Ἀνθολογία Παλατινή

15. Σύμμικτα

______________________________________________________________________

34.

ΤΟΥ ΑΥΤΟΥ

Εἰς Φεβρωνίαν μοναχήν

Δρᾶσέ τί που καὶ νερτερίοις μετὰ πνεύμασιν ἀνδρῶν

Φεβρωνία ἑῆς σύμβολα συμπαθίης,

εἴ τις κἀνθάδε χρειὼ ἀφνειῶν ἦε πένησιν·

οὐδὲ γὰρ οὐδ᾽ αὐτοῦ τῆς σφετέρης ἐς ἅπαν

5

ψυχαὶ λήθονται μεγαθύμων εὐεργείης·

ἔμπα γε μὴν αἰὼν ἡμετέρου βιότου

ἄρκιος εἴη θεῖον ἐπὶ προέμεν θάλαμόν μιν

Χριστοῦ, τόν ῥα νυὸν σεμνὸν ἕλ᾽ ἀφθορίης

λαμπάδ᾽ ἐλαίωι φαιδρύνουσα φιλοπτωχείης·

10

ἧς τόδε σῆμ᾽ ὕπνου γνῶθι πολυχρονίου.