bibliotheca Augustana


	Nonnos floruit ca. 450
		Δ ι ο ν υ σ ι α κ ῶ ν Ε Πέμπτον ἔτι σκοπίαζε καὶ Ἀκταίωνα νοήσεις τὸν κεμὰς οὐκ ὤδινε, κυνοσπάδα νεβρὸν ἀλήτην. ________________________________________________ Ἀλλ᾽ ὅτε δὴ πολέμων ὀφιώδεα λήια κείρων Κάδμος ὀδοντοφύτων καλάμην ἤμησε Γιγάντων, σπένδων λύθρον Ἄρηι θαλύσια δηιοτῆτος, φαιδρύνας ἑὰ γυῖα δρακοντοβότωι παρὰ Δίρκηι 5 Δελφίδα βοῦν ἱέρευσε θεοδμήτων ἐπὶ βωμῶν, Παλλάδι καλὸν ἄγαλμα. καταρχομένου δὲ θυηλὰς δίζυγες ἔνθα καὶ ἔνθα περιρραίνοντο κεραῖαι οὐλοχύταις· ὁ δὲ γυμνὸν ἑλὼν παρὰ γείτονι μηρῶι φάσγανον Ἀσσυρίοιο παρήορον ἐκ τελαμῶνος 10 ἀκροτάτην τρίχα τάμνε τανυρρίνοιο καρήνου ἄορι κωπήεντι· Θεοκλύμενος δὲ κεραίης δραξάμενος μόσχοιο παλίντονον εἴρυσε δειρήν, αὐχενίους δὲ τένοντας ἀπηλοίησε Θυέστης ἀμφιτόμωι βουπλῆγι, καὶ αἱμαλέωι βοὸς ὁλκῶι 15 λάινος Ὀγκαίης ἐρυθαίνετο βωμὸς Ἀθήνης, καὶ βοέου κερόεντος ἀρασσομένοιο μετώπου πρηνὴς μόσχος ἔπιπτε· δαϊζομένης δὲ σιδήρωι πλευρὰ διατμήξαντες ἐμιστύλλοντο μαχαίρηι, καὶ βοέην τρηχεῖαν ἐγυμνώσαντο καλύπτρην 20 ἐκταδίην· ὁ δὲ φαιδρὸν ἐπὶ χθονὶ φᾶρος ἑλίξας αὐτὸς ἄναξ πεπόνητο, καὶ εὐφυέων κρέα μηρῶν ὡμὰ διατμήξας ἐκαλύψατο δίζυγι δημῶι μιστύλλων κατὰ βαιόν, ἐπ᾽ ἀνθρακιῆι δὲ τανύσσας σπλάγχνα σιδηρείοισι πεπαρμένα μακρὰ κορύμβοις 25 εἴρυσεν, ὀπτήσας ἁπαλῶι πυρί· μεσσοπαγῆ δὲ ἀκροπόρωι στοιχηδὸν ἄγων τετορημένα χαλκῶι ἀνθοκόμου κατέθηκε χαμαιζήλοιο τραπέζης δαιτρός, ἐπασσυτέρους ὀβελοὺς ζείοντας ἀείρας. καὶ θυόεις ἐλέλικτο δι᾽ ἠέρος ἀτμὸς ἀλήτης 30 Ἀσσυρίης λιβάνοιο. τελειομένης δὲ θυηλῆς δεῖπνον ἔην, καὶ Κάδμος ἑλὼν ἐπένειμεν ἑκάστωι κεκριμένης ὀρέγων ἰσοελκέα μοῖραν ἐδωδῆς. δαιτυμόνων δὲ φάλαγγες ἐπ᾽ εὐκύκλοιο τραπέζης εἰλαπίνης ἀπέθεντο πόθον κεκορηότι θυμῶι. 35 οὐδὲ δρακοντοφόνωι καμάτων τέλος ἔπλετο Κάδμωι, ἀλλὰ μεθ᾽ ἑρπηστῆρα, μετ᾽ ἄγρια φῦλα Γιγάντων, Ἐκτήνων προμάχοισι καὶ Ἄονι μάρνατο λαῶι βάρβαρον ἀμώων στάχυν Ἄρεος, ἀγχιπόροις δὲ ἔχραε Τεμμίκεσσι· καλεσσαμένωι δὲ μαχητὰς 40 ποικίλος ἐσμὸς ἵκανε περικτιόνων ἐπικούρων. καὶ διδύμαις στρατιῆισιν Ἔρις ξύνωσεν ἐνυὼ φύλοπιν ὡδίνουσα· συνερχομένων δὲ κυδοιμῶι τόξον ἐκυκλώθη, δόρυ πάλλετο, σείετο πήληξ, καὶ βέλος ἐρροίζησεν, ἐπ᾽ ὀμφαλόεντι δὲ κύκλωι 45 βαλλομένη μυλόεντι λίθωι σμαράγησε βοείη. καὶ κταμένων ῥέεν αἷμα· πολὺς δ᾽ ἐπὶ φορβάδι γαίηι ἡμιθανὴς προκάρηνος ἀνὴρ κεκύλιστο κονίηι. καὶ στρατὸς ἀντιβίων ἱκέτης ἐκλίνετο Κάδμωι· λῦτο δ᾽ ἀγών. φονίην δὲ μετὰ στροφάλιγγα κυδοιμοῦ 50 Κάδμος ἀπυργώτοιο θεμείλια πήγνυε Θήβης. πολλαὶ δ᾽ ἔνθα καὶ ἔνθα μεριζομένων κενεώνων αὔλακες ἐτμήγοντο, πολυσχιδέων δὲ κελεύθων ἕδρανα καρχαρόδοντι βοῶν κεχάρακτο σιδήρωι· πολλαὶ δ᾽ ἀντιπόρων ἀνέμων τετράζυγι κόσμωι 55 +γειομόρων σπάρτοισιν+ ἐμετρήθησαν ἀγυιαί. καὶ πόλις Ἀονίη Τυρίης ποικίλλετο τέχνης κάλλεϊ λαϊνέωι· καὶ ἐποίπνυεν ἄλλος ἐπ᾽ ἄλλωι γειοτόμωι γλωχῖνι ταμὼν ἑτερόχροα πέτρην ἐργατίνης Βοιωτὸν ὑπὸ κλέτας, ἣν παρὰ λόχμηι 60 Τευμησσοῦ δρυόεντος ἐμαιώσαντο κολῶναι, ἣν Ἑλικὼν βλάστησε καὶ ἣν ὤδινε Κιθαιρών. καὶ νηοὺς ἐτέλεσσε θεῶν καὶ δώματα φωτῶν τορνώσας κανόνεσσιν· ἐπ᾽ ἀρρήκτοις δὲ δομαίοις ἑπταπόρωι πυλεῶνι περίδρομον ἄστυ χαράξας 65 οὐρανὸν ἑπτάζωνον ἑῆι μιμήσατο τέχνηι, ἐσσόμενον ναέταις Ἀμφίονι τεῖχος ἐάσσας πυργοδόμωι κιθάρηι πεφυλαγμένον. οὐρανίοις δὲ ἑπτὰ πύλας ἀνέθηκεν ἰσηρίθμοισιν ἀλήταις ἰσοτύπους· πρῶτον μὲν ἐς ἑσπέριον κλίμα πήξας 70 Ὀγκαίην ἐπένειμε πύλην γλαυκώπιδι Μήνηι ἐκ βοὸς ὀγκηθμοῖο φερώνυμον, ὅττι καὶ αὐτὴ ταυροφυὴς κερόεσσα βοῶν ἐλάτειρα Σελήνη τριπλόον εἶδος ἔχουσα πέλει Τριτωνὶς Ἀθήνη· δεύτερον Ἑρμάωνι διαυγέι γείτονι Μήνης 75 δῶκε γέρας πυλεῶνα· διαγράψας δὲ τετάρτην Ἠλέκτρην Φαέθοντος ἐπώνυμον, ὅττι φανέντος σύγχροος ἠλέκτροις ἀμαρύσσεται ὄρθριος αἴγλη, Ἠελίωι πυρόεντι πύλην ἀντώπιον Ἠοῦς μεσσατίην ἀνέθηκεν, ἐπεὶ μέσος ἐστὶ πλανήτων· 80 πέμπτην δ᾽ Ἄρεϊ δῶκε, πόρε τριτάτην Ἀφροδίτηι, ἀμφοτέρων ἑκάτερθεν ὅπως Φαέθων μέσος εἴη, γείτονα θοῦρον Ἄρηα διατμήγων Ἀφροδίτης· ἕκτην Ζηνὸς ἄγαλμα φαεινοτέρωι κάμε κόσμωι ὑψιφανῆ· πυμάτην δὲ Κρόνου λάχεν ἕβδομος ἀστήρ. 