Le Roman de la Rose

Chapitre XVIII

____________________________________________________________________________

Comment l'Amant dit cy qu'Amours

Le laissa en ses grans doulours.

Tot maintenant que Amors m'ot

Son plaisir dit, je ne soi mot

Que il se fu esvanoiz,

2768

Si en fui mout essaboïz

Quant je ne vi lez moi nului.

De mes plaies mout me dolui,

E soi que guerir ne pooie

2772

Fors par le bouton ou j'avoie

Tot mon cuer mis e ma beance,

Si n'avoie en nului fiance

Fors ou deu d'Amors de l'avoir;

2776

Ançois savoie bien de voir

Que de l'avoir neienz estoit

S'Amors ne s'en entremetoit.

Li rosier d'une haie furent

2780

Clos environ si come il durent,

Mais je passasse la cloison

Mout volentiers, por l'achoison

Dou bouton qui iaut miauz de basme,

2784

Se je n'en crainsisse avoir blasme;

Mais assez tost peüst sembler

Que les roses vosisse embler.