Μῦθοι Αἰσώπειοι

___________________________________________________

184.

Κάμηλος καὶ Ζεύς.

(S. 116. C. 197. F. 152. 281.)

Κάμηλος, θεασαμένη ταῦρον ἐπὶ τοῖς κέρασιν ἀγαλλόμενον, φθονήσασα αὐτῶι ἠβουλήθη καὶ αὐτὴ τῶν ἴσων ἐδέετο, ὅπως αὐτῆι κέρατα προσνείμηι· καὶ ὁ Ζεὺς ἀγανακτήσας κατ᾿ αὐτῆς, εἴγε μὴ ἀρκοῖτο τῶι μεγέθει τοῦ σώματος καὶ τῆι ἰσχύϊ, ἀλλὰ καὶ περισσοτέρων ἐπιθυμοῖ, οὐ μόνον αὐτῆι κέρατα οὐ προσέθηκεν, ἀλλὰ καὶ μέρος τι τῶν ὤτων ἀφείλετο.

Οὕτω πολλοὶ διὰ πλεονεξίαν τοῖς ἄλλοις ἐποφθαλμίζοντες λανθάνουσι καὶ τῶν ἰδίων στερούμενοι.