85 τοῖον ἕδος ποίησε· καὶ ἱερὸν ἄστυ πολίσσας Αἰγυπτίης ἐκάλεσσεν ὁμώνυμον ἄστεϊ Θήβης, ποικίλον ἀσκήσας χθόνιον τύπον ἶσον Ὀλύμπωι. Ἀονίων δὲ θύγατρες ἀνεκρούσαντο χορείαις Ἁρμονίης ὑμέναιον· ἐπ᾽ εὐθαλάμωι δὲ μελάθρωι 90 Θρηικίης φθέγξαντο χορίτιδες οὔνομα νύμφης. καὶ Παφίη νεότευκτον ἐκόσμεε παστάδα Κάδμωι παιδὸς ἑῆς μέλπουσα θεοκλήτους ὑμεναίους μήτηρ ἱμερόεσσα· πατὴρ δ᾽ ὑπὸ χάρματι κούρης γυμνὸς ἄτερ σακέων ὡρχήσατο μείλιχος Ἄρης 95 δεξιτερὴν ἀσίδηρον ἐπικλίνων Ἀφροδίτηι, καὶ γαμίηι σάλπιγγι μελίζετο ῥυθμὸν Ἐρώτων ἀντίτυπον σύριγγι, σιδηροφόρου δὲ καρήνου ἠθάδας εὐπολέμοιο λόφους ἀπεσείσατο χαίτης, μιτρώσας πλοκαμῖδας ἀναιμάκτοισι κορύμβοις, 100 πλέξας κῶμον Ἔρωτι· σὺν ἀθανάτοις δὲ χορεύων εἰς γάμον Ἁρμονίης Ἰσμήνιος ἦλθεν Ἀπόλλων ἑπτατόνωι κιθάρηι φιλοτήσιον ὕμνον ἀράσσων· καὶ μέλος ἐκρούσαντο βιοσσόον ἐννέα Μοῦσαι, καὶ παλάμας ἐλέλιζε Πολύμνια, μαῖα χορείης, 105 μιμηλὴν δ᾽ ἐχάραξεν ἀναυδέος εἰκόνα φωνῆς, φθεγγομένη παλάμηισι σοφὸν τύπον ἔμφρονι σιγῆι, ὄμματα δινεύουσα· πολυστρέπτωι δὲ πεδίλωι, Ζηνὶ χαριζομένη, θαλαμηπόλος ἵστατο Νίκη, Κάδμον ἀνευάζουσα, Διὸς πρόμον, ἀμφὶ δὲ παστῶι 110 παρθενίοις στομάτεσσι γαμήλιον ἔπλεκε μολπήν, καὶ ποδὸς ἴχνος ἕλισσεν, ἐπ᾽ εὐκύκλωι δὲ χορείηι αἰδομένη πτερὰ πάλλε παρὰ πτερύγεσσιν Ἐρώτων. ἐκ δὲ πολυσπερέων δαΐδων ὁμοφεγγέος αἴγλης ἑσπερίης ἀνέτελλε φάος ψευδήμονος Ἠοῦς. 115 καὶ λιγυροῖς στομάτεσσι φιλοσκάρθμωι παρὰ παστῶι πάννυχος ἔπλετο κῶμος ἀκοιμήτοιο χορείης μελπομένων· σπεύδων γὰρ ἐς ἀγρύπνους ὑμεναίους . . . . . . . . . . . . . . . . . . . . . . . . . . . . . . . . . ἠθάδα ῥάβδον ἔλειπεν, ἐπεὶ ταμίη πέλεν ὕπνου. καὶ Θήβη χορὸς ἦεν Ὀλύμπιος· ἦν δὲ νοῆσαι 120 Κάδμον ὁμοῦ καὶ Ζῆνα μιῆς ψαύοντα τραπέζης. καὶ γαμίοις θαλάμοισι φέρων νυμφοστόλον ὥρην Ἀρκτώιης ἀνέτελλε Δράκων ὁμόφοιτος Ἁμάξης, ἄγγελος ἐσσομένων, ὅτι σύννομος ἥλικι νύμφηι ἐκ βροτέης ἤμελλεν ἔχειν ὀφιώδεα μορφὴν 125 νυμφίος Ἁρμονίης. μακάρων δέ τις ἄλλος ἐπ᾽ ἄλλωι εἰς θαλάμους σπεύδοντι γέρας δωρήσατο Κάδμωι· Ζεὺς μὲν πάντα τέλεια· κασιγνήτην δὲ γεραίρων Ἥρην πασιμέλουσαν, ἐπεὶ πέλεν Ἄρεϊ μήτηρ, ἵππιος ὤπασε δῶρα θαλάσσια Κυανοχαίτης· 130 Ἑρμῆς σκῆπτρον ἔδωκεν, Ἄρης δόρυ, τόξον Ἀπόλλων, καὶ στέφανον κομόωντα λίθων ἑτερόχροϊ κόσμωι Ἁρμονίης Ἥφαιστος ἐπηιώρησε καρήνωι, χρυσείην κροτάφοισιν ἐπικρεμάσας ἀναδέσμην· καὶ θρόνον εὐλάιγγα πόρε χρυσόθρονος Ἥρη 135 Ἄρεα κυδαίνουσα· πολυφράδμων δ᾽ Ἀφροδίτη χρύσεον ὅρμον ἔχοντα λίθων πολυδαίδαλον αἴγλην λευκὸν ἐρευθιόωντι συνήρμοσεν αὐχένι κούρης, Ἡφαίστου σοφὸν ἔργον, ὅ περ κάμε Κυπρογενείηι, τοξευτῆρος Ἔρωτος ὅπως ὀπτήριον εἴη· 140 ἔλπετο γὰρ Κυθέρειαν ἀεὶ βαρύγουνος ἀκοίτης υἷα τεκεῖν σκάζοντα, ποδῶν μίμημα τοκῆος· ἀλλὰ μάτην ἐδόκησε, καὶ ἀρτίπον υἷα νοήσας λαμπόμενον πτερύγεσσιν ὁμοίιον υἱέι· Μαίης ποικίλον ὅρμον ἔτευξεν, ὃς ἀστεροφεγγέι νώτωι 145 ὠς ὄφις ἦν ἑλικῶδες ἔχων δέμας· οἷα γὰρ αὐτὴ δίστομος ἀμφίσβαινα μέσωι μηρύεται ὁλκῶι ἰὸν ἀποπτύουσα δι᾽ ἀμφοτέροιο καρήνου, ἀμφελελιζομένη μελέων ἑτερόζυγι παλμῶι, ἐς κεφαλὴν δὲ κάρηνον ἐφερπύζουσα συνάπτει, 150 λοξῆι καμπύλα νῶτα περισκαίρουσα πορείηι· ὣς ὅ γε ποικίλος ὅρμος ἐαγότα νῶτα τιταίνων κάμπτετο, κυρτωθεῖσαν ἔχων διδυμάονα δειρήν, ἀμφιλαφὴς φολίδεσσιν