L'Avision de Christine

La seconde partie

__________________________________________________

IV

Les choses que lombre

disoit a Christine

Encore te dis ie que tous les anciens prophetes qui ont este non obstant quilz parlassent par inspiracion divine de ladvenement de Jhesucrist et des temps avenir et meismement saint Jehan leuvangeliste en lapocalipse et tous ceulz et celles qui ont prophetisie se ie eusse este en eulx contraire a leurs ditz ia neussent saintement parle des secrez divins/ Mais afin quen moy tu nerres et que mieulx mentendes te dis/ que non obstant les choses dictes maint ont prophetisie verite esquelx ie nestoye mie saine mais leur disoie au contraire de leur prophecie sicomme cayphe qui dist de Jhesucrist quil estoit expedient un homme morir pour sauver le peuple. il dist verite mais ce nestoit mie ou sens ou il le pre*noit. Et pource estoie fausse en lui. Car ie le faisoie folement cuidier

Plus te diray de ma nature tres que creature humaine est nee si tost quentendement commence aucun petit a ouvrer en lui/ Tantost moy et de mes plus legieres filles entrons en lui/ Et au fuer que lenfant croist avec son entendement nous croissons en lui pareillement/ Et en celle croiscence selon que ses inclinacions se donnent ie loge en lui de mes filles/ Sil est soubtil en speculacions ie les lui baille telles quil lui fault/ et celles le font encerchier plus avant de ce en quoy il est enclin se enclin est a armes telles quil lui fault/ les lui baille/ et celles le font encerchier la maniere de exerciter les armes/ se a oeuvres mechaniques marchandise ou labour de terre peindre ou escripre ou lengagier pareillement selon les oeuvres

Par moy avec linclinacion ou longue coustume denseignement Toute personne prent ses meurs bons ou mauvais sages ou folz selon quil saplique/ si fais tout homme ouvrer parler aler et venir et sanz moy ne se mouvroit pour oeuvre faire/ si me change souvent en eulx par divers accidens. et fais souvent des bons mauvais et des mauvais bons/ les savans errer et dire faulx en divers cas et les simples aler droitte voye et dire voir/ et selon que ie suis en eulx ie me donne a cognoistre par leurs oeuvres et paroles/ Se nest en aucuns qui de faintise se cuevrent toutefois ce ne pourroient faire sanz aucune de mes filles

souventes fois ie decoips ceulz ou ie habite par leur donner faulz a croire Nil nest si sage que souvent ne decoive ne autrement ne pourroit estre selon le cours naturel

Je suis fondee sur ce que la fantasie raporte a lomme soit mal ou bien/ *si fais souvent faulz iugement/ et dis une chose estre bonne ou elle est mauvaise/ Et ainsi lopposite et pour ce fais hair et amer sanz cause souvent advient et sanz lavoir desservi diffammer et aussi louer sanz achoison souventes fois

Es sages hommes suis plus certaine et plus vraye et es anciens de longue experience et pour ce a bonne cause sont appeliez es conseulx des ordenances politiques. je suis naturelment plus vive et plus certaine en un homme quen un autre selon labilite de son entendement lequel me raporte en ses pensees/ et en homme qui souvent me change est signe de pou constant et legier courage

Je ne suis nulle fois certaine Car se certainete y avoit ce ne seroye mie. Je dis souvent verite mais ie la dis par couleur et infonnacion dautre chose et la gist en lomme le sain ingenient se la couleur est voir semblable et digne destre creue qui me fait parler/ je ay propriete de faire encerchier et de lenquerir/ Et fus faitte pour celle cause mais aussi tost quelle est clerement trouvee de la chose que ie fais querir adonc convient que celle mienne fille qui cause a este dycelle verite attaindre se parte de la personne mais gy demeure avec pluseurs autres de mes filles qui pareillement sen partent selon les veritez qui sont attaintes/ car la ou elle est nous ne povons arrester/ et si la faisons attaindre par labour dencerchier

mes iugemens en nul cas riens ne valent se fondez sur raison ne sont/ Et cil qui parle ou oeuvre par moy ou sens nest appelle il erre et habonde en folie. Iay comme dit est filles bonnes et mauvaises voir disans et menterresses mais se elles mentent ou dient voir nest mie certaine la pensee qui en soy les a / combien que souvent grant *foy y adiouste. Et pour ce que ie suis chose non certainement sceue puez tu apercevoir que moy avecques esperance sur le temps a venir par le moyen de vraye foy sommes cause du merite des vrais seaulx catholiques. si peus notter que pour cause que ainsi ie me diversifie et change vois tu yci mes filles de diverses fourmes et couleurs/ Car nest homme si sage qui en soy ne mait diversement/ la cause si est que ma mere ignorance ne laisse ou vaissel du corps pour sa groisseur lame du tout ouvrer selon sa subtillete/ Et pour ce convient que moy qui composee suis de la nature de lame en tant que ie suis speculative et de la nature du corps en tant que ie suis ignorant soie et habite ou cuer de creature humaine Mais es intelligences qui franchement voient verite et ont cognoiscence des proprietes de toutes choses. Je ne suis ne nabite ne nulle part se ignorance et entendement ne sont en semble. Et comme dit est/ homs nest si sage qui nignore les causes du plus des choses. Et pour ce nest il nul qui en moy ne varie mais pour ce que es moins parfais suis plus foible sont leurs raisons nyces et reprouvees.