Le Roman de la Rose

Chapitre XVI

____________________________________________________________________________

Comment Amours très-bien souef

Ferma d'une petite clef

Le cuer de l'Amant, par tel guise,

Qu'il n'entama point la chemise.

Lors a de s'aumosniere traite

2000

Une petite clef bien faite,

Qui fu de fin or esmeré:

«A ceste», dist il, «fermerai

Ton cuer, n'en quier autre apoial;

2004

Soz ceste clef sont mi joial.

Ele est mendre de ton doi mame,

Mais ele est de mon escrin dame,

E si a mout grant poesté.»

2008

Lors la me toucha au costé,

E ferma mon cuer si soef

Qu'a grant poine senti la clef.

Ensi fis sa volenté toute;

2012

E quant je l'oi mis hors de doute:

«Sire», fis je, «grant talent ai

De faire vostre volenté;

Mais mon servise recevez

2016

En gré, foi que vos me devez.

Nou di pas por recreantise,

Car point ne dot vostre servise,

Mais sergenz en vain se travaille

2020

De faire servise qui vaille,

Se li servises n'atalente

Au seignor cui l'en le presente.»

Amors respont: «Or ne t'esmaie;

2024

Puis que mis t'es en ma menaie,

Ton servise prendrai en gré

E te metrai en haut degré,

Se mauvaistié ne le te tost;

2028

Mais espoir ce n'iert mie tost:

Granz biens ne vient pas en poi d'eure;

Il i covient poine e demeure.

Atent e suefre la destrece

2032

Qui orendroit te cuit e blece,

Car je sai bien par quel poison

Tu seras traiz a guerison.

Se tu te tiens en leiauté,

2036

Je te donrai tel deauté

Qui de tes plaies te garra;

Mais, par mon chief, or i parra

Se tu de bon cuer serviras,

2040

E coment tu acompliras

Nuit e jor les comandemenz

Que je comant as fins amanz.

– Sire», fis je, «por Deu merci,

2044

Avant que vos movez de ci,

Voz comandemenz m'enchargiez;

Je sui dou faire encoragiez,

Mais espoir, se je nes savoie,

2048

Tost porroie issir hors de voie;

Por ce sui en grant de l'aprendre

Que je n'i vueil de rien mesprendre.»

Amors respont: «Tu dis mout bien.

2052

Or les entent e les retien.

Li maistres pert sa poine toute

Quant li deciples qui escoute

Ne met son cuer au retenir

2056

Si qu'il l'en puisse sovenir.»

Li deus d'Amors lors m'encharja,

Tot ensi con vos orroiz ja,

Mot a mot ses comandemenz:

2060

Bien les devise cist romanz.

Qui amer viaut or i entende,

Que li romanz des or amende;

Des or le fait bon escouter,

2064

S'il est qui le sache conter,

Car la fin dou songe est mout bele

E la matire en est novele;

Qui dou songe la fin orra,

2068

Je vos di bien que il porra

Des jeus d'Amors assez aprendre,

Por quoi il vueille tant atendre

Que j'espoigne e que j'enromance

2072

Dou songe la senefiance:

La verité, qui est coverte,

Vos sera lores toute aperte

Quant espondre m'orroiz le songe,

2076

Car il n'i a mot de mençonge.