L'Avision de Christine

La première partie

__________________________________________________

XXVI

Encore de ce

Encore de celle qui les voies estoupe que verite ne saille. Cest fraude la perverse. sicomme dit valere le grant ou .ixe. livre que sa tricherie barateuse est un mal mucie et espieux/ de qui les forces tres efficans sont mentir et decepvoir comme elle sesiouisse en menconges et fallaces qui sont les faulx outilz de son soubtil art. Et de ce parle Ysidore en ses synonimes qui dist que fraude ou barat est monstrer une chose en semblant et faire autre en oeuvre Et cellui qui en lui la/ est tricheur/ et par elle veult simuler et faindre lissue de vertu/ de ceste mauvaise vient desloiaute et foy mentie/ Or prens garde/ se ma terre et toutes mes cours sont semees de si fais herbarges ia moult enracinez en de trop haulx lieux. helas comment ne desplairoit a dieu iuste le vice de foy mentie de menconge/ et de desloyaulte entre les freres parens et amis et entre prochains sicomme il commande que ilz aiment lun lautre quant meismement aux anemis veult que foy soit tenue et quil se courrouce du contraire/ le nous monstre assez par lexemple qui segnefie des miens la grant punicion. Cest assavoir par ce qui est escript* ou desrenier chapitre ou livre des roys de zedechias roy de Jherusalem qui brisa a nabugodonozor roy de babiloine la foy que promise lui avoit. pour laquel chose le dit nabugodonozor vint assigier ihrlem / Et dieu en sa main lui livra le dit roy zedechias/ si lui dist quant il le tint. dieu qui het toute infidelite de foy brisee et de menconge te veult punir par ma main Et adonc devant lui occire fist ses enfans Et a lui crever les .ii. yeulx Et lie de chaiennes le fist prisonnier mener en babiloine. or regarde que doivent les miens attendre des infidelitez que chascun iour sentrefont tant normes et si communes que lun en lautre ne se puet fier ne loiaulte a peine en part qui soit du grant jusques au mendre puet estre trouvee qui vid oncques mais lart de sophisticacion si commune. Car de ce semble que chascun soit maistre et jusque aux entrailles des corages sest embatue celle art denfer et dyabolique si quil nest a peine parole ditte semblant fait ne chose ouvree qui ne soit sophistique en telle maniere quelle a apparence destre meilleur quen effait de bonte elle nest trouvee. si suis pour ces choses comme celle qui le baston a sus le chief et le cop attent.