De Nugis Curialium

Distincio quarta

____________________________________________________________

IV.

Conclusio

epistule premisse

Dura est manus cirurgi,d sed sanans. Durus est et hic sermo, sed sanus, et tibi utinam tam utilis quam deuotus. Artam, ut ais, infligo tibi uiuendi regulam: esto. Arta enim est uia que ducit ad uitam, nec est semita plana qua itur ad gaudia plena; immo eciam ad mediocria per salebras euadimus Audiuit Iason quod per mare adhuc tunc nullis deuirginatum ratibus aut remis, et per tauros sulfureos, et per toxicate serpentis uigilias sibi uiandum esset ad aureum uellus; et sano consilio licet non suaui usus abiit et rediit et optabilem thesaurum rettulit Sic absinthium ueritatis acceptat morose mentis humilitas, fecundat officiosa sedulitas, in fructum producit perseuerancie utilitas. Sic sementem asserit pincerna pluuiarum Auster, consolidat scopa uiarum Aquilo, in ubertatem promouet florum creator Zephirus. Sic dura principia dulci fine munerantur; sic artus callis ad ampla ducit palacia; sic angustus trames ad terram uiuencium.

Sed, ut maiorum testimonio michi fides habeatur, lege Aureolum Theofrasti et Medeam Nasonis, et uix pauca inuenies impossibilia mulieri.