ἐς ὀμφαλὸν ἄχρις ἱκάνων πλεκτὸς ὄφις δικάρηνος· ὑπὸ στροφάλιγγι δὲ τέχνης 155 χρύσεος ὁλκαίης ἐλελίζετο κύκλος ἀκάνθης, καί οἱ ἑλισσομένη κεφαλὴ πολυδινέι παλμῶι ψευδαλέον σύριγμα διήρυγεν ἀνθερεῶνος. καὶ στομάτων ἑκάτερθεν, ὅπηι τέλος ἐστὶ καὶ ἀρχή, αἰετὸς ἦν χρύσειος, ἅτε πλατὺν ἠέρα τέμνων, 160 ὀρθὸς ἐχιδναίων διδύμων μεσσηγὺ καρήνων, ὑψιφανὴς πτερύγων πισύρων τετράζυγι κόσμωι· τῆι μὲν ξανθὸς ἴασπις ἐπέτρεχε, τῆι δὲ Σελήνης εἶχε λίθον πάνλευκον, ὃς εὐκεράοιο θεαίνης λειπομένης μινύθει καὶ ἀέξεται, ὁππότε Μήνη 165 ἀρτιφαὴς σέλας ὑγρὸν ἀποστίλβουσα κεραίης Ἠελίου γενετῆρος ἀμέλγεται αὐτόγονον πῦρ· ἄλλη μάργαρον εἶχε φαεσφόρον, οὗ χάριν αἴγλης γλαυκὸν Ἐρυθραίης ἀμαρύσσεται οἶδμα θαλάσσης λαμπομένης· ἑτέρης δὲ μεσόμφαλος αἴθοπι κόσμωι 170 λεπτοφαὴς σέλας ὑγρὸν ἀπέπτυεν Ἰνδὸς ἀχάτης. ἀλλήλαις δ᾽ ἑκάτερθε συναπτομένων κεφαλάων χάσματα δισσὰ δράκοντος ἀνευρύνοντο καρήνων, αἰετὸν ἀμφοτέροισι περικλείοντα γενείοις σύμπλοκον ἔνθα καὶ ἔνθα· δι᾽ εὐφαέος δὲ προσώπου 175 λυχνίδες ἠκόντιζον ἐν ὄμμασι σύμφυτον αἴγλην ὀξὺ σέλας πέμπουσαν, ὁμοίιον αἴθοπι λύχνωι ἁπτομένωι. κομόων δὲ λίθων πολυειδέι μορφῆι πόντος ἔην, γλαυκῆς δὲ λίθος χλοάουσα μαράγδου δεξαμένη κρύσταλλον ὁμόζυγον εἴκελον ἀφρῶι 180 εἶχε φαληριόωντα μελαινομένης τύπον ἅλμης· τῶι ἔνι δαίδαλα πολλὰ τετεύχατο, τῶι ἔνι πάντα χρυσοφαῆ μάρμαιρεν ἁλίτροφα πώεα λίμνης, οἷα περισκαίροντα· πολὺς δέ τις ὑγρὸς ὁδίτης μεσσοφανὴς ἐχόρευεν ἐπιξύων ἅλα δελφίς, 185 ψευδαλέην δ᾽ ἐλέλιζεν ἑὴν αὐτόσσυτον οὐρήν· ... καὶ χορὸς ὀρνίθων ἑτερόχροος, ὧν τάχα φαίης ἱπταμένων πτερύγων ἀνεμώδεα δοῦπον ἀκούειν Οἷον . . . . . . . . . . . . . . . . . . . . . . . . . . . . ὅρμον ἑῆι Κυθέρεια γέρας δωρήσατο κούρηι χρύσεον, εὐλάιγγα, παρήορον αὐχένι νύμφης. 190 καὶ γαμίων ζευχθεῖσα πόθων ἰθύντορι κεστῶι Ἁρμονίη πολύπαιδα γονὴν μαιώσατο κόλπωι τικτομένην κατὰ βαιόν· ἀμοιβαίηι δὲ λοχείηι ἔγκυον ὄγκον ἔλυσε θυγατρογόνου τοκετοῖο, τετράκις ἐννέα κύκλα διαπλήσασα Σελήνης. 195 πρώτη δ᾽ Αὐτονόη γονίμων ἀνεπήλατο κόλπων μητέρος ἐννεάμηνον ἀναπτύξασα λοχείην πρωτοτόκοις ὡδῖσιν· ὁμογνήτωι δὲ γενέθληι καλλιφυὴς Ἀθάμαντος ἀέξετο σύγγαμος Ἰνώ, μήτηρ δισσοτόκος· τριτάτη δ᾽ ἀνέτελλεν Ἀγαύη, 200 ἥ ποτε νυμφευθεῖσα Γιγαντείοις ὑμεναίοις εἴκελον υἷα λόχευσεν ὀδοντοφύτωι παρακοίτηι· καὶ Χαρίτων ἴνδαλμα ποθοβλήτοιο προσώπου Ζηνὶ φυλασσομένη Σεμέλη βλάστησε τετάρτη θυγατέρων, μούνηι δὲ καὶ ὁπλοτέρηι περ ἐούσηι 205 δῶκεν ἀνικήτοιο φύσις πρεσβήια μορφῆς. ἄρσενα δ᾽ ὀψιτέλεστον ὁμόζυγα θήλεϊ φύτληι Ἁρμονίη νέον υἷα γεγηθότι γείνατο Κάδμωι, Ἀονίης Πολύδωρον ἑωσφόρον ἀστέρα πάτρης, ὁπλότερον Σεμέλης ῥοδοειδέος, ὃν παρὰ Θήβαις 210 σκῆπτρα λαβὼν ἀθέμιστος ἄναξ ἀπενόσφισε Πενθεύς. καὶ τὰ μὲν ὣς ἤμελλε γέρων χρόνος ὀψὲ τελέσσαι· κεκριμένας δὲ θύγατρας ἐπεκλήισεν ἀκοίταις Κάδμος ἀμοιβαίοιο γάμου τετράζυγι παστῶι, καὶ λέχος ἄλλο μετ᾽ ἄλλο συνήρμοσε· δωροφόρος γὰρ 215 πρῶτος Ἀρισταῖος, Νόμιος καὶ ἐπώνυμος Ἀγρεύς, αἷμα σοφοῦ Φοίβοιο καὶ εὐπαλάμοιο Κυρήνης, Αὐτονόην ζυγίων ἀρότων νυμφεύσατο θεσμῶι· οὐ μὲν Ἀγηνορίδης πολυφερβέος ἴδμονα τέχνης γαμβρὸν ἔχειν ἀπέειπε, βιοσσόον υἱέα Φοίβου, 220 ἀλλὰ Διιπετέων ἀνέμων ζωαρκέσιν αὔραις λοίγιον εὐνήσαντι πυρώπιδος ἀστέρα Μαίρης παῖδα συνεκλήισε περισσονόωι παρακοίτηι. καὶ γάμος ἦν πολύολβος, ἐπεὶ γέρας ἄζυγι κούρηι δῶκε βόας, πόρεν αἶγας, ὀρίτροφον ὤπασε ποίμνην· 225 καὶ πολὺς ἀχθοφόρωι βεβαρημένος ἐσμὸς ἀνάγκηι φόρτον ἐλαιήεντος ἐκούφισεν ἀμφιφορῆος, ἕδνα γάμων, πολλὴν δὲ σοφῆς ἐκόμισσε μελίσσης δαιδαλέην ὡδῖνα πολυτρήτοιο λοχείης. κεῖνος ἀνὴρ πρώτιστος ὀρίδρομος ἅλματι ταρσῶν 230 εὗρε φιλοσκοπέλοιο πόνον