Ἀνθολογία Παλατινή

4. Προοίμια

 

______________________________________________________________________

2.

ΦΙΛΙΠΠΟΥ ΣΤΕΦΑΝΟΣ

Ἄνθεά σοι δρέψας Ἑλικώνια καὶ κλυτοδένδρου

Πιερίης κείρας πρωτοφύτους κάλυκας

καὶ σελίδος νεαρῆς θερίσας στάχυν ἀντανέπλεξα

τοῖς Μελεαγρείοις ὡς ἴκελον στεφάνοις.

5

ἀλλὰ παλαιοτέρων εἰδὼς κλέος, ἐσθλὲ Κάμιλλε,

γνῶθι καὶ ὁπλοτέρων τὴν ὀλιγοστιχίην.

Ἀντίπατρος πρέψει στεφάνωι στάχυς· ὡς δὲ κόρυμβος

Κριναγόρας, λάμψει δ᾽ ὡς βότρυς Ἀντίφιλος,

Τύλλιος ὡς μελίλωτον, ἀμάρακον ὣς Φιλόδημος·

10

   μύρτα δ᾽ ὁ Παρμενίων, ὡς ῥόδον Ἀντιφάνης·

κισσὸς δ᾽ Αὐτομέδων, Ζωνᾶς κρίνα, δρῦς δὲ Βιάνωρ,

Ἀντίγονος δ᾽ ἐλάη καὶ Διόδωρος ἴον·

Εὐήνωι δάφνην συνεπίπλεκε· τοὺς δὲ περισσοὺς

εἴκασον οἷς ἐθέλεις ἄνθεσιν ἀρτιφύτοις.