognoistre vous* cuidasse mais les raisons contradittoires que me narrez vaciller me font/ en vostre cognoiscence. Car se bien entendu lay Tres au premier me deistes que la ou verite est attainte ne povez arrester/ Et toutevoye bien scay et suis certaine que en maint cas mavez pure verite yci endroit clarifiee si ne scay entendre comment ce puist estre/ que chose doubteuse tesmoing puisse estre de verite pure/ et elle a moy Fille euvre le sens de ton entendement et escoutes et nottes. Car ie te promet que quoy quautre fois en divers cas te fusse menterresse en cestui cy tay ie dit voir se bi lentens et ne me contredis sil te recorde de ce quay dit Cest assavoir/ que cause suis moyenant estude et entendement de faire attaindre les choses vraies/ mais bien est vray que aussitost quataintes sont je me depars de cellui cas ne plus ny arreste/ Et quil soit voir ainsi las esprouve Car non obstant que ces choses taye dittes non pas moy les tay certefiees mes les ses par le moyen destude qui raporte la a ton entendement lequel par raison est certain qui ainsi soit pour ce en ce cas de toy me partiray et en lieu te remendra certainete/ Et par plus gros exemple ne te souvient il de moy et de ma cognoiscence par les divers cas que ie tay fait mettre en termes et faire pluseurs lectures

Ne fus ie celle qui mist le debat entre les clers disciples de maistre Jehan de meun comme il si appellent Et toy sur la compillacion du romant de la rose du quel entre vous contradittoirement escripsistes lun a lautre/ chascune partie soustenant ses raisons/ Sicomme il appert par le livret qui en fu fait.