|
|
Lectio XXXIV
Grammatica
Morphologia:
Coniugatio tertia sive consonantica:
s-perfectum.
―――――――――――――――――――――
De Croeso et Solone.
Croesus, rex Lydiae, propter magnas opes a multis princeps regum dicebatur. Solo autem Atheniensis inter homines eius aetatis sapientia eminebat. Aliquando rex, postquam Solonem hospitem per thesaurum duxit, interrogavit: «Quem felicissimum hominum ducis?» Solo: «Thesaurus tuus», inquit, «auro plenus est; itaque regum princeps diceris.» Tum perrexit: «Sed res humanae incertae sunt. Id etiam tu intelleges, nisi iam intellexisti. Saepe fortuna adversa in vitam hominum invasit; nimia enim fortuna hominum dei laeduntur. Itaque a me nemo, dum spirabit, beatus dicetur.»
Paulo post Croesus legationem in Graeciam misit et Apollinem Delphicum interrogavit: «Regnumne Persarum expugnabo, si regi Cyro bellum indixero?» Sacerdos Apollinis legatis: «Croesus», inquit, «si trans Halyn flumen exercitum traduxerit, magnum regnum delebit.» Quid iudicatis de hoc responso? Promiseratne deus victoriam Croeso? Croesus responsum non intellexit, ei eventus dubius non erat. Itaque statim praescripsit, ut copiae flumen traducerentur. Sed bellum eventu adverso gestum est: Croesus inter captivos ad Cyrum ductus et capitis damnatus est. Tum Croesus in rogo exclamavit: «Solo, Solo, Solo!» Cyrus autem, cum sententiam huius verbi intellexisset, vitam et libertatem Croeso concessit regnumque cum eo divisit.
―――――――
Vocabularium
dūcere, dūcō, dūxī, ductus
trādūcere, tradūcō, tradūxī, traductus
neglegere, neglegō, neglēxī, neglēctus
dīligere, dīligō, dīlēxī, dīlēctus
intellegere, intellegō, intellēxī, intellēctus
laedere, laedō, laesī, laesus
regere, regō, rēxī, rēctus
pergere, pergō, perrēxī, perrēctum
scrībere, scrībō, scrīpsī, scrīptus
praescrībere, praescrībō, praescrīpsī, praescrīptus
lūdere, lūdō, lūsī, lūsum
dīcere, dīcō, dīxī, dictus
indīcere, indīcō, indīxī, indictus
bellum indīcere
mittere, mittō, mīsī, missus
dīmittere, dīmittō, dīmīsī, dīmissus
permittere, permittō, permīsī, permissus
prōmittere, prōmittō, prōmīsī, prōmissus
cēdere, cēdō, cessī, cessum
concēdere, concēdō, concessī, concessum
dīvidere, dīvidō, dīvīsī, dīvīsus
invādere, invādō, invāsī, invāsum
gerere, gerō, gessī, gestus
bellum gerere
aetās, -ātis f.
rēgnum
flūmen, -inis n. = fluvius
flūmen trādūcere
respōnsum
plēnus, -a, -um [complēre]
certus, -a, -um
incertus, -a, -um
spīrāre
capitis damnāre
nimius
Croesus (ca. 591/590 - ca. 541 a. Chr. n.)
Cyrus (ca. 590/580 - 529 a. Chr. n.)
Persae, -ārum
Halys m., Halyn acc. (flūmen Asiae)
Solō, -ōnis
Athēniēnsis, -is
Apollō, -ōnis
Delphicus
Dictionarium latine-anglice
|