L'Avision de Christine

La seconde partie

__________________________________________________

XVIII

Ce que lombre disoit

des arquemistes

Comment cuides tu que ie soye comme iay dit fort atachee es speculatifs clers et entre les autres es arquemistes qui la science cuident trouver par les termes entendre daucuns livres obscurs de faire lor merveilles est / Car sil est voir que aucuns philosophes par investiguer les secrez de nature/ Tel art trouvassent/ laquel chose fort semble a croire Toutevoie tant sont couvers estrangement les textes de leurs aucteurs que bonnement le sens humain ne les scet ne mes a laventure concepvoir ne sentu fors tellement quellement Mais voy cy qui decoit les ouvreurs en ycelle art que ilz dient et touchent que comme il napartiegne quaux ignorans ruraux soit descouvert si noble secret pour le bien des soubtilz lont voulu si mucier que des rustiques ne leur soit tolu ne fortrait/ Et yci est la decepvance Car chascun qui si fiche cuide estre du nombre des plus soubtilz/ et abuse en son entendement en estudiant yceulz livres lequieulx baillent le sens de leurs termes a si doubles ententes que le plus cler veant ny voit nulle goute. Mais adonc ie me fiche en eulx et leur fais a croire que lassemblement des metaux sublimez diversement comment et de quoy doivent estre mixtionez de diverses materes et nourriz en feu attaindront lart de nature/ Et par espace de temps sera converti en or ou argent Et toutevoyes lun entant la maniere du composer en une maniere et lautre en une autre/ et le tienent secret les ouvreurs sanz conferir ensemble de paour que ce quilz en croient/ et la ma*niere de leur ouvrer peust aviser un autre de trouver la voye dy attaindre ne iamais nul ou pou neuvre de la guise de lautre/ et ainsi gastent le temps et perdent et font grant mise folement par vaine esperance qui par aventure en leur erreur les reconforte pour un pou dapparence ou coniecture daucune congelacion estrange faitte par diverses mixtions et feu/ quelque matiere dure remettre en poudre ou eaue ou autrement. Cuident par ce avenir au degre ou ilz tendent lesquelles choses sont toutes frivoles et tournent a folies et chetivoison et toute iour et nuit font feu contemplant un fournel/ mau peus et mau vestus se paissent de vent et la font chastiaulx et espagne pensant comment ilz seront aise quant lor scaront faire et quelz despens ilz menront Et que cuides tu de telz arquemistes sourdent aucune fois de grans trompeurs qui cabusent les seigneurs et leur font a croire que silz eussent quelque mise nest mie doubte quilz ont ia attaint un grant secret/ Si en tireroient un grant prophit/ et ainsi par quelque apparence de verite soubtille en ycelle art monstrent signe daucune chose voir semblable/ et au desrain tout tourne a neant comme tu as veu meismes en ton aage avenir de pluseurs de quoy il estoit grant renom et maintes gens foy yadiostent. Sicomme dun en alemaigne que on nommoit maistre bernart qui tant se faisoit renommer par lestat quil tenoit et meismes a ton pere envoia il lettres et tant fist que trop de gens foy yadioustoient et y aloient de toutes pars clers devers lui et toutevoie au desrain fu trouve que tout estoit neant et tromperie/ et dautres pluseurs que tu as veus qui au desrenier on faisoit mourir par leurs dessertes par cabusemens faire a sei*gneurs/ Et avient aucune fois que ie me fiche si en eux que par la speculacion quilz y ont trop ententive ]e les fais devenir tous fantastiques et si astraz quilz sont comme inconversables

la bonne gale est quant daucuns folz non letrez si boutent mieulx cuidans entendre et exposer les textes des aucteurs que les plus scavens et les lisent et ymaginent dessus et dieux scet les bonnes fantasies quilz y ont Sicomme un orfevre qui voult devenir arquemiste mais il le fut au contraire de la ou il tendoit/ Car or cuidoit faire et le deffist comme il fust riches homs et pouvres devint/ Cellui estudiant un chapitre entendi que mercure Cest assavoir un metal que ainsi ilz nomment estoit la matere ouvrable de la science/ et comme il passast oultre tousiours lisant de rechief entendi que la cause de la perfection de loeuvre estoit matiere reputee vile/ et que on trovoit sur le fiens gittee sicomme chose desprisee adonc comme cestui fust fort ententif a bien speculer ceste chose que ce povoit estre au desrain determina en soy que vrayement par ce que dit estoit Cest assavoir mercure que comme les autteurs eussent bailles leurs termes obscurs on devoit retourner le mot Cest cure ton marc quil entendi par la fiente de lomme que len devoit curer/ Et encore plus de ce le certefia que il trouvoit que sus les fiens comme chose vile estoit trouvee Si sarresta sus ces poins et comenca a ouvrer en sa fiente en la faisant sechier au feu et faire poudre et la fin en fu quil puoit comme charoigne et chascun le fuoit et se moquoit on de lui qui cuidoit faire de fiente or

Un autre estoit qui cuidoit de savates faire or/ et aloit sus les fiens a grant diligence les querir puis les brusioit et tant ouvra que ses voisins qui enpulantis en furent le chacierent

De tels* folz est il assez ouvreurs en celle science a qui nen remaint ne mes perte de temps et pouvrete/ Et quil ne soit mie dit selon le prouerbe commun que les sciences nont plus fors anemis qui ceulz qui les ignorent/ que elle soit vraye ou non ie ne tacertaine mie/ Toutevoye ie te dis sans preiudice que la difficulte delle par vehementes raisons que comme les oeuvres de nature soient impossibles a attaindre sophistiquement donroit cause a plusieurs des plus avisiez de non y perdre temps et mise par fole occupacion en esperance vaine y adioustent grant foy.