Le Roman de la Rose

Chapitre III

____________________________________________________________________________

Comment dame Oyseuse feist tant

Qu'elle ouvrit la porte a l'amant.

Assez i feri e boutai,

E par maintes foiz escoutai

Se j'orroie venir nule arme.

524

Le guichet, qui estoit de charme,

Adonc m'ovri une pucele,

Qui assez estoit gente e bele.

Cheveus ot blonz come uns bacins,

528

La char plus tendre qu'uns poucins.

Front reluisant, sorciz voutiz.

Li entriauz ne fu pas petiz,

Ainz iert assez granz par mesure;

532

Le nés ot bien fait a droiture,

E les iauz vairs come uns faucons,

Por faire envie a ces bricons.

Douce aleine ot e savoree,

536

E face blanche e coloree,

La bouche petite e grossete;

S'ot ou menton une fossete.

Li cos fu de bone moison,

540

Gros assez e lons par raison.

Si n'i ot bube ne malan:

N'avoir jusqu'en Jerusalen

Fame qui plus bel col portast;

544

Poliz iert e soés au tast.

La gorge avoit autresi blanche

Come est la nois desus la branche,

Quant il a freschement negié.

548

Le cors ot bien fait e dougié;

Il n'esteüst en nule terre

Nul plus bel cors de fame querre.

D'orfrois ot un chapel mignot;

552

Onques nule pucele n'ot

Plus cointe ne plus desguisié:

Ne l'avroie droit devisié.

Un chapel de roses tot frois

556

Ot desus le chapel d'orfrois.

En sa main tint un miroer;

Si ot d'un riche treçoer

Son chief trecié mout richement.

560

Bien e bel e estroitement

Ot andeus cousues ses manches;

E, por garder que ses mains blanches

Ne halassent, ot uns blans ganz.

564

Cote ot d'un riche vert de Ganz,

Cousue a lignuel tot entor.

Il paroit bien a son ator

Qu'ele estoit poi embesoigniee.

568

Quant ele s'estoit bien pigniee,

E bien paree e atornee,

Ele avoit faite sa jornee.

Mout avoit bon tens e bon mai,

572

Qu'el n'avoit soussi ne esmai

De nule rien, fors solement

De soi atorner noblement.

Quant ensi m'ot l'uis desfermé

570

La pucele au cors acesmé,

Je l'en merciai bonement,

E si li demandai coment

Ele avoit non e qui ele iere.

580

Ele ne fu pas vers moi fiere

Ne de respondre desdeigneuse:

«Je me faz», ce dist ele, «Oiseuse

Apeler a mes conoissanz.

584

Riche fame sui e poissanz.

S'ai d'une chose mout bon tens,

Car a nule rien je n'entens

Qu'a moi joer e solacier,

588

E a moi pignier e trecier.

Privee sui mout e acointe

De Deduit le mignot, le cointe,

Ce est cil cui est cist jardins,

592

Qui de la terre as Sarradins

Fist ça les arbres aporter

Qu'il fist par le vergier planter.

Quant li arbre furent creü,

596

Le mur que vos avez veü

Fist Deduiz lors tot entor faire;

E si fist au dehors portraire

Les images qui i sont pointes,

600

Qui ne sont mignotes ne cointes,

Ainz sont dolereuses e tristes,

Si con vos orendroit veïstes.

Maintes foiz por esbaneier

604

Se vient en cest leu ombreier

Deduiz e les genz qui le sivent,

Qui en joie e en solaz vivent.

Encore orendroit est senz doute

608

Deduiz laienz, ou il escoute

A chanter les rossignolez,

Mauviz e autres oiselez.

Il se jeue iluec e solace

612

O ses genz, que plus bele place

Ne plus bel leu por soi joer

Ne porroit il mie troer.

Les plus beles genz, ce sachiez,

616

Que vos jamais nul leu truissiez,

Si sont li compaignon Deduit,

Qu'il moine avuec soi e conduit.»

