Vita S. Elisabeth

Liber VI

________________________________________________________________

CAPUT II

De transitu ejus in Marpurg

HIS itaque gestis, timens tumultum seculi et fallaciam; non multo post tempore Thuringiam, in qua gloriose cum viro vixerat, declinans, in Marpurg Magistrum secuta est. Quo cum pervenisset, nec ibi propter quorundam aemulorum suorum persecutionem, convenienter manere posset, ad quandam rurensem villam se contulit. Et ne cuiquam esset oneri, quandam desolatam curiam ingressa, dum commodiorem ibi non inveniret locum, sub gradu cujusdam caminatae se recepit, frondibus se protegens et obumbrans. Cibos ibi, prout habere poterat, praeparavit, gratias agens Deo: solis ardorem, ventorum turbinosum insultum fumique molestiam, ejus oculis gravissimam, cum gaudio sustinebat. Interim in oppido Marpurg constructa fuit ei de materia luti et lignorum domuncula et habitatio humilis, quam ingrediens ibidem cum suis in omni humilitate et patientia morabatur.