Evangelistarium

fol. 98v-99r

Lc. 17:11-19

____________________________________________________________

Manuscriptum

Dominica XV post pentecosten.

Sequentia sancti evangelii

secundum Lucam.

17:11

In illo tempore. Dum iret Ihesus in Hierusalem, transibat per mediam Samariam et Galilaeam.

17:12

Et cum ingrederetur quoddam castellum, occurrerunt ei decem viri leprosi, qui steterunt a longe:

17:13

et levaverunt vocem, dicentes: Ihesu praeceptor, miserere nostri.

17:14

Quos ut vidit, dixit: Ite, ostendite vos sacerdotibus. Et factum est, dum irent, mundati sunt.

17:15

Unus autem ex illis, ut vidit quia mundatus est, regressus est, cum magna voce magnificans Deum,

17:16

et cecidit in faciem ante pedes eius, gratias agens: et hic erat Samaritanus.

17:17

Respondens autem Ihesus, dixit: Nonne decem mundati sunt? et novem ubi sunt?

17:18

Non est inventus qui rediret, et daret gloriam Deo, nisi hic alienigena.

17:19

Et ait illi: Surge, vade: quia fides tua te salvum fecit.