Evangelistarium

fol. 88r-88v

Mt. 16:13-19

____________________________________________________________

Manuscriptum

In natali Sancti Petri apostoli.

Sequentia sancti evangelii

secundum Matthaeum

16:13

In illo tempore. Venit Ihesus in partes Caesareae Philippi: et interrogabat discipulos suos, dicens: Quem dicunt homines esse Filium hominis?

16:14

At illi dixerunt: Alii Iohannem Baptistam, alii autem Eliam, alii vero Hieremiam, aut unum ex prophetis.

16:15

Dicit illis Ihesus: Vos autem, quem me esse dicitis?

16:16

Respondens Simon Petrus dixit: Tu es Christus, Filius Dei vivi.

16:17

Respondens autem Ihesus, dixit ei: Beatus es Simon Bar Iona: quia caro et sanguis non revelavit tibi, sed Pater meus, qui in caelis est.

16:18

Et ego dico tibi, quia tu es Petrus, et super hanc petram aedificabo Ecclesiam meam, et portae inferi non praevalebunt adversus eam.

16:19

Et tibi dabo claves regni caelorum. Et quodcumque ligaveris super terram, erit ligatum et in caelis: et quodcumque solveris super terram, erit solutum et in caelis.