Evangelistarium

fol. 72v-73r

Ih. 20:19-31

____________________________________________________________

Manuscriptum

Dominica octava paschae

Sequentia sancti evangelii

secundum Iohannem

20:19

In illo tempore. Cum esset sero die illo, una sabbatorum, et fores essent clausae, ubi erant discipuli congregati propter metum Iudaeorum: venit Ihesus, et stetit in medio, et dicit eis: Pax vobis.

20:20

Et cum hoc dixisset, ostendit eis manus et latus. Gavisi sunt discipuli, viso Domino.

20:21

Dixit ergo eis iterum: Pax vobis. Sicut misit me Pater, et ego mitto vos.

20:22

Hoc cum dixisset, insufflavit, et dicit eis: Accipite Spiritum Sanctum:

20:23

quorum remiseritis peccata, remittuntur eis: et quorum retinueritis, retenta sunt.

20:24

Thomas autem unus ex duodecim, qui dicitur Didymus, non erat cum eis quando venit Ihesus.

20:25

Dixerunt ergo ei alii discipuli: Vidimus Dominum. Ille autem dixit eis: Nisi videro in manibus eius figuram clavorum, et mittam digitum meum in locum clavorum, et mittam manum meam in latus eius, non credam.

20:26

Et post dies octo, iterum erant discipuli eius intus, et Thomas cum eis. Venit Ihesus ianuis clausis, et stetit in medio, et dixit: Pax vobis.

20:27

Deinde dicit Thomae: Infer digitum tuum huc, et vide manus meas, et adfer manum tuam, et mitte in latus meum: et noli esse incredulus, sed fidelis.

20:28

Respondit Thomas, et dixit ei: Dominus meus et Deus meus.

20:29

Dicit ei Jesus: Quia vidisti me, credidisti: beati qui non viderunt, et crediderunt.

20:30

Multa quidem et alia signa fecit Ihesus in conspectu discipulorum suorum, quae non sunt scripta in libro hoc.

20:31

Haec autem scripta sunt ut credatis, quia Ihesus est Christus Filius Dei: et ut credentes, vitam habeatis in nomine eius.