Verfåten vun de Free un

Hansestadt Hamborg

2002

______________________________________________________________________________

I.

Grundlagen vun

den Stååt

Artikel 1 [Nåm, Toheurigkeit]

De Free un Hansestadt Hamborg is en Land vun de Bundesrepublik Düütschland.

Artikel 2 [Wat to Hamborg heurt]

(1) To de Free un Hansestadt Hamborg heurt dat Flach, wat bither dör Herkåmen un Gesett fastleggt is. Wenn sick dat ännern schall, denn is en Gesett neudig, wat de Verfåten ännert.

(2) Dör Verdräg mit anner Bundeslänner köönt Stellen inricht un Behörden opboot warrn, de de Free un Hansestadt Hamborg un annere Länner tohoop toheurt. Jüst so kann sick de Free un Hansestadt Hamborg an so Stellen oder Behörden bedeligen.

Artikel 3 [Rechtsstååt, Souveränität vun't Volk, glieke Rechte för Froons– un Mannslüüd]

(1) De Free un Hansestadt is en demokratisch un sozial Rechtsstååt.

(2) All Gewalt vun'n Staat geiht vun't Volk ut. Se ward so bruukt, as de Verfåten un de annern Gesetten dat fastleggen doot. Se schall dorför sorgen, wat Froons– un Mannslüüd de sülvigen Rechte un Meuglichkeiten hebbt. Sünnerlich warkt se, wat beide in kollegiale öffentlich-rechtliche Organe de sülvigen Rechte hebbt, wenn se beråden un besluten mööt.

Artikel 4 [Stååt un Gemeen sünd een]

(1) In de Free un Hansestadt Hamborg ward dat, wat de Stååt deit, dor nich vun trennt, wat de Gemeen deit.

(2) Dör en Gesett kann fastleggt warrn, dat för Deele vun de Stadt Verwaltungen opboot ward; disse Verwaltungen mööt Opgåven sülvstännig leusen, de jüm överdrågen sünd.

Artikel 5 [Landesfarven, -wåpen un -fåhn]

(1) De Landesfarven sünd witt-rot.

(2) Dat Landeswåpen wiest op en rot Schild de witte Borg mit dree Toorns un en slåten Door.

(3) De Landesfåhn driggt de witte Borg vun't Landeswåpen op roden Grund.

(4) Dat Gesett leggt fast, wat anners noch för de Fåhn un dat Wåpen to regeln is.