L'Avision de Christine

La première partie

__________________________________________________

XXIV

Des punicions des vices

Que iaye paour de la punicion qui tant rent enfermes mes plus prochains par les exemples que de lire de dieu ie treuve encorue pour trop mendres cas que ceulx que courir voy commis par mes pourprises. sicomme il est escript ou second livre des roys ou desrenier chapitre que comme le roy david une fois ferus du vent dessus dit eslevast son cuer en enfleure de ambicion de savoir quel poissance il avoit Et de combien de gens darmes finer pourroit. Et pource savoir fist son peuple nombrer pour la cause de ceste eslevacion seulement dieu fu contre lui tant courroucie quil lui manda par le prophete gad que il choisist de .iii. punicions lune. ou .vii. ans aroit par tout son royaume famine. Ou .iii. moys il seroit en fuite pour paour de ses anemis. Ou .iii. iours pestilence de mortalite aroit en son peuple. Donc apres quil ot choici la tierce punicion une tele mortalite sourdi quen son royaume mourut .lxx. mille homme

o doulce amie or regardes comme grant punicion pour chose qui au regart de noz grans enfleures sembleroit bien petite boce

de ceste enfleure encore et de la punicion de dieu envoiee comme il ne la puist au long aler souffrir Est escript ou .iiiie. chappitre de daniel. que comme nabugodonozor une fois alast et venist parmi sa sale en son grant palais de babiloine se glorifiant et disant Et nest ce pas babiloinne la grant laquelle pour ma maison royale iay edifiee Et la poissance de ma force et la gloire de ma beau*te. Adonc disant ces parolles vint une voix du ciel qui lui dist. nabugodonozor escoute. Ton royaume de toy est trespasse/ et boute hors seras de la compagnie des hommes/ Et avec les sauvages bestes sera ta demeure/ et foin avec les bueufs tu mengeras. Ne fu pas mencongiere la promesse. car gaires apres ne tarda que executee ne fust en sa personne. qui deboutez fu de la compagnie humaine et ramene en fourme de beste paissant aux champs a la pluie et au vent

A quoy querons nous autres prophecies ne nous sont cestes souffisantes. ne savons nous que dieux est immuable comme dit ay. et que tel est ores comme lors estoit. Ne sont les escriptures toutes pleines des verites de ses punicions Et de tant comme plus il les retarde de tant plus grant paour avoir devons tout ainsi comme de larchier de tant comme plus il retarde a frapper tendisque fort il tire la corde de tant fiert il plus grant cop quant il assenne/ que ten diroie plus/ dexemples infinis en sont qui nel croira si lise assez souffise ceste narracion sus la ditte enfleure de mal affaire.