L'Avision de Christine

La première partie

__________________________________________________

XXVIII

Ancore de ce

Tant que cest sanz nombre doulce chiere amie te pourroie dire de telz exemples de diverses punicions pour divers pechiez. helas et les miens ne si prenent garde/ ne dit le proverbe rural et commun que bien se bat qui pour autri se chastie/ et que qui autrui maison voit brusier de la sienne paoui doit avoir il nest si bel chastoy que cil qui vient de soy meismes/ et sans contrainte vient/ plus leur fust honnourable laissier les vices de pure volente que ce que a force on leur fait delaissier. Nest il escript que dieux a plus grant ioye du pecheur retourne a lui que du iuste qui oncques ne failli. Cest chose humaine de pechier. mais infernal est la perseverence ha doulce chose est que de suivre la voie de vertu a qui si veult duire. Nest il dit que lomme vertueux a ia un pie ou ciel/ et a quoy seslieve homme qui est terre et cendre/ ne scet il que sa vie est briefve/ ne se glorefie es delices mondaines lesquelles ne sont ne vraies ne siennes/ Et que vault avoir seigneurie au monde grans tresors terres possessions et poissences sur les autres un pou de temps pour en si user que on sen enqueure dampnacion perpetuelle. qui est cellui si ignorant/ qui nait le ver de conscience vueille ou ne vueille/ quant il se sent pecheur ne possede il ya un des tourmens denfer/ qui ne le laisse durer/ mais quelle est plus grant seurette que nette conscience cest la ioye celestiele/ hahay mais pour quoy ne a qui dis ie ces paroles quant je scay que nen seray pas creue. car ne pourront entrer es corages endurcis sicomme on dist le fol ne croit jusques il prent/ mais abondance de voulente le me fait dire/ * comme tendre mere a ses enfans mais ce me desconforte que ia me semble en y a dentrez en obstinacion qui trop est chose perverse helas iay grant paour que semblable ie soye a cassandra la sage fille du roy priant que voiant la ruine appareillee sus les troyens les amonnestoit dapaisier leurs courages contre grigois/ ains que pis leur venist. mais en vain se debati car nen fu pas creue si leur en ensuivi tout ce que pronostique leur avoit/ dont a tart de ne la croire se repentirent/ ainsi de eulx amender et mettre a paix devers leur dieu de qui ia voy la guerre/ bien vouldroye qua mes paroles si adioustassent foy que ains que pis leur venist ilz me creussent ne que ia du tout son yre fust sur eulx espandue par plus griefve vengence.

o sage roy de ninive bien conseilles qui creus le prophete Jonas quant dieu par lui te manda que pour les pechiez de toy et de ta cite tu avoies encouru sentence de destruccion dedens .xl. iours mais lors te repetant batant ta coulpe en ieunes plours et afflictions toy et tous tes subgiez iusques aux bestes mues par trois iours criant a dieu mercis vestus de sacs cendres sur testes tant te humilias que dieux ot pitie de ta contriction si que ton humilite espargna sa vengeance par bon apaisement

Nont doncques les miens assez de exemples deulx repentir ne scevent ilz que de mal convient que mal viengne. Car non obstant que le sens litteral de leuvangile die que neccessite est que esclandre viengne/ ne dist il que pour tant mal pour cellui par qui esclande vient vueillent ilz ressemblent le larron qui ne croit quel que exemple quil voie que len destruise les mal faitteurs* jusques a tant quil ait la corde au col. helas mais ce est trop tart. Car trop est meilleur a lomme se garder du mauvais pas que ce qua peine ou jamais sen tirast hors sil y estoit entrez