L'Avision de Christine

La première partie

__________________________________________________

XXVII

Encore de ce

Et tout ainsi comme les vertus dependent les unes des autres et sentre acompagnent et attraient. semblablement ces filles de perdicion trebuchent de lune en lautre et sentre sachent et apparient. et quil soit vray pour quoy est doncques fraude trouvee ne mes pour remplir les coffres de la rapineuse cest ladmenistraresse de ses pourveances et de son amas. cest celle qui treuve les voies dattraire *ses finances et faire ses contras. hahay se perdue lavoit comment esgaree seroit onques ne fu si propice boiesse ne qui si bien pensast de sa maistresse. Dieux quel compagnie et quel couple avarice et fraude mais de leurs ordes mains Libera nos domine

Dieux ne comenca ceste orde caigne aux ongles crochies tres que sus la terre navoit que .iii. hommes lors que caym offroit a dieu des pires bles de sa terre et des pires bestes de son parc/ Et comme dieux qui scet les corages neust agreable son sacrefice le reprouva par quoy ycellui chut ou second inconvenient. Cest assavoir de envie et puis ou tiers par lomicide quil fist de son frere abel/ Qui pourroit raconter les maulx qui par cest sont avenus et ancore ne cessent. pour quoy te diroie des empires royaumes citez et peuples qui destruis en ont este les temps passez autre exemple ne convient fors du temps present. nest elle celle qui en leglise de dieu met la division et le scisme. Certes selle nestoit ne convendroit pas .ii. papes ains a peines un le vouidroit estre/ nest elle principale ou debat de mon royaume. se trouve ny estoit la charge du gouvernement ne seroit tant chalengee. Dirons nous que elle fust plus grande iadis ou roy de babiloine pour tant sune seule foiz il desroba le temple de dieu/ helas avisons qualites extorsions on fait en le plus ses amees choses que son temple/ cest assavoir a ses pouvres membres qui sont les souffraiteux/ de quoy il est escript que licite seroit vendre les calices et les ioyaulx livres et aournemens dautelz a besoing pour secourir a la neccessite dyceulz Et ils sont de toutes pars persecutez/ et de telz ioyaulz *quilz ont cest leur substentacion desrobez. Et dieux scet en quelz usages sont emploiez. Mais le cas de cestui dit roy pour quoy ne nous puet estre figure et prophecie de pareil inconvenient par divine punicion Car sicomme ou livre de daniel ou Ve chapitre est escript. Faisoit une fois balthazar un grant disner/ et seoit a table avec les nobles de son royaume commanda que fussent aportez les vaissiaulz dor et dargent que son pere avoit pris ou temple de jherusalem/ esquelz vaissiaulz on souloit faire le service de dieu. Et cellui corrompu par pompe buvoit dedens presomptueusement. et y faisoit boire ses concubines qui de telz rapines faisoient leurs paremens/ et les choses de dieu mettoient en vilz usages. mais dieu contre qui nulle force na poissance et quoy quil attende bien se scet vengier ot amene leure de la punicion dycellui malfaitteur/ Et par cest exemple povons notter la ruyne des plus esleves souvente fois quant plus cuident estre asseurez. Car sicomme cellui balthazar roy de babiloine estoit plus en sa ioye. Il leva les yeulx et en la paroit de sa sale vid une main qui escripsoit telz troys motz. mane thecel phares. le premier mot mane cest a dire nombre/ et estoit a entendre que dieux avoit nombre les iours de sa vie/ et que venue en estoit la fin. le second mot thetel/ est a dire poiz/ qui vouloit dire que dieux avoit peze ses biens et ses maulx et legier avoit este trouve en biens et pesant en maulz/ le tiers mot phares vouloit a entendre division/ cestoit a dire que dieux avoit divise son royaume et separe de lui Et ainsi avint car celle meismes nuit daire le roy de mede et cyrus roy de perse prindrent la cite de babiloine/ Et fut *occis Balthazar et son royaume trasporte es mains des mediens et des persens