Vita S. Elisabeth

Liber V

________________________________________________________________

CAPUT III

Qualiter in Bamberg suscepta sint ossa

CUMQUE Bamberg appropinquassent, reliquiarum adventum Bambergensi Episcopo nunciaverunt. Tunc Pontifex filiam sororis suae reginae, Dei famulam Elizabeth, defuncti relictam, ut occurreret, et mariti quondam reliquias susciperet, advocavit. Ordinavit autem prudens pro honestate et consolatione Dei famulae, ut omnes nobiles et digniores in occursu funeris ejus assisterent lateri, et eam ne deficeret, confortarent. Processit itaque Praesul gloriosus, cum Religiosorum et Cleri civitatis multitudine veneranda obviam tanto funeri orationes et cantus lugubres modulantes. Murmurat campanarum sonus, ruit confluens undique populus, Religiosorum ac Cleri turba hymnis canora coelestibus usque in Ecclesiam cathedralem prosequitur. Salubris enim et sancta est exoratio pro defunctis.