L'Avision de Christine

La seconde partie

__________________________________________________

XVII

Dit ancore lombre des choses

que elle a faites faire

Depuis ensuivant nay ie este celle qui les successeurs dyceulz ay amonnestez demprendre les grandes et merveilleuses choses/ lesquelles par laide de fortune a eulx propice tant esploitierent et par leur travail aide et sens en long espace de temps quilz conquesterent le monde/ Sicomme les hystoires de leurs gestes et toy meismes apres autres en ton dit livre de mutacion de fortune le recordez/ le recitent/ si nest besoing de plus en faire longue narracion

Aussi ne fus ie celle qui au grant alixandre tres sa jeunece donnay linvencion demprendre les fortes et fieres batailles en lui prometant fortune en son aide/ quil seigneuriroit sicomme il vint puis a chief/ tout le monde/ semblablement devant et apres ensuivant/ de toutes conquestes et seigneuries et toutes estranges choses mettre a effait a laventure par propos delibere ay este moyen et principe ce ne me peus tu nyer/ se tu encores par grosseur dentendement ne mignores quen dis tu me suis ie assez a toy manifestee me cognois tu/ Et moy a elle/ Dame dites encore a quoy vueulz tu que plus ie die/ ne vois tu lexperience de moy manifeste mes*mes chascun iour ou pais ou tu demeures par les debas que ie fais parmi la ville et en toutes places regardez et avisez quelz descors je mez meismement entre les princes qui sont dun sang et amis naturelment par les diversitez de moy qui suis contraire en eulx le fois devenir comme anemis et en chascun suis si affermee contrairement/ en ce qui lui semble bon que len ne me puet desmovoir/ Car chascun dit quil a droit et ainsi le veult soustenir. Et a discuter leurs raisons ne vois tu les assemblees qui en sont faittes de pluseurs que on dit saiges/ et a chascun pour soy de ses adherez qui different les uns aux autres/ Lesquelles choses sont causes de grans inconveniens/ Car en pais royaume empire ou cite/ ou ie soye ou aye este communement de pluseurs guises contraires et mal acordables ne fu que rebellion et grant debat commocion et bataille ne fust ne autrement ne puet estre. Car certes la ou ie ne suis dun commun accord nara ia pais/ Mais du tort ou droit dentre les ditz princes superieurs je me tais car de ce determiner nest mie mon office qui tousiours suis en doubte et non certaine Mais de ce demander convendroit a la tres clere resplendissant poissant deesse que tu veis enclose et enprisonnee et de qui fraude sestudie a estouper et clourre les voies de sa lumiere. Sicomme a toy meismes fu cy parant et de qui les menistres quoy que leur desplaise nosent soubz peine destre batus tinter ne lever lueil Mais de leurs descors fais ie sourdre par toutes places nouveaulx debaz entre leurs menistres et adherez par toute la ville en deviser negativement lun contre lautre et meismes a de ceulz qui ne les cognoiscent en estranges parties en qui ie me fiche diversement si les fais entre batre soventes fois et questionner meis*mes de choses qui riens ne leur touche disant lun contre lautre tel seigneur a droit pour tel cause et pour tele lautre replique que non/ et ainsi par non a/ si a/ non fu si fu/ fais gent entre occire souvent fois meismes es tavernes souvent advient adont suis ie forte quant il ya vin et plus ie y adbonde et fais mesler gens de la chappe a levesque ou des guerres dantioche lequel a ou droit ou tort ou lequel est plus sage ou lequel ne lest mie et ainsi ie demonstre es humains leur ignorance de eulx debatre de ce de quoy riens ne sevent et ne leur aptient/ ho quel folie en homme de qui le sens doit gouverner raison se fonder sens elle sur moy et iugier par moy certainement de choses non certaines et quilz ignorent/ que ten diroye ie fais vivre les gens par moy. Cest a entendre disposer leurs fais selon ce que ie leur conseille et quant ilz puent avenir a lordre de vivre que ie leur fais desirer Adonc sont ilz contens de la chose quilz vouloient mais je suis different en eulx car ie fais penser et cuidier a lun que bon lui est une maniere de vivre/ et certaines choses quil appete lui sont bonnes qua un autre ycelles meismes ne plairoient point/ ains lui plairoient toutes contraires Et cestes differences viennent selon les condicions et aages des gens/ Si comme ie suis autre es ieunes que ie ne suis es vieulz et meismes es .ii. aages entre eulx suis different/ Et pour ce que ainsi ie differe suis ie cause des debas du monde/ Ht chascun me cuide avoir en soy meilleur je fais semblent a un homme que avoir des flourins il nest plus de ioye/ Je fais sembler a un autre que avoir belles dames il nest plus de bien AUX uns iugier que science est souveraine chose/ AUX autres que chevalerie est meilleur et plus noble/ et ainsi des autres choses/ Et pour ce ne fu *oncques si parfait pas ihesucrist comme homme qui peust bien vivre ne estre agreable a loppinion de tous. Toutefois te dis ie bien que vivre vertueusement et bien faire si enporte le plus des voix de gens