Liber de rebus in

administratione sua gestis

____________________________________________________________

XXXI.

De tabula aurea superiori.

In tabula illa, quae ante sacratissimum corpus ejus assistit, circiter quadraginta duasmarcas auri posuisse nos aestimamus, gemmarum preciosarum multiplicem copiam, jacinctorum, rubetorum, saphirorum, smaragdinum, topaziorum, necnon et opus discriminantium unionum quantam nos reperire nunquam prae-[193]sumpsimus. Videres reges et principes, multosque viros praecelsos imitatione nostra digitos manuum suarum exanulare, et anulorum aurum et gemmas, margaritasque preciosas, ob amorem sanctorum Martyrum, eidem tabulae infigi praecipere. Nec minus etiam archiepiscopi et episcopi, ipsos suae desponsationis anulos ibidem sub tuto reponentes, Deo et Sanctis ejus devotissime offerebant. Venditorum etiam gemmariorum tanta de diversis regnis et nationibus ad nos turba confluebat, ut non plus emere quaereremus quam illi vendere sub amministratione omnium festinarent. Versus etiam ejusdem tabulae hi sunt:

Magne Dionysi, portas aperi Paradisi,

Suggeriumque piis protege praesidiis.

Quique novam cameram per nos tibi constituisti,

In camera coeli nos facias recipi,

Et pro praesenti, coeli mensa satiari.

Significata magis significante placent.

Quia igitur sacratissima dominorum nostrorum corpora in volta superiore quam nobilius potuimus locari oportuit, quadam de collateralibus tabulis sanctissimi eorum sarcofagi nescimus qua occasione erepta, quindecim marcas auri reponendo, ulteriorem frontem ejusdem et operturam superiorem undique inferius et superius deaurari quadraginta ferme unciis elaboravimus. Tabulis etiam cupreis fusilibus et deauratis, atque politis lapidibus impactis propter interiores lapideas voltas, necnon et januis continuis ad arcendos populorum tumultus, ita tamen ut venerabiles personae, sicut decuerit, ipsa sanctorum corporum continentia vasa cum magna devotione et lacrymarum profusione [194] videre valeant, circumcingi fecimus. Eorumdem vero sanctorum tumulorum hi sunt versus:

Sanctorum cineres ubi coelicus excubat ordo,

Plebs rogat et plorat, clerus canit in decachordo,

Spiritibus quorum referuntur vota piorum;

Cumque placent illis, mala condonantur eorum.

Corpora sanctorum sunt hic in pace sepulta,

Qui post se rapiant nos orantes prece multa.

Hic locus egregium venientibus extat asylum;

Hic fuga tuta reis, subjacet ultor eis.