De amore coniugali

Liber I

_________________________________________________________

II.

Carmen nuptiale

Tybicinem alloquitur

Hos numeros, tibicen, ama atque hos incipe cantus,

et placidos festa concine luce modos.

Primus Hymen trucibus mollivit corda puellis

atque animos facili contudit arte feros,

5

primus inexpertos vinclo sociavit amores,

legitimo statuens debita jura toro,

et primus gratae decerpto flore juventae

primitias Veneris et sua dona tulit.

Hos numeros, tibicen, ama atque hos incipe cantus,

10

et placidos festa concine luce modos.

Hic docuit lentis innectere colla lacertis

atque renudato jungere membra sinu,

hic rixas pacemque simul, nunc ore recluso,

et nunc consertis oscula ferre labris,

15

hic lingua titubante loqui, dum spiritus udo

gutture, dum querulo ducitur ore sonus.

Hos numeros, tibicen, ama atque hos incipe cantus,

dum texunt virides laurea serta fores.

Hoc primum virgo didicit bene culta magistro

20

et femur et lateri conseruisse latus,

atque inter questusque leves et murmura nota

nunc has, nunc alias arte novare vices,

dum gratus resilit membris tepor, imaque venis

it venus, et fesso corpore languet amor.

25

Hos numeros, tibicen, ama atque hos incipe cantus,

dum texunt virides laurea serta fores.

Quis fulgor? Deus, ecce deus. Nunc ore favete,

desine et impariles, tibia, ferre modos:

sanctus adest coetusque suos invisere gaudet,

30

castaque conjugio nectere vincla parat,

atque haec ut placitis firmet connubia votis,

talia divino sancit ab ore deus:

«Has ego felici jungo nunc omine dextras;

dic, juvenis, dic tu, bella puella: «Placet».

35

«En placet»: ore tuos, juvenis, nunc excipe amores,

oscula neu, virgo, prima dedisse neges.

Convenit: dedit hic, accepit et illa. Pudicum

hoc est. Quid vultus, scita puella, rubes?

Atque oculis animum fas est atque ore fateri,

40

gaudia neu tacito, virgo, reconde sinu.

Caetera nox et nos et Amor lectusque docebunt;

haec tu nunc fidei pignora certa cape.

Quam bene, quod digitis aurum perlucet in istis;

anulus hic vobis, quod scit uterque, dabit.

45

Ite pares, paribusque animis in vota juventae,

et sua concordi reddite jura toro,

jungat Amor, quos junxit Hymen taedaeque jugales:

quae juvenes, teneat haec quoque cura senes.»