Amphitruo

Actus III

______________________________________________________________________________

Scaena III.

Sosia. Ivppiter. Alcvmena.

956

Sosia Ámphitruo, assum. sí quid opus est, impera, imperium éxequar.

Iuppiter <Sosia,> optume advenis. Sosia Iam pax est inter vos duos?

nam quia vos tranquillos video, gaudeo et volup est mihi.

atque ita servom par videtur frugi sese instituere:

960

proinde eri ut sint, ipse item sit; voltum e voltu comparet:

tristis sit, si eri sint tristes; hilarus sit, si gaudeant.

sed age responde: iam vos rediistis in concordiam?

Iuppiter Derides, qui scis haec dudum me dixisse per iocum.

Sosia An id ioco dixisti? équidem serio ac vero ratus.

965

Iuppiter Habui expurigationem; facta pax est. Sosia Optume est.

Iuppiter Ego rem divinam intus faciam, vota quae sunt. Sosia Censeo.

Iuppiter Tu gubernatorem a navi huc evoca verbis meis

Blepharonem, qui re divina facta mecum prandeat.

Sosia Iam hic ero, cum illic censebis esse me. – Iuppiter Actutum huc redi.

970

Alcumena Numquid vis, quin abeam iam intro, ut apparentur quibus opust?

Iuppiter I sane, et quantum potest parata fac sint omnia.

Alcumena Quin venis quando vis intro? faxo haud quicquam sit morae. –

Iuppiter Recte loquere et proinde diligentem ut uxorem decet.

iam hisce ambo, et servos et era, frustra sunt duo,

975

qui me Amphitruonem rentur esse: errant probe.

nunc tu divine húc fac adsis Sosia

(audis quae dico, tam etsi praesens non ades),

fac Amphitruonem ádvenientem ab aedibus

ut abigas; quovis pacto fac commentus sis.

980

volo déludi illunc, dum cum hac usuraria

uxore nunc mihi morigero. haec curata sint

fac sis, proinde adeo ut velle med intellegis,

atque ut ministres mihi, mihi cum sacruficem.