Quant Oiseuse m'ot ce conté,

620

E j'oi mout bien tot escouté,

Je li dis lores: «Dame Oiseuse,

Ja de ce ne seiez douteuse,

Puis que Deduiz, li biaus, li genz,

624

Est orendroit avuec ses genz

En cest vergier, ceste assemblee

Ne m'iert pas, se je puis, emblee

Que ne la voie encore enuit.

628

Veoir la m'estuet, car je cuit

Que bele est cele compaignie

E cortoise e bien enseignie.»

Lors entrai, senz plus dire mot,

632

Par l'uis que Oiseuse overt m'ot.

Ou vergier, e quant je fui enz,

Je lui liez e bauz e joianz;

E sachiez que je cuidai estre

636

Por voir en parevis terrestre;

Tant estoit li leus delitables

Qu'il sembloit estre esperitables:

Car, si come lors m'iert avis,

640

il ne fait en nul parevis

Si bon estre come il faisoit

Ou vergier qui tant me plaisoit.

D'oisiaus chantanz avoir assez

644

Par tot le vergier amassez.

En un leu avoit rossigniaus,

D'autre part jais e estorniaus;

Si ravoit aillors granz escoles

648

De roietiaus e de tortoles,

De chardoneriaus, d'arondeles,

D'aloes e de lardereles;

Calandres ravoit amassees

652

En un autre leu, qui lassees

De chanter fussent a enviz;

Melles i avoit e mauviz,

Qui beoient a sormonter

656

Ces autres oisiaus par chanter;

Il ravoit aillors papegauz,

E mainz oisiaus qui par ces gauz

E par ces bois ou il abitent

660

En lor bel chanter se delitent.

Trop par faisoieni bel servise

Cil oisel que je vos devise.

Il chantoient un chant itel

604

Con fussent ange esperitel;

E bien sachiez, quant je l'oï.

Mout durement m'en esjoï;

Qu'onc mais si douce melodie

668

Ne fu d'ome mortel oïe.

Tant estoit cil chanz douz e biaus

Qu'il ne sembloit pas chant d'oisiaus,

Ainz le peüst l'en aesmer

672

A chant de sereines de mer.

Qui, por lor voiz qu'eles ont saines

E series, ont non sereines.

A chanter furent ententif

676

Li oiselet, qui aprentif

Ne furent pas ne non sachant;

Si sachiez, quant j'oï le chant

E je vi le leu verdeier,

680

Je me pris mout a esgaier;

Si n'avoie esté encore onques

Si gais con je devin adonques.

Por la grant delitableté,

684

Fui pleins de grant joliveté;

E lores soi je bien e vi

Qu'Oiseuse m'avoit bien servi,

Qui m'avoit en ce deduit mis;

688

Bien deüsse estre ses amis,

Quant ele m'avoit desfermé

Le guichet dou vergier ramé.

Dès ore, si con je savrai,

692

Vos conterai coment j'ovrai:

Primes de quoi Deduiz servoit,

E quel compaignie il avoit,

Senz longue table vos vueil dire;

696

E dou vergier trestot a tire

La façon vos redirai puis.

Tot ensemble dire ne puis,

Mais tot vos conterai en ordre,

700

Que nus n'i sache que remordre.

Grant servise douz e plaisant

Aloient li oisel faisant;

Lais d'amors e sonez cortois

704

Chantoient en lor serventois,

Li un en haut, li autre en bas.

De lor chant, n'estoit mie gas,

La douçor e la melodie

708

Me mist ou cuer grant reverdie;

Mais quant j'oi escouté un poi

Les oisiaus, tenir ne me poi

Qu'adonc Deduit veoir n'alasse;

712

Car a veoir mout desirasse

Son contenement e son estre.

Lors m'en alai tot droit a destre,

Par une petitete sente,

716

Pleine de fenoil e de mente;

Mais auques près trovai Deduit;

Car maintenant en un reduit

M'en entrai ou Deduiz estoit.

720

Deduiz ilueques s'esbatoit;

S'avoit si beles genz o soi

Que, quant je les vi, je ne soi

Don si trés beles genz pooient

724

Estre venu, car il sembloient

Tot por voir anges empenez.

Si beles genz ne vit on nez.