Vir nemoris

Liber I

___________________________________________________

Fata premunt exire domo paucisque uocatis,

qui prope forte aderant, uicini culmina montis

[11]

345

reptantes petimus trahimusque per ardua cliui

corpora difficilesque pedes et pectus anhelum.

Praecurrunt gressus fidi uigilesque et odoris

naribus olfaciunt passim lustrantque molossi.

Iamque Leobrunus, Pedicox, Terrorque Mocusque

350

crudelis, Sultanus hians et Lucifer igne.

scintillans, Calabronus atrox rapidusque Tigratus,

multorumque manus, quas longum dicere quaeque

pone ignara legit catulorum cetera turba,

uestigant patulo et linguis pendentibus ore.

355

Pignora cara humeris gerimus per caeca, uicissim,

auia perplexosque sinus et scandimus altum.

Sistimus hic tandem et, residentes per iuga passim,

alte despicimus submissa mapalia, praedam

infelicem hostis, ferrum flammamque minantis.

360

Hinc humiles abolere casas, hinc cernimus ignem

repere et extemplo tremulis clarescere flammis,

et linguis agitare cito uibrantibus aer

iamque cinis uolitat tenuis crepitantque fauillae

discissae in frustis, piceus caligine uertex

[107 ^r]

365

se adtollit sensimque tumens ferrugine opaca

pallentique colore polum tegit. Vndique fumus

rupibus incumbit uarioque uolumine serpens

inuoluit montem et glomerata claudimur umbra.

Nitimur obtutu frustra cupidique uidendi,

370

adstantes sursum nequicquam adtollimus ora.

Hinc leuiter summas querimonia fertur ad aures

captorum qui, constricti foedique recenti

uulnere, labentes, media caligine saepti,

aspectant aedes et caelum questibus implent.

375

Corda furore tumens sociis, subit ira cadentes

ulcisci ciues et se acribus urere flammis.

――――――

106^v, 349 mocus T: crocus T² V // 350 igne correxi: ignem T V // 362 cito ... aer uid. T: leues ... auras T² T³ V // 107^r, 363 crepitanque err. V // 364 discesse err. V // pigens err. V // 370 aditantes err. V.