Libro de los estados

El segundo libro

___________________________________________________

[Capítulo XLVII]

[El xlvii° capítulo fabla en cómmo Julio dixo al infante qual es el estado de los abades.]

«Sennor infante,» dixo Julio, «en pos el estado de los obispos son algunos que llaman abades de algunos llogares sennalados. Et estos abades son de muchas maneras; ca algunos ay que son abades de croça et mitra et aniello, et an juridiçion en sus abadías bien commo obispos; et otros ay que an abadías que las an a dar los obispos et los arçobispos; et otras que las an a dar los rreys.

Et porque son las abadías et las jurediçiones de los abades en muchas maneras, por ende non se puede dezir todo en este libro. Mas comunalmente son en la Eglesia un estado menores que los {122b} obispos et mayores que los (otros) canónigos. Et estos abades pueden meresçer o desmeresçer segund la jurediçion que an cada unos en sus abadías, et segund la manera de las obras que fizieron.»

«Julio,» dixo el infante, «pues en el estado de los abades me avedes dicho lo que cunple, fabladme en los otros estados de la Eglesia commo me fablastes fasta agora.»