L'Avision de Christine

La seconde partie

__________________________________________________

XX

Ce que lombre disoit

des gens darmes

Et ceulz qui donnent gage pour aoultrance en champ de bataille combatre sus aucune querelle soit droit ou tort je te promet sont en tel cas par moy deceus. Car vers dieu mesprennent et pechent grandement/ et te diray comment: combatre en champ est contre droit divin qui est de dieu et de saintte escripture contre le droit des gens/ le civil/ le decret/ et contre droit canon et cellui qui laccepte pareillement peche/ la cause est/ qua dieu miracle ne chose contre nature on ne doit demander comme tel chose faire soit une maniere de tempter dieu esperant il aidera au droit/ si ne doit estre quise de la voulente de dieu experience/ Et que ceste expreuve soit fausse on a veu maintes fois que cellui qui droit avoit estoit vaincus. Sicomme une decretale raconte de .ii. freres qui furent restes dun crisme/ et comme ilz fussent de celle cause vaincus en champ tout ne fussent ilz mie coulpables Apres la verite fut* sceue par la confession mesmes de ceulz qui le delit commis avoient. Et pareillement de pluseurs a este prove/ la loy deffendi que telles preuves non droitturieres plus ne fussent en usage

Item iuges sont establis pour cognoistre des causes et faire droit et est loy ordonnee que nul de sa propre cause ne soit iuge Et cellui le veult estre qui prouver veult son fait par soy meismes et par sa victoire qui est soubz la distribucion de fortune et a laventure

Item le droit canon comande quau pape len obbeisse/ lequel soubz peine descomeniement deffent comme chose reprouvee contre droit de iustice que telle esprove ne soit faitte/ Et tu me diras doncques comment seront punis les malfaitteurs secrez je te respons que dieu pour lui se est reservee la pugnicion/ et dit un decret/ que se en ce monde tous maulx punis estoient/ le iugement de dieu point de lieu naroit Et cellui presomptueusement le se veult attribuer qui la victoire de la vengence sen veult donner

Et comment est uns homs si folz qui plein de vices et de pechiez se sent poson quil ait bonne querelle en aucun cas quil cuide qua lui pecheur dieu face miracle de la chose muciee quil cuiert/ Mais sil estoit sage paour devroit avoir de la punicion de dieu en sa iuste cause comme souvent aviengne et soit advenu que dieu a dissimulee vengence du pecheur ou cas ou desservi lavoit et puis le pugni en chose dont estoit innocent.