κεμαδοσσόον ἄγρης, πῶς νοερῶι μυκτῆρι παρὰ σφυρὰ φορβάδος ὕλης θηρὸς ἀσημάντοιο κύων μαντεύεται ὀδμήν, ὄρθια λοξοκέλευθον ἐπὶ δρόμον οὔατα τείνων, καὶ δολίης δεδάηκε πολύπλοκα δίκτυα τέχνης 235 καὶ σταλίκων τύπον ὀρθόν, ὑπὲρ ψαμάθοιο δὲ θηρῶν πρώιον ἀτρίπτωι κεχαραγμένον ἴχνος ἀρούρηι ... καὶ ποσὶν ἐνδρομίδας θηρήτορα φῶτα διδάξας ἄσχετον ἀίσσοντα κυνοσσόον εἰς δρόμον ἄγρης ... πέπλα φαεινομένης ἐπιγουνίδος ἄχρι φορῆσαι, 240 μή ποτε θηρητῆρος ἐπειγομένου ποδὸς ὁρμὴ ἂψ ἀνασειράζοιτο καθιεμένοιο χιτῶνος. κεῖνος ἀνὴρ ἐνόησε πολυτρήτων στίχα σίμβλων, πλαζομένης δ᾽ ἔστησεν ἐρημάδος ἔργα μελίσσης, ἥ τις ἔσω λειμῶνος ἀπ᾽ ἄνθεος ἄνθος ἀμείβει 245 εἰς φυτὸν ἀγλαόκαρπον, ἐφιπταμένη δὲ κορύμβοις χείλεσιν ἀκροτάτοισιν ἀμέλγεται ἄκρον ἐέρσης· καὶ λινέαις ἁψῖσι πολυπλέκτοιο χιτῶνος γυῖα περισφίγξας ὀνύχων ἄπο μέχρι κομάων ... καὶ δολίωι πνιγόεντι πυρὸς τεχνήμονι καπνῶι 250 σινομένην πρήυνεν, ὑπηνέμιον δὲ τινάσσων πυρσὸν ἀπειλητῆρα φιλοσμήνοιο μελίσσης δίζυγα χαλκὸν ἄειρεν, ὑπωροφίηι δὲ λοχείηι βομβηδὸν κλονέοντος ἀσιγήτοιο κυδοιμοῦ χειρὶ πολυκροτάλωι διδυμάονα δοῦπον ἀράσσων 255 φρικτὰ κορυσσομένης ἐφυλάσσετο κέντρα μελίσσης, καὶ προταμὼν κηροῖο πολυγλώχινα καλύπτρην ἔβλισεν αἰόλα δῶρα μελισταγέος τοκετοῖο. πρῶτος ἐυρραθάμιγγος ἀλείφατος εὗρεν ἐέρσην, καρπὸν ὅτε βρίθοντι ταμὼν μυλοειδέι πέτρωι 260 πίονας ὑγροτόκοιο γονὰς ἔθλιψεν ἐλαίης. καὶ σκιερῆς πολύδενδρον ὑπὸ κλέτας εὔβοτον ὕλης εἰς ἕλος, εἰς λειμῶνα φέρων ἐδίδαξε βοτῆρας ἠελίου φαίνοντος ἐς ἕσπερον ἄχρι νομεύειν. πλαζομένων δ᾽ ἀκίχητον ἀπειθέα φοιτάδι χηλῆι 265 ἑσπομένων βραδὺν οἶμον ὀπισθοπόρων στίχα μήλων εἰς νομὸν ἀνθεμόεντα μιῆι ξύνωσε κελεύθωι αἶγα λαβὼν προκέλευθον ὁμοζήλοιο πορείης. καὶ νομίην ἐνόησεν ὀρειάδα Πανὸς ἀοιδήν. καὶ πυρὶ σειριάοντα κατεύνασεν ἀστέρα Μαίρης, 270 καὶ Διὸς Ἰκμαίοιο θυώδεα βωμὸν ἀνάψας αἵματι ταυρείωι γλυκερὴν ἐπεχεύατο λοιβὴν ποικίλα φοιταλέης ἐπιβώμια δῶρα μελίσσης, πλήσας ἁβρὰ κύπελλα μελικρήτου κυκεῶνος· Ζεὺς δὲ πατὴρ ἤκουσε καὶ υἱέος υἷα γεραίρων 275 πέμψεν ἀλεξικάκων ἀνέμων ἀντίπνοον αὔρην, Σείριον αἰθαλόεντος ἀναστέλλων πυρετοῖο. εἰσέτι νῦν κήρυκες Ἀρισταίοιο θυηλῆς γαῖαν ἀναψύχουσιν Ἐτήσιαι ἐκ Διὸς αὖραι, ὁππότε ποικιλόβοτρυς ἀέξεται οἰνὰς ὀπώρη. 280 τὸν μὲν Ἔρως πόμπευεν ἐς Ἀονίους ὑμεναίους, Φοίβου Κήιον υἷα· Ϡ βοοστίκτου δὲ θυηλῆς ... πᾶσα πόλις στεφθεῖσα, καὶ ἰθυτμῆτες ἀγυιαὶ ὀρχηθμῶι μεμέληντο, παρὰ προπύλαια δὲ παστοῦ εἱλιπόδην ὑμέναιον ἀνεκρούσαντο πολῖται, 285 καὶ μέλος ἱμερόφωνον ἐπεφθέγξαντο γυναῖκες, καὶ γαμίηι σύριγγι συνέκλαγον Ἄονες αὐλοί. ἔνθεν Ἀρισταίοιο καὶ Αὐτονόης ἀπὸ λέκτρων Ἀκταίων ἀνέτελλε· φιλοσκοπέλωι δὲ μενοινῆι Ἀγρέος αἷμα φέρων ἀπεμάξατο πάτριον ἄγρην, 290 Ἀρτέμιδος θεράπων ὀρεσίδρομοσ�οὐ νέμεσις δὲ δύσμορον Ἀκταίωνα μαθεῖν μελεδήματα θήρης υἱωνὸν γεγαῶτα λεοντοφόνοιο Κυρήνησ�· οὔ ποτέ μιν φύγεν ἄρκτος ὀρεστιάς, οὐδέ μιν αὐτῆς λοίγιον ἐπτοίησε λεχωίδος ὄμμα λεαίνης· 295 πολλάκι δ᾽ ὑψιπότητον ἐπιθρώισκοντα δοκεύων πόρδαλιν ἐπρήνιξεν· ἀεὶ δέ μιν ὑψόθι λόχμης ὄμμασι θαμβαλέοισιν ἐδέρκετο μηλονόμος Πὰν ὡκείης ἐλάφοιο παραΐσσοντα πορείην. ἀλλά οἱ οὐ χραίσμησε ποδῶν δρόμος, οὐδὲ φαρέτρη 300 ἤρκεσεν, οὐ βελέων σκοπὸς ὄρθιος, οὐ δόλος ἄγρης· ἀλλά μιν ὤλεσε Μοῖρα, κυνοσπάδα νεβρὸν ἀλήτην, Ἰνδώιην μετὰ δῆριν ἔτι πνείοντα κυδοιμοῦ, εὖτε τανυπρέμνοιο καθήμενος ὑψόθι φηγοῦ λουομένης ἐνόησεν ὅλον δέμας Ἰοχεαίρης, 305 θηητὴρ δ᾽ ἀκόρητος ἀθηήτοιο θεαίνης ἁγνὸν ἀνυμφεύτοιο δέμας διεμέτρεε κούρης ἀγχιφανής· καὶ τὸν μὲν ἀνείμονος εἶδος ἀνάσσης ὄμματι λαθριδίωι δεδοκημένον Ϡ ὄμματι λοξῶι Νηιὰς ἀκρήδεμνος ἀπόπροθεν ἔδρακε Νύμφη, 310 ταρβαλέη δ᾽ ὀλόλυξεν, ἑῆι δ᾽ ἤγγειλεν ἀνάσσηι ἀνδρὸς ἐρωμανέος θράσος ἄγριον· ἡμιφανὴς δὲ Ἄρτεμις ἁρπάξασα σὺν εἵματι κυκλάδα μίτρην παρθενίωι ζωστῆρι σαόφρονας ἔσκεπε μαζούς, καὶ διεροῖς μελέεσσιν ἔσω δύνουσα ῥεέθρων 315 αἰδομένη κατὰ βαιὸν ὅλον δέμας ἔκρυφε κούρη. Ἀκταίων βαρύποτμε, σὺ μὲν λίπεν αὐτίκα μορφὴ ἀνδρομέη, πισύρων δὲ ποδῶν ἐδιχάζετο χηλή, καὶ τανααὶ γναθμοῖσιν ἐμηκύνοντο παρειαί, κνῆμαι ἐλεπτύνοντο, καὶ ἀγκύλα δοιὰ μετώπωι 320 φύετο μακρὰ κόρυμβα τανυπτόρθοιο κεραίης, καὶ στικτοῖς μελέεσσι νόθη ποικίλλετο μορφή, καὶ λάσιον δέμας εἶχεν· ἀελλήεντι δὲ νεβρῶι εἰσέτι μοῦνος ἔην νόος ἔμπεδος· ὡκυπόρωι δὲ ἔτρεχεν ἀξείνοιο δι᾽ οὔρεος ἅλματι χηλῆς, 325 θηρητὴρ τρομέων θηρήτορας. ἀλλοφυῆ δὲ οὐκέτι τὸν πρὶν ἄνακτα κύνες μάθον· ἀχνυμένης γὰρ νεύμασιν ἀτρέπτοισι βαρύφρονος Ἰοχεαίρης φοιτάδος οἰστρήεντι μεμηνότες ἄσθματι λύσσης νεβροφόνων ἐχάραξαν ὁμόζυγον ὄγμον ὀδόντων, 330 ψευδομένηι δ᾽ ἐλάφοιο παραπλαγχθέντες ὀπωπῆι στικτὸν ἐθοινήσαντο νόθον δέμας ἄφρονι λύσσηι. καὶ θεὸς ἄλλο νόησε, κύνας βραδέεσσι γενείοις ἔμπνοον Ἀκταίωνα κεκασμένον ἔμφρονι θυμῶι δαρδάπτειν κατὰ βαιόν, ἵνα φρένα μᾶλλον ἀμύξηι 335 ὀξυτέραις ὀδύνηισιν· ὑπὸ βροτέηι δὲ μενοινῆι πότμον ἑὸν στενάχων κινυρῆι βρυχήσατο φωνῆι· «ὄλβιε Τειρεσία, σὺ γὰρ ἔδρακες ἐκτὸς ὀλέθρου γυμνὸν ἀναινομένης οἰκτίρμονος εἶδος Ἀθήνης· οὐ θάνες, οὐκ ἐλάφοιο δέμας λάχες, οὐδὲ μετώπωι 340 ὑμετέρωι προβλῆτες ἐπηιώρηντο κεραῖαι· ζώεις σῶν βλεφάρων ὀλέσας φάος· ὑμετέρων δὲ ὀφθαλμῶν ἀμάρυγμα νόωι μετέθηκεν Ἀθήνη· χώεται Ἰοχέαιρα κακώτερα Τριτογενείης. αἴθε μοι ἄλγος ὄπασσεν ὁμοίιον, αἴθε καὶ αὐτὴ 345 ὄμμασιν ἡμετέροισιν ἐπέχραεν ὥς περ Ἀθήνη, αἴθε νόον μετάμειψεν, ἅ περ δέμας· ἀλλοφυὴς γὰρ μορφὴ θηρὸς ἔχει με, καὶ ἀνέρος ἦθος ἀέξω. σφωιτέρωι πότε θῆρες ἐπιστενάχουσιν ὀλέθρωι; ἀφραδέες ζώουσι καὶ οὐ νοέουσι τελευτήν. 350 μοῦνος ἐγὼ μεθέπω πινυτὸν νόον· ὀλλύμενος δὲ ὄμμασι θηρείοισιν ἐχέφρονα δάκρυα λείβω. ἄγριοι ἄρτι γένεσθε κύνες πλέον· οὔ ποτε τόσσον ἅλματι λυσσήεντι κατεσσεύεσθε λεόντων. αἴλινον Ἀκταίωνι, φίλαι, φθέγξασθε, κολῶναι, 355 ναὶ λίτομαι, καὶ θῆρες ὁμοίιοι· εἰπέ, Κιθαιρών, Αὐτονόηι, τά περ εἶδες, Ἀρισταίωι δὲ τοκῆι δάκρυσι πετραίοισιν ἐμὴν ἀγόρευε τελευτὴν καὶ κύνας οἰστρηθέντας ἀφειδέας. ὤμοι ἀνάγκης, αὐτὸς ἐμαῖς παλάμηισιν ἐμοὺς ἔθρεψα φονῆας. 360 αἴθε λέων με δάμασσεν ὀρίδρομος, αἴθε με σύρων πόρδαλις αἰολόνωτος ἀνέσχισεν, αἴθε με πικροῖς ἀμφιπαγεῖς ὀνύχεσσιν ἀφειδέσι λυσσάδες ἄρκτοι νεβροφανῆ χαροποῖσιν ἐδαιτρεύσαντο γενείοις, μηδὲ κύνες με δάμασσαν ὁμήθεες· οὐκέτι μορφήν, 365 οὐκέτι γινώσκουσιν ἐμὴν ἑτερόθροον ἠχώ.» ἡμιθανὴς τάδ᾽ ἔλεξε, καὶ οὐκ ἀίοντα λιτάων θηρείηι κύνα μάργον ἐλίσσετο πενθάδι φωνῆι· μύθους μὲν προέηκεν ἐχέφρονας, ἀντὶ δὲ φωνῆς ἀνδρομέης κελάδησεν ἀσημάντου θρόος ἠχοῦς. 370 ἤδη δ᾽ αὐτοδίδακτος ὀρεστιὰς ἵπτατο Φήμη Αὐτονόηι βοόωσα κυνοσπάδα παιδὸς ἀνάγκην, οὐ μὲν ὅπως ἐλάφοιο δασύτριχα δύσατο μορφήν, ἀλλ᾽ ὅτι μοῦνον ὄλωλε. φιλοστόργωι δὲ μενοινῆι νήλιπος ἀκρήδεμνος ἱμάσσετο πένθεϊ μήτηρ· 375 καὶ πλοκάμους ἐδάιξεν, ὅλον δ᾽ ἔρρηξε χιτῶνα, πενθαλέοις δ᾽ ὀνύχεσσιν ἑὰς ἐχάραξε παρειὰς αἵματι φοινίξασα, κατὰ στέρνοιο δὲ γυμνοῦ παιδοκόμων ἐρύθηνε φερέσβιον ἄντυγα μαζῶν μνησαμένη τοκετοῖο· φιλοθρήνου δὲ προσώπου 380 δάκρυσιν ἀενάοισιν ἐλούσατο φάρεα νύμφη. καὶ κύνες Ἀκταίωνος ἀπὸ σκοπέλοιο μολόντες μῦθον ἐπιστώσαντο δυσάγγελον· ἠιθέου γὰρ δάκρυσι σιγαλέοισιν ἐμαντεύοντο τελευτήν. μυρομένους δ᾽ ὁρόωσα πολὺ πλέον ἔστενε μήτηρ· 385 καὶ πολιὴν πλοκαμῖδα γέρων ἀπεκείρατο Κάδμος, Ἁρμονίη δ᾽ ἰάχησε· φιλοκλαύτων δὲ γυναικῶν συμφερτῆι βαρύδουπος ὅλος δόμος ἔβρεμεν ἠχῆι. Αὐτονόη δ᾽ ὁμόφοιτος Ἀρισταίωι παρακοίτηι ἤιε μαστεύουσα πολύπλανα λείψανα νεκροῦ· 390 εἶδε καὶ οὐ γίνωσκεν ἑὸν γόνον, ἔδρακε μορφὴν δαιδαλέης ἐλάφοιο καὶ οὐκ ἴδεν ἀνδρὸς ὀπωπήν, πολλάκι δ᾽ ἀγνώστοιο παρέστιχεν ὀστέα νεβροῦ ἐν χθονὶ κεκλιμένοιο καὶ οὐ μάθεν· ὀλλυμένου γὰρ παιδὸς ἑοῦ δοκέεσκεν ἰδεῖν βροτοειδέα μορφήν. 