L'Avision de Christine

La seconde partie

__________________________________________________

V

Encore de ce mesmes

Et entens sainement encore de ma poissance. Je te dis que toutes les lois et sectez qui ont este au monde puis son commencement excepte la loy escripte qui a moy se fu de dieu donnee/ Et puis celle de jhucrist lesquelles vindrent du ciel ou ie nay nul repaire toutes les autres ay trouvees/ la loy de nature ou naouroient que un seul dieu qui fu premiere et bonne estoit a qui bien la tenoit fu par moy trouvee. celle des payens daorer pluseurs dieux ie donnay aux hommes de fol entendement et continuer leur fis par lespace de moult long temps/ *Et encore pluseurs parties du monde ie tiens en celle erreur. Je fis trouver a belus les premieres ydoles/ et a son filz le roy nynus aourer lymage de son pere/ Et combien que ne trouvasse la loy escripte/ car ny sceusse attaindre fis ie maintes fois errer en ycelle pluseurs juifs qui par moy firent maintes mauvaistiez et felons fais. sicomme meismement au peuple dysrael. Ie consellay faire un veel dor et quilz laourassent comme dieu. Et ou temps de abdon le prophete fis ie au roy Jeroboam semer la fausse creance contre dieu et sa loy/ et ainssi de mains autres/ mais aussi continuay ie les bons en oeuvres meritoires

En la loy de grace ie noz que veoir car elle est certaine amis a cellui qui en fut acteur ie fis par le moyen denvie maintes peines faire/ et aussi moyennant grace divine maint convertir a sa loy. Mais tout fusse ie cause de sa mort toutefois contre moy fu par paour iugiez a tort/ Et ycelle envie et mauvaistie pareillement mavoit fait fichier ou temps devant es cuers de ceulx qui persecuterent les sains prophetes/ et aussi en ceulx qui martirerent les benois sains. Je fis trouver a mahommet la fausse loy qui ores est a este/ et sera pour la punicion des crestiens continue si tiens les sarrazins en celle fausse creance/ /

Par moy se ficherent le temps passe en plusieurs baptiziez du nom crestien diverses erreurs en la loy. et foles creances qui fortes furent a esrachier. sicomme il appert de manes le faux herite qui trouva la secte de ceulz que on appelloit manichees/ Et arrianus qui edifia leresie arrienne. Et es parties de bretaigne pelage qui par sa fausse doctrine pluseurs crestiens corrompt/ un autre vers espaigne nomme precelin. Et pluseurs *autres en qui ie fus fausse et en leurs disciples que ie fis errer et meismement plusieurs papes et patriarches et de divers estas de leglise. Et encore ne suis si de tous esrachee en maint faulx pas que non obstant les vrais admonnestemens de saintte theologie ie ne soye en eulx avec erreur tapie et couverte/ mais paour de feu nous fait tenir coye et close