Liber de rebus in

administratione sua gestis

____________________________________________________________

XV.

De Belna.

Sane inter alias una de melioribus beati Dionysii possessionibus in pago Guastinensi Belna {Vulgo Beaune-la-Rolande} dinoscitur, quae etiam spatiosa fere quatuor leugarum spatio, frumenti et vini opulentia ferax, quorumcumque fruc-[175]tuum mirabiliter capax, si non vexetur a servientibus domini regis, seu nostris, omnibus bonis exuberat. Quae, per incuriam procuratorum raro inculta habitatore, ad tantam declinaverat inopiam, ut, cum ad cameram calciamentorum ecclesiae hujus pertineret, nullo modo ea persolvere valeret. Inde erat quod, cum in manu abbatis pro defectu debiti remaneret, singulis annis servientibus ejusdem terrae pro triginta libris totaliter eam locabat. Quam cum dissipatam et pene in solitudinem redactam in novitate praelationis nostrae reperissemus, charissimo domino nostro regi Francorum Ludovico, cujus nobilitali tam devote quam fideliter deservire satagebamus, tantum ecclesiae detrimentum exposuimus. Qui etiam in hac terra intolerabiles et pene consumptivas consuetudines habebat, videlicet tres in anno procurationes, unam de collecta rusticorum, sufficientem tam sibi quam suis amministrantibus, duas de propriis redditibus Sancti Dionysii, qua calamitate terra penitus consumebatur. Qui, ut erat eximiae liberalitatis, ecclesiae tantum detrimentum et pauperum angarias miseratus, amoris et servicii nostri benivolus, procurationem illam de dominicatura ecclesiae et nobis in perpetuum relaxavit. Illam vero, quae fiebat de collecta rusticorum, octo librarum debito singulis annis sub praecepto regiae majestatis firmavit. Cujus exhilarati beneficio, usurpatas et alienatas tam a majore quam ab aliis ter-[176]ras nobis retraximus; clausos vinearum, videlicet apud Sanctum Lupum {Nunc etiam Saint-Loup-des-Vignes, juxta Belnam}, a viginti annis aratris redditos replantari fecimus; alias vineas juxta Belnam pene destructas restitui fecimus; alias a quodam homine nostro viginti libris Aurelianensis monetae emimus; villas omnino rapinis exhospitatas rehospitari fecimus.