395 δύσμορον Αὐτονόην οὐ μέμφομαι· ἀλλοφυῆ γὰρ λείψανα παιδὸς ὄπωπεν, ἀτεκμάρτου δὲ προσώπου γαμφηλὰς ἐνόησε καὶ οὐκ ἴδε κύκλον ὀπωπῆς, καὶ κεράων ἔψαυσε καὶ υἱέος οὐ μάθε κόρσην· λεπταλέους πόδας εἶδε καὶ οὐκ ἐφράσσατο ταρσούς, 400 λεπταλέους πόδας εὗρε καὶ οὐκ ἴδε κύκλα πεδίλων. δύσμορον Αὐτονόην οὐ μέμφομαι· οἰχομένου γὰρ ὀφθαλμοὺς βροτέους οὐκ ἔδρακεν, οὐκ ἴδε μορφῆς ἀνδρομέης ἴνδαλμα, καὶ οὐκ ἐνόησεν ἰούλων ἄνθεϊ πορφυρέωι κεχαραγμένον ἀνθερεῶνα. 405 φοιταλέοις δὲ πόδεσσι διερχομένη ῥάχιν ὕλης τρηχαλέης ἐπάτησε δυσέμβατα νῶτα κολώνης λυσιχίτων ἀπέδιλος· ὀριπλανέων δ᾽ ἀπὸ μόχθων νόστιμος εἰς δόμον ἦλθεν· ἐπ᾽ ἀπρήκτωι δὲ μενοινῆι ἀχνυμένη μόγις εὗδε σὺν αἰνοτόκωι παρακοίτηι. 410 ἄμφω δὲ σκιεροῖσιν ἐφωμίλησαν ὀνείροις, ὄμμασιν ἁρπάξαντες ἀηδονίου πτερὸν Ὕπνου. ψυχὴ δ᾽ ἠιθέοιο κατηφέι πατρὶ παρέστη στικτὸν ἔχων ἐλάφου σκιόεν δέμας, ἐκ βλεφάρων δὲ ἔμφρονα δάκρυα χεῦε, καὶ ἀνδρομέηι φάτο φωνῆι· 415 «ὦ πάτερ, ὑπνώεις, καὶ ἐμὴν οὐκ οἶδας ἀνάγκην· ἔγρεο καὶ γίνωσκε νόθην ἄγνωστον ὀπωπήν, ἔγρεο καὶ πήχυνε φίλης ἐλάφοιο κεραίην, καὶ κύσον ἔμφρονα θῆρα, τὸν Αὐτονόης τέκε γαστήρ. αὐτὸν ὀπιπεύεις με, τὸν ἔτρεφες· ἀμφότερον γὰρ 420 δέρκεαι Ἀκταίωνα καὶ Ἀκταίωνος ἀκούεις. εἰ παλάμην ποθέεις καὶ δάκτυλα παιδὸς ἀφάσσειν, προσθιδίους σκοπίαζε πόδας, καὶ χεῖρα νοήσεις· εἰ κεφαλὴν ποθέεις, κεφαλὴν ἐλάφοιο δοκεύοις· εἰ βροτέους κροτάφους, δολιχὰς σκοπίαζε κεραίας· 425 εἰ πόδας Ἀκταίωνος, ὀπισθιδίην ἴδε χηλήν· εἰ μελέων τρίχας εἶδες, ἐμοὶ γεγάασι χιτῶνες. υἷα, πάτερ, γίνωσκε, τὸν οὐκ ἐσάωσεν Ἀπόλλων· υἷα, πάτερ, στενάχιζε, τὸν οὐκ ἐφύλαξε Κιθαιρών. ἀλλοφυῆ σέο παῖδα κατηφέι κεῦθε κονίηι· 430 μὴ τεὸν ἀκτερέιστον ὀλωλότα νεβρὸν ἐάσσηις· μή σε παραπλάγξειε νόθη καὶ ἄπιστος ὀπωπή. αἴθε, πάτερ, με φύλαξας ἀήθεα θηροσυνάων· οὐκ ἂν ἐγὼ πόθον εἶχον ἐρημάδος Ἰοχεαίρης, οὐκ ἂν ἐγὼ δέμας εἶδον Ὀλύμπιον. αἴθε δὲ κούρης 435 θνητῆς εἶχον ἔρωτα· χαμαιγενέας δὲ γυναῖκας καλλείψας ἑτέροισι καὶ ὡκυμόρους ὑμεναίους ἀθανάτην ἐπόθησα· χολωομένης δὲ θεαίνης δεῖπνον ἐμῶν σκυλάκων γενόμην, πάτερ· εἰσὶ κολῶναι μάρτυρες· εἰ σκοπέλοις οὐ πείθεαι, εἴρεο Νύμφας 440 Νηιάδας· δεδάασιν Ἁμαδρύες· ἰσοτύπους δὲ θῆρας ἐμοὺς ἐρέεινε, καὶ οὓς ἐκάλεσσα νομῆας. ἀλλὰ πάτερ πυμάτην πόρε μοι χάριν, ἀφραδέας δὲ πένθος ἔχων φιλότεκνον ἐμοὺς μὴ κτεῖνε φονῆας, παιδοφόνους οἴκτειρον ἀμεμφέας· ἡμετέραις γὰρ 445 θηρείαις ἀέκοντες ἀπεπλάγχθησαν ὀπωπαῖς. τίς δὲ κύων ἐλάφου ποτὲ φείδεται; ἠὲ τίς ἀνὴρ νεβροφόνοις σκυλάκεσσι χολώεται; ἆ πόσα δειλοὶ κυκλάδες ἔνθα καὶ ἔνθα περιτροχόωσι κολώνας καὶ νέκυν ἰχνεύουσι, τὸν ἔκτανον· ἐκ βλεφάρων δὲ 450 δάκρυα μὲν προχέουσιν ἐχέφρονα καὶ ποσὶν ἄκροις δίκτυα πηχύνουσι φιλοστόργωι τινὶ θεσμῶι ἀνδράσιν ἀχνυμένοισιν ἐοικότες, ἡμετέρηι δὲ πενθαλέαις ὑλακῆισιν ἐπικλαίουσι χαμεύνηι. ναί, λίτομαι, μὴ κτεῖνε γοήμονας· ἡμετέρου γὰρ 455 δέρματα λαχνήεντος ἐθηήσαντο προσώπου, οὐδὲ λιταῖς πείθοντο, καὶ οὐκ ἀνέκοψαν ὀδόντας ἀλλοίης ἀίοντες ἐμῆς μυκήματα φωνῆς· καὶ κινυροῖς στομάτεσσιν ἐμὴν ἐρέεινον ἐρίπνην· ‹σήμερον Ἀκταίωνα τίς ἥρπασεν, εἴπατε, πέτραι, 460 πῆι δρόμον ἀμφιέπει κεμαδοσσόον, εἴπατε, Νύμφαι.