L'Avision de Christine

La première partie

__________________________________________________

XXV

Encore de ce mesmes

Encore de la deshonneste qui ma gent de deffense et mes autres officiers et meismement mes plus affins et prochains tient avec les autres passions dessus dittes en ses lians comme cy dessus est dit. Helas qui naroit que un vice seroit a pou eureux. mais mal pour cellui qui de plusieurs ou de tous est avironnes et remplis. Ne me puis taire de lexploit de la grant condempnacion de dieu donnee contre se vice et *des maulx qui en vienent et au iour dui et tres les premiers temps comme plusieurs royaumes destruis en aient este et pour ce doubter doy quant ie voy le cas pareil ce meismes flaiel exemple/ Dyna fille de iacob. fu ravie du filz du roy de sichem et ce fu la cause de la destruction du dit royaume amon se faigny malade pour avoir thamar sa seur pour laquel cause il fu de son frere absalon occis

le ravissement de heleine par paaris en grece fu cause de la destruction de troye

un roy de france comme racontent les croniques en fu chaciez et exilles la force de tarquin lorgueilleux faitte a lucrece la chaste dame de romme qui pour celle cause soccist/ fu cause du desheritement du roy tarquin et de son filx/ Et pour ce fait iurerent les romains que iamais a romme roy narroit/ hanibal roy de cartage tant quil fu sans lacointance de la deshonneste il fu vainqueur et victorieux es batailles romaines et en toutes pars et fu son nom esleve en prouece/ Mais si tost quaprist le repos/ et en delices senvelopa es quelles prist lacointance de ceste mauvaise chut en la valee de malefortune ne puis bien ne lui vint.

Plus te diray. et nottes que quiconques soit lomme qui es dissolucions communes senvelope de ceste deshonneste merveilles est se iamais puis il a pris darmes/ et se fortune en tous ses fais ne lui est contraire. puisque son cuer flote es eaues de ses dissolucions Et ce nestoit quil ne loit nul diffamer publiquement de ce te donroye vray exemple daucuns vivans au monde sanz honneur loiez de telz lians/ encore te dis que pais terre ou regne dont des chevetains est maistrece ne fructifie en honneur ne bonne renommee. Et a quoy plus alegue*roye de ce exemple la manifeste experience le nous declare/ Mais de son trebuschement quoy quaye dit devant ne convient autre prophecie ne mais les effais de la divine iustice qui pour cause de celle ebaluffree sanz frain de honte dont les humains estoient reamplis dieu dist et sentencia que homme plus au monde ne seroit vivant sus terre. Et pour ce le deluge envoya. iadis qui nespargna creature vivant fors noe et sa meisnie que dieux ot preservez. si penses et notes comment asseure ie doy dormir.