Theséus de Cologne

_________________________________________________________

Laisse VII

Moult fut dolent le Roy et plain de jalousie,

225

Son conseil assembla et sa chevallerie

En parlement en mist bien vint a celle [fye]

Et leur dit doucement: «Seigneurs, je vous en prye

Que dire me vueillez, si ferés courtoisie.

Se il estoit ung Roy plain de grant seigneurie,

230

Et qui eust une femme de tresgrande lignee

Qui de son nain ce fust par amour obligee,

Comment la jugeroit ne quelle villenie

Appertendroit a elle? Ne le me scellez mye.»

Dirent les chevaliers: «Estre si doit bruye!»

235

Dont dit le Roy tout hault, bien fut sa voix ouye:

L. f.4b

«Seigneurs, par celui Dieu, qui le monde mestrie,

Je vous dis a briecz mos, ma femme avez jugee.

A son nain contreffait a mené puterie.

Thezéus n'est point mien, je ne le congnois mye –

240

Engendré fut d'ung nain que le corps Dieu maudie.

S'en suis moult bien deceu dont y ne me plaist mye;

Mais par la foy que doy au digne fruit de vye.

Car la chair de vous en sera, essiliee.»

«Sire, vous dictes bien,» ce dit lai baronnie,

245

«Puis que vous sçavez, qu'il est de telle vye.

Ph. f.5a

Sy en faictes vostre gre, car nous ne voullons mye

Que vostre honneur ne soit a tous temps exaulcie.

Mais ce vous n'en sçavez; le vray, (doucement) on vous prye

Que la dame ne soit ainsi a mort tantost jugee,

250

Car nous l'avons tenue vraye dame et sainctie.

Maiz pour ce Thezéus qui moult tres bel n'est mye

Croiez qu'i soit ainsi, ne vous resemble mye

Car y ne resemble a homme de tout vostre lign[i]e,

Et c'est ce qui vous tient en las mezencolie

255

De ce que dit avez a nous a ceste fye.»

«Seigneurs,» dit Fernagus, «par ma chevallerie

Le Roy le scet au vray, je lui acerteffie.»

La ot ung chevallier de noble seigneurie

A qui la Royne avoit fait grant courtoisie,

260

Du parlement yssit tout seul sans compaingnie

Et jura Jhesucrist le filz Sainte Marie

La Roÿne si peut si sera garantie.

Pour ce dit ung parler, l'escripture l'affye,

Mieulx vault amy en voye que monnoye [forgie].