› τοῖα κύνες φθέγξαντο· καὶ ἀντιάχησε κολώνη· ‹τίς κεμὰς οὐρεσίφοιτος ἔχει κεμαδοσσόον ἄγρην; οὐκ ἔλαφον πυθόμην ἐλαφηβόλον· ἀλλοφυὴς δὲ Ἀκταίων μετάμειπτο καὶ ἔπλετο νεβρὸς ἐχέφρων, 465 ὅς ποτε θῆρας ἔπεφνεν· ὑπ᾽ ἀνδροφόνωι δὲ καὶ αὐτὸς Ἀγρέος αἷμα φέρων ἀγρεύεται Ἰοχεαίρηι›. τοῖα μὲν ἀχνυμένων σκυλάκων ἐβόησαν ἐρίπναι. πολλάκι δ᾽ Ἄρτεμις εἶπεν ἐμῶι μαστῆρι φονῆι· ‹λῆγε, κύων βαρύμοχθε, πολύπλανον ἴχνος ἑλίσσων· 470 δίζεαι Ἀκταίωνα, τὸν ἔνδοθι γαστρὸς ἀείρεις, δίζεαι Ἀκταίωνα, τὸν ἔκτανες· ἢν ἐθελήσηις, ὄψεαι ὀστέα μοῦνα τεῆς ἔτι λείψανα φορβῆς.› ἀλλά, πάτερ, κατὰ κόσμον ἐμὸν μόρον εἰς σὲ βοήσω. θάμνος ἔην τανύφυλλος, ὁ μὲν φυλίης, ὁ δ᾽ ἐλαίης· 475 δειλὸς ἐγώ· φιλίης γὰρ ἐπώνυμον ἔρνος ἐάσσας πρέμνον ἐς ἀγχικέλευθον ἀνέδραμον ἁγνὸν ἐλαίης Ἀρτέμιδος χρόα γυμνὸν ἀθηήτοιο δοκεύων. ἀασάμην· διδύμην γὰρ ἀτάσθαλον ὕβριν ἀέξων Παλλάδος εἰς φυτὸν ἦλθον, ἰδεῖν δέμας Ἰοχεαίρης 480 τολμηροῖς βλεφάροισιν, ὅθεν βαρύμηνις ἀπειλὴ ἔχραεν Ἀκταίωνι καὶ Ἀρτέμιδος καὶ Ἀθήνης. ἄρτι γὰρ ἱδρώουσα πυραυγέι καύματος ἀτμῶι Ἄρτεμις εὐκαμάτοιο μετὰ δρόμον ἠθάδος ἄγρης λούετο μὲν καθαροῖσιν ἐν ὕδασι, λουομένης δὲ 485 ὀφθαλμοὺς ἀμάρυσσεν ἐμοὺς ἀντώπιος αἴγλη χιονέας ἀκτῖνας ἀκοντίζουσα ῥεέθροις· φαίης δ᾽, ὠς παρὰ χεῦμα παλίμπορον Ὠκεανοῖο ἑσπερίη σελάγιζε δι᾽ ὕδατος ὄμπνια Μήνη. Νηιάδες δ᾽ ὀλόλυξαν ὁμήλυδες· ἴαχε Λοξὼ 490 σύνθροον Οὖπιν ἔχουσα, γαληναίωι δὲ ῥεέθρωι νηχομένην ἀνέκοψε κασιγνήτην Ἑκαέργην. καὶ ζόφος ἠερόφοιτος ἐμὰς ἐκάλυψεν ὀπωπάς· ἐκ δὲ φυτοῦ προκάρηνος ἐπωλίσθησα κονίηι, καὶ λάχον ἐξαπίνης δέμας αἰόλον, ἀντὶ δὲ μορφῆς 495 ἀνδρομέης ἄγνωστον ἐμὸν δέμας ἔσκεπε λάχνη, καὶ κύνες ἀγρευτῆρες ἑοὺς ἐχάραξαν ὀδόντας. σιγήσω τάδε πάντα· �τί δεύτερον ἄλγος ἐνίψω; � μή σε καὶ ὑπνώοντα πάλιν στοναχῆισι πελάσσω. πολλάκι δένδρον ἐκεῖνο παρέστιχες, ὁππόθι κεῖται 500 λείψανον Ἀκταίωνος, ὑπὲρ δαπέδου δὲ λυθέντα πολλάκι δαιδαλέοιο παρήλυθες ὀστέα νεβροῦ οἰκτρὰ πολυβρώτων μελέων, μεμερισμένα γαίηι, ἀλλήλων ἀπάνευθεν. ἐγὼ δέ σοι ἄλλο βοήσω πιστὸν ἐμοῦ θανάτου σημήιον· ἀρχεκάκου γὰρ 505 ὄψεαι ἰοδόκην καὶ ἐμὸν βέλος ἐγγύθι δένδρου, εἰ μὴ καὶ πτερόεντες ἐμορφώθησαν ὀιστοί, εἰ μὴ χωομένη πάλιν Ἄρτεμις εἰς φυτὸν ὕλης τόξον ἐμὸν μετάμειψεν, ἐμὴν δ᾽ ἤλλαξε φαρέτρην. ὄλβιος Ὦτος ἔην, ὅτι μὴ πέλε νεβρὸς ἀλήτης· 510 οὐ κύνες Ὠρίωνα κυνοσσόον . . . αἴθε καὶ αὐτὸν σκορπίος Ἀκταίωνα κατέκτανεν ὀξέι κέντρωι. δειλὸς ἐγώ· κενεὴ γὰρ ἐμὸν νόον ἤπαφε φήμη· εἰσαΐων δ᾽, ὅτι Φοῖβος, ἀδελφεὸς Ἰοχεαίρης, Κυρήνηι παρίαυεν, ἐμὸν δ᾽ ἔσπειρε τοκῆα, 515 Ἄρτεμιν ὡισάμην ἐμφύλιον εἰς γάμον ἕλκειν. καὶ πάλιν εἰσαΐων, ὅτι νυμφίον ἀργέτις Ἠὼς ἥρπασεν Ὠρίωνα καὶ Ἐνδυμίωνα Σελήνη, καὶ βροτὸν Ἰασίωνα πόσιν προσπτύξατο Δηώ, ὡισάμην, ὅτι τοῖος ἔην νόος Ἰοχεαίρης. 520 ἀλλά, πάτερ, κτερέιζε νόθην κεραελκέα μορφήν, μηδὲ λίπηις ἑτέροισι κυσὶν μέλπηθρα γενέσθαι. ἢν δὲ κατακρύψηις ἐμὰ λείψανα κοιλάδι γαίηι, δῶρον ἐμοὶ καὶ τοῦτο χαρίζεο· τόξα καὶ ἰοὺς πῆξον ἐμὸν παρὰ τύμβον, ὅ περ γέρας ἐστὶ θανόντων. 525 ἀλλὰ βέλος καὶ τόξον ἔα, πάτερ, ὅττι βελέμνοις τέρπεται Ἰοχέαιρα καὶ ἀγκύλα τόξα τιταίνει. ζωιοτύπον δ᾽ ἱκέτευε πολύτροπον, ὄφρα χαράξηι στικτὸν ἐμὸν νόθον εἶδος ἀπ᾽ αὐχένος εἰς πόδας ἄκρους· μοῦνον ἐμοῦ βροτέοιο τύπον τεύξειε προσώπου, 530 πάντες ἵνα γνώωσιν ἐμὴν ψευδήμονα μορφήν. μὴ δέ, πάτερ, γράψειας ἐμὸν μόρον· οὐ δύναται γὰρ δακρυχέειν ἐμὸν εἶδος ὁμοῦ καὶ πότμον ὁδίτησ.» εἶπεν ὀνειρείη νοερὴ κεμάς, ἀπροϊδὴς δὲ ὤιχετο πωτήεσσα· καὶ Αὐτονόης παρακοίτης 535 ἄνθορεν ὀμφήεντος ἀπορρίψας πτερὸν Ὕπνου. ἐκ λεχέων δὲ δάμαρτα πολυπτοίητον ἐγείρας πέφραδε θηρείην κεραελκέα παιδὸς ὀπωπήν, καὶ μύθους ἀγόρευεν, ὅσους φάτο νεβρὸς ἐχέφρων. καὶ γόος ἔπλετο μᾶλλον· Ἀρισταίοιο δὲ νύμφη 540 ἤιε μαστεύουσα τὸ δεύτερον, ἀχνυμένη δὲ πυκνὰ τανυπρέμνοιο διέστιχεν ἔνδια λόχμης· καὶ κραναῶν στείβουσα δυσέμβατα κύκλα κελεύθων κεῖνο μόγις φυτὸν εὗρε μιαιφόνον, εὗρε καὶ αὐτὴν ἰοδόκην καὶ τόξον ἐρημαίωι παρὰ δένδρωι. 545 ὀστέα δ᾽ ἔνθα καὶ ἔνθα χυτῆι μεμερισμένα γαίηι, λείψανα πεπτηῶτα, μόγις συνελέξατο μήτηρ, καὶ φιλίηι παλάμηι γλυκερὴν πήχυνε κεραίην, καὶ κύσεν αἰνομόροιο δασύτριχα χείλεα νεβροῦ. ὀξὺ δὲ κωκύουσα νέκυν τυμβεύσατο μήτηρ, 550 πάντα δέ οἱ παρὰ τύμβον ἐπέγραφεν, ὅσσα τοκῆι ἔννυχος Ἀκταίωνος ὀνειρείη φάτο φωνή. ὄφρα μὲν ἔβρεμε πένθος Ἀρισταίοιο μελάθρωι, τόφρα δὲ καλλίστερνος Ἐχίονι τίκτεν Ἀγαύη Γηγενέος θρασὺν υἷα θεημάχον· ἀρτιφάτου δὲ 555 πένθεος ἱσταμένοιο φερώνυμος ἔπλετο Πενθεύς. καὶ Νεφέλης μετὰ λέκτρα, μετὰ προτέρους ὑμεναίους εἰς θαλάμους Ἀθάμαντος ἐκώμασε παρθένος Ἰνώ· αἰνοπαθῆ δὲ Λέαρχον ἐγείνατο καὶ Μελικέρτην ποντιὰς ἐσσομένη μετανάστιος, οἷα τιθήνη 560 παιδοκόμος Βρομίοιο φερέσβιος· ἀμφοτέροις γὰρ μαζὸν ἕνα ξύνωσε Παλαίμονι καὶ Διονύσωι. καὶ Σεμέλη πεφύλακτο φαεινοτέροις ὑμεναίοις· ἤδη γὰρ μενέαινε νέον Διόνυσον ἀέξειν, ταυροφυὲς μίμημα παλαιγενέος Διονύσου, 565 αἰνομόρου Ζαγρῆος ἔχων πόθον ὑψιμέδων Ζεύς, ὃν τέκε Περσεφόνεια δρακοντείηι Διὸς εὐνῆι σύγγαμος οὐδαίοιο μελαγχλαίνου βασιλῆος, Ζεὺς ὅτε πουλυέλικτος, ἔχων ψευδήμονα μορφήν, μείλιχος ἱμερόεντι δράκων κυκλούμενος ὁλκῶι 570 Περσεφόνης σύλησεν ἀνυμφεύτοιο κορείην κευθομένης, ὅτε πάντες, ὅσοι ναετῆρες Ὀλύμπου, παιδὶ μιῆι θέλγοντο καὶ ἀγχιγάμου περὶ κούρης Κυπριδίην ἔριν εἶχον ἀσυλήτων ὑμεναίων δωροφόροι· μή πω δὲ μολὼν ἐπὶ δέμνια Πειθοῦς 575 ῥάβδον ἑὴν ἐτίταινε γέρας θαλαμηπόλον Ἑρμῆς, ὤρεγε δ᾽ ἕδνα γάμοιο λύρην εὔυμνον Ἀπόλλων, καὶ δόρυ καὶ θώρηκα γαμήλιον ὤπασεν Ἄρης ἀσπίδα δῶρον ἄγων νυμφήιον, εὐκελάδου δὲ Λήμνιος ἀρτιτέλεστον ἔτι πνείοντα καμίνου 580 ποικίλον ὅρμον ἔτεινε πολύχροον ἀμφιγυήεις· ἤδη γὰρ προτέρην ἀέκων ἠρνήσατο νύμφην Ἄρεϊ βακχευθεῖσαν ὀπιπεύων Ἀφροδίτην· δείκνυε καὶ μακάρεσσι γαμοκλόπον ἅρπαγα λέκτρων, ἀγγελίηι Φαέθοντος ἀραχναίωι τινὶ δεσμῶι 585 γυμνῆι γυμνὸν Ἄρηα περισφίγξας Ἀφροδίτηι. Ζεὺς δὲ πατὴρ πολὺ μᾶλλον ἐθέλγετο Περσεφονείηι· καὶ Διὶ παπταίνοντι φυῆς εὐπάρθενον ἥβην ὀφθαλμὸς προκέλευθος ἐγίνετο πομπὸς Ἐρώτων, Περσεφόνης ἀκόρητος· ὑπὸ κραδίην δέ οἱ αἰεὶ 590 λαίλαπες ἐρροίζησαν ἀκοιμήτοιο μερίμνης· καὶ Παφίης κατὰ βαιὸν ἀνήπτετο μείζονι πυρσῶι ἐξ ὀλίγου σπινθῆρος· ἐπ᾽ εὐκόλπωι δὲ θεαίνηι Ζηνὸς ἐρωμανέοντος ἐδουλώθησαν ὀπωπαί. καί ποτε χαλκὸν ἔχουσα διαυγέα τέρπετο κούρη 595 κάλλεος ἀντιτύποιο δικασπόλον, αὐτομάτωι δὲ σιγαλέωι κήρυκι τύπον πιστώσατο μορφῆς ψευδαλέον σκιόεντι δέμας κρίνουσα κατόπτρωι, μιμηλὴν δ᾽ ἐγέλασσεν ἐς εἰκόνα· Περσεφόνη δὲ αὐτοχάρακτον ἄγαλμα διοπτεύουσα προσώπου 600 ψευδομένης νόθον εἶδος ἐδέρκετο Περσεφονείης. καί ποτε διψαλέοιο πυραυγέι καύματος ἀτμῶι καρχαλέης φεύγουσα μεσημβρινὸν ἴχνιον Ὥρης κερκίδος ἱστοπόνων καμάτων ἀμπαύετο κούρη, καὶ διεροὺς ἱδρῶτας ἀποσμήξασα προσώπου, 605 σφιγγομένην στέρνοισι σαόφρονα λύσατο μίτρην, καὶ χρόα λυσιπόνοισι καθικμαίνουσα λοετροῖς πηγαίωι πεφόρητο καταψύχοντι ῥεέθρωι, νήματα καλλείψασα πεπαρμένα Παλλάδος ἱστῶι. οὐδὲ Διὸς λάθεν ὄμμα πανόψιον· ἀσκεπέος δὲ 610 λουομένης ὅλον εἶδος ἐδέρκετο Περσεφονείης· οὐ τόσον ἱμείρων ἐπεμήνατο Κυπρογενείηι, ἣν ποθέων ἀκίχητα γονὴν ἔσπειρεν ἀρούρηι θερμὸν ἀκοντίζων αὐτόσσυτον ἀφρὸν ἐρώτων, ἔνθεν ἀεξιτόκοιο Κεραστίδος ἔνδοθι Κύπρου 615 Φηρῶν εὐκεράων διδυμόχροος ἤνθεε φύτλη. καὶ μεδέων κόσμοιο καὶ οὐρανὸν ἡνιοχεύων εἰς πόθον αὐχένα κάμψεν ὁ τηλίκος· οὐδὲ κεραυνοί, οὐ στεροπὴ χραίσμησε κορυσσομένης Ἀφροδίτης· Ἥρης δ᾽ οἶκον ἔλειπε, λέχος δ᾽ ἀπέειπε Διώνης, 620 Δηοῦς ῥῖψεν ἔρωτα, Θέμιν φύγε, κάλλιπε Λητώ, μούνης δ᾽ εἰς ὑμέναιον ἐθέλγετο Περσεφονείης.