Carmina

Carmen LXXII

[ad Lesbiam.]

_________________________________________________________

metrum: distichon dactylicum

Dicebas quondam solum te nosse Catullum,

Lesbia, nec prae me velle tenere Iovem.

dilexi tum te non tantum, ut vulgus amicam,

sed pater ut gnatos diligit et generos.

5

nunc te cognovi: quare etsi impensius uror,

multo mi tamen es vilior et levior.

«qui potis est?» inquis. quod amantem iniuria talis

cogit amare magis, sed bene velle minus.