L'Avision de Christine

La seconde partie

__________________________________________________

XVI

Encore de ce mesmes

et des seignouries

Pour briefte je laisse infinies autres choses lesquelles ay faittes faire pendant ce temps/ et meismes celles que tu imputes a fortune ne vindrent de moy les premieres invencions des fais que ains leur achevement vi en pensees non obstant que souvent les veoie autrement quilz navenoient de tous les fais des conquereurs passes

Ne fis ie apres maintes autres aventures passees. a croire au roy xerces quil conquerroit toute grece en lui ramentenant sa grant poissance dont pour ce faire assembla tant de gent que mons et vaulx en estoient couvers/ si avoie couleur de iugier pour lui la victoire/ mais comme fortune me soit souvent contraire par especial en fais de guerres et es choses a venir *je confesse que elle volontairement donna la victoire aux grieux trebuschant cellui poissant es laz de maleurte sicomme toy meismes as autres fois apres autres aucteurs recorde en tes volumes/ Toutefois non obstaut qua lui fusse mencongiere et decepvable fus ie la premiere naiscence de celle emprise

Apres ce temps par moy et par mon ammonnestement furent commencies et continuees les grans guerres troyenes. Ne fis ie a croire a leomedon roy de la premiere troye que les grigois descendus a son port quant aloient pour querir la toison dor estoient venus pour espier sa terre et lui pourchacier dommage et par moy sans cause envoya congeier de sa terre jason hercules et les autres barons vilainement pour lequel despit ie me mis ferme ou cuer des ditz barons/ et leur promis que bien sen vengeroient. comme ilz si firent apres. Car ie fus simple et nyce ou dit roy leomedon qui folement me crut et mal se gaita dyceulx grigois en qui ie fus sage et vraye/ si que sagement menerent leur fait par laide et disposicion de fortune conduisseresse de leur bon eur si que toute destruirent et ardirent la cite/ le roy occirent et toute sa gent

Apres ne fis ie a priand filx leomedon rediffier la seconde troye qui tant fut belle fort et poissant que merveilles estoit a comprendre/ par moy apres entreprist la vengence sus les grieux. Si fis aler paaris en grece et ravir heleine et tout faire ce qui en fut fait/ et par mes amonnestemens avec laide ou nuisance de fortune perdoient troyent et gaignoient. je fus cause de la mort hector. car ie lui faisoie a croire quil navoit garde dachilles qui sanz cesser le gaittoit si que au desrain loccist

Semblablement depuis deceus ie *achilles tant quil cheut es laz de la royne hecuba qui a bonne cause le haioit/ tout pour moy et par mon pourchas fu au desrain troye prise et destruitte/ de laquelle fis apres partir pluseurs barons du sang royal a tout grant foison de gent qui par mer sespandirent en diverses contrees/ dont eneas et sa compagnie arriva en ytale/ si lui fis convoitier la fille du roy latin/ et pour celle cause emprendre guerre a tumus qui lui chalengoit Dont dycellui eneas venu a son entente descendirent puis les fondeurs de romme