Libro de los estados

El segundo libro

___________________________________________________

[Capítulo XXXIX]

El xxxix[°] capítulo fabla en cómmo Julio dixo al infante en cómmo el papa puede desmereçer, non partiendo el iii[°] tesoro, que es en la justiçia, commo deve.

«Otrosí, el terçero tesoro de la Eglesia puede desmeresçer mucho el papa non obrando en él commo deve. Ca justiçia non es al sinon dar a cada uno lo que meresçe, et la justiçia tan egual deve seer en unos commo en otros.

Et dezirvos he un exemplo que dixo una vegada un ric omne a un rey. Acaesçió que aquel rey començó a regnar nuevamente et un día, pedricando a sus gentes, fablóles mucho en la justiçia. Et desque ovo su pedricaçión acabada respondiól aquel ric omne, et entre las otras rrazones díxol que la justiçia del rrey que devía seer commo rred de omne, mas non commo red de aranna; ca la red del aranna, si pasa por ý un páxaro o otra ave mayor, quebrántala et vase, mas (mas) si pasa por ý una mosca non la puede quebrantar, porque la mosca es muy flaca et finca ý presa. Mas la buena rred que faze el omne, nin ave nin venado nin otra cosa que por ella pase non la puede quebrantar. Et así la justiçia tal deve ser que por grande o por pequenno que sea el omne, si buena obra fiziere, sienpre le deve ser gualardonada; et si fiziere mal o tuerto non es justiçia derecha si se non cunple tanbién contra el que es poderoso commo contra el que lo non es tanto. Ca si quiere el Evangelio non dize que son vienandantes {118d} solamente los que fazen la justiçia, mas dizen que son vienandantes los que (dezir) sufren persecutiones por la justiçia.

Pues quando el papa, por reçelo o por voluntad o por otra cosa qualquier, faziendo graçias o perdones o despensaçiones o legitimationes, non devidamente ý dexa de conplir justiçia, gualardonando las buenas obras et escarmentando et castigando las malas, vos entendedes si puede desmeresçer o desmeresçer mucho en non obrar commo deve en el partir deste tesoro de la justiçia. Ca commo quier que por el poderío conplido que ha puede fazer mucho, si quisiere obrar commo deve, non deve usar deste poder sinon bien et en justiçia.»