L'Avision de Christine

La seconde partie

__________________________________________________

VI

Ci dit lombre les oppinions des philosofes

sus les principes du monde

En repliquant ce que devant est dit pour donner preuve que si sage ne soit que ie ne face errer parlerons des anciens philosophes que le je fus en eulx/ et comme le tractier de ceste matiere tout soit elle soubtille puisse estre au profit de lentendement ten deviseray plus largement en lengage plus couvert comme la matiere le requiere/ Te diray premierement des tres anciens investigueurs des choses naturelles

A ceulz qui premierement philosopherent. le disoie que des natures des choses yceulz sont seulement les principes qui sont ramenez a cause de matiere/ Et a ce que plus leur fust ce apparent teles raisons leur faisoie investiguer que .iiii. condicions semblans apartienent aux raisons des principes. premierement disoient ilz comme ce de quoy aucune chose est faitte semble le principe estre dycelle chose. Car cest vray signe de principe par qui la chose est faitte et tel est la matiere. Car de matiere toutes choses sont faittes.

Item car tout ainsi que ce dont les choses sont faittes nous disons le principe de lengenrement delles. et par consequent cause. En tant que generacion toute chose precede a estre ce quelle est/ naincois elle nest riens/ Et toutefois de matiere premierement com*me de son principe chascune chose est faitte. Car la matiere precede la fourmacion/ Et aussi la matiere premierement non pas accidentelment est le suppost des fourmes par quoy encore appert quelle soit vray principe il sensuit que matere soit principe des choses/ Tiercement car comme de toutes choses ce semble le principe/ ou quel finablement toutes elles retournent/ Car sicomme les principes sont premiers en la composicion aussi doivent ilz desrenniers estre/ et autressi ytel en la matiere. quartement comme il faille les principes demeurer ce par especial semble estre vray principe qui en chascune generacion/ Et apres toutes choses corrupcion demeure en toutes mutacions. Combien quaucunes passions se varient en elle. Et a elle autressi toutes les autres condicions devant dittes affierent/ Par ces .iiii. premisses ilz concluoient que la matiere est le element et le premier principe des natures des choses/ Ainsi disoient que riens ne puet estre simplement corrompu nengenre. Car tout ainsi ce disoient ilz que quant aucune mutacion est faitte envers quelconques passions toutefois demeurant lessence principal nous ne disons ycelle chose nengenree simplement ne corrompue aussi fors selon aucune chose Cest a dire accidentelment sicomme un homme blanc devenir noir nous ne disons ycellui homme engendre quant il prent tel abit ne corrompu quant il pert le premier/ Car sa substance principal demeure Cest assavoir son estre lequel si est sa forme Tout autressi que la matiere disoient ilz est la substance des choses. et ycelle demeure permanablement. Tout autressi ilz concluent que riens nest simplement *corrompu nengendre fors accidentelment. Mais disoient ilz toutes mutacions qui advienent es choses sont faittes vers aucuns accidens venans de la matiere comme sont passions ou quelques qualitez dont combien que tous yceulz convenissent en semble en mettant la matiere comme cause premiere Toutefois le faisoie differer doublement en la posicion delle. Cest assavoir quant a pluralite car les aucuns mettoient une seule matiere/ et les autres pluseurs causes materieles. Et quant a lespece aussi/ Car aucuns leaue mettoient les autres lair les autres le feu/ Thales lancien philosophe qui principe fu dycelle philosophie disoit que cestoit leaue/ et affermoit la terre estre assise sur leaue/ Ainsi la mettoit le principe des choses/ Et dist que ainsi estoit fondee la terre dessus comme le effett est fonde sur la cause.

dont il est assavoir que cestui thales fu dit prince dycelle philosophie. Car comme il fust un des .vii. sages qui plus proprement furent dis theologiens pouetes lui tout seul se transporta a considerer les causes et les principes des choses/ les autres seulement demeurez occupez es morales sciences/ les noms dyceulz .vii. sages sont premierement thales milesien qui fu du temps Romulus cellui qui fonda romme ou temps dachar le roy disrael/ comme on lit es croniques environ .VI C.XX.iiii VII. ans devant lincarnacion jhesucrist. Et devant aristote environ .CCClii. ans. Car aristote fu du temps alixandre le grant qui preceda jhesucrist.CCCXXXV. ans/ Cestui thales fu astrologien. Car meismes comme on lit il prenostica un deffault du soleil ou temps de ozias et de la fondacion de romme bien .C. ans ains quil fust. Cestui aussi fut cil dont on lit en lystoire des philosophes qui chey *en la fosse quant il aloit veoir le cours des estoilles de quoy il fu reprouve dune vieille Comment dit elle cuides tu veoir ce que len fait ou ciel quant a tes piez ne vois//

le second sage fu pitacus mitilenus ou temps que es hebrieux regnoit zedechias et es rommains tharentin le premier/ lequel pitacus tua frenondaches qui batailloit a lui

les autres cinq si furent solon dathenes qui fu faiseur des drois et des loys populaires. rhilon lacedemonien pithidorus corintien cleobelus sidien. Zyas periandran/ Et furent tous ou temps de la chetivete de babiloine Et en ce temps cy en bretaigne la grant regnoit cordeille fille du roy loyz de bretaigne et femme daganipus le roy de gaule/ lequel aganipus a linstance delle subiugua et conquesta bretaigne occupee par les serourges delle qui chacie en avoient son pere/ si en chaca yceulz et le royaume au pere restitua. Auquel puis succeda ycelle cordeille comme plus a plain il appert